ئەگەر مەبەست لەم رێككەوتنەی نێوان یەكێتی و گۆڕان پەیداكردنی زۆرینەیەكی پەرلەمان بێت بۆ وەدیهێنانی خەونی نەهێشتنی رۆڵی سەرۆك بەگشتی و لەم كاتەدا بەتایبەتی سەرۆكی هەرێم، ئەوا هەوڵێكی شكستخواردووە و سەركەوتوو نابێت و كوردستان و هەرێم دەگەڕێنێتەوە بۆ بارودۆخی پێش رێككەوتنی ستراتیژی، چونكە وەك دەردەكەوێت ئامانجی سەرەكی یان هۆی دروستبوونی سەرەكی گۆڕان كە لەسەر بنەمای دژایەتی رێككەوتنی ستراتیژی نێوان پارتی و یەكێتی هەڵچنرا بوو كە ئەوكات بەهۆی هەڵوێستی یەكلاكەرەوەی بەڕێز تاڵەبانی و بڕیاری بنبڕی بەڕێزیان سەركەوتوو نەبوو، بۆیە ئەم كادیرانە خۆیان لەیەكێتی سڕكردو بەدەستپێشخەری جێگری سكرتێری گشتی كە لەمەودوا بووە رێكخەری گشتی ئەم بزووتنەوەیە (گۆران)یان راگەیاند و توانیان جەماوەرێكی زۆر لە یەكێتی كە دەتوانرێ بوترێت نیوەی جەماوەری یەكێتی و بگرە زیاتریشیان بەلای خۆیاندا راكێشا و بەو پێیە بوونە خاوەن 25 كورسی لە هەڵبژاردنی ساڵی (2009) و لەدوا هەڵبژاردنیشدا لە ساڵی (2013) توانیان 24 كورسی بەدەست بهێنن و یەكێتی كە حزبی دایكیش بوو تەنها 18 كورسی بەدەستهێنا.
بەڵام هەوڵەكانی گۆڕان لەپەرلەماندا بۆ گۆڕینی سیستەمی سیاسی و هەمواركردنەوەی دەستوور بەئارەزووی ئەوان سەركەوتوو نەبوو، بۆیە ئیدی گۆڕان لەو راستیە گەیشت كە بەتەنها ناتوانێت ئەوكارە بكات گەر بەتەواوی نەچێتە ژێر چەتری یەكێتی و سیاسەتی خۆی لەگەڵ ئەوان یەك نەخات. ئێستاش كە سەركردایەتی هاوبەش دروستكراوە بانگەشەی ئەوە دەكرێت كە سیاسەتەكانیان چ لەپەرلەمان و چ لەبڕیاری سیاسیدا یەكدەخەن، مەبەستی سەرەكی هەر ئەوەیە كەدەیانەوێت وەك خۆیان دەڵێن بەشەرعی و سیاسی سیستەمی سیاسی لەهەرێمدا بگۆڕن و پۆستی سەرۆكی هەرێم لەهێزو توانا بێبەش بكەن و رۆڵی نەهێڵن. گۆڕان دەمێكە گەیشتۆتە ئەو قەناعەتەی كە بەتەنها ئەو كارەی بۆ ناچێتە سەر و ئەو گۆڕانەی بەڵێنی دابوو لەسیستەمی سیاسیدا بیكات، بۆی نەكرا، بۆیە پەنای بردۆتە بەر یەكێتی بەڵكو بەهۆی كورسی هەردوو لاوە لەپەرلەمان كە دەكاتە 42 كورسی ئەو خەونە بەدی بهێنێت.
بەڵام دەبێ گۆڕان و ئێستاش یەكێتی ئەگەرچی دەیانەوێ و بڕیاری كاری هاوبەشیان داوە لەنێوان خۆیاندا لەو راستییە بگەن كە گۆڕینی سیستەمی سیاسی پێویستی بەڕای زۆرینەی تێكڕای دانیشتوانی هەرێمە و نابێت ئەو مافە لەخەڵك زەوت بكرێت و بەتەنها چەند فراكسیۆنێك لەپەرلەمان بڕیاری لەسەر بدات، چونكە كاری سیاسی لەم چەند ساڵەی دواییدا لەسەر بنەمای تەوافق بەڕێوەچووە و ئەمن و ئاسایشی ناوخۆشی دابینكردووە، ئەمەش لەخۆڕا نەهاتووە و لەئەنجامی ئەزمونێكی دوور و درێژ و لەمەودواش لەڕێگەی رێككەوتننامەی ستراتیژییەوە دەستەبەر بووە و تێكدان و شێواندنی ئەو ڕاستییەش ئاكامەكەی مەترسیدار دەبێت و تەنها زەرەرمەندیش گەلەكەمان دەبێت كە ئێستا لەشەڕێكی چارەنووسسازدایە لەگەڵ داعش و بۆتە خاوەن پێگەیەكی دیار لەنێو وڵاتانی هاوپەیماندا و سەنگ و بایەخی تایبەتی خۆی هەیە.
رێككەوتنی نێوان ئەو دوو لایەنەو پێكهێنانی سەركردایەتی هاوبەش ئەو كارەی خۆیانە، بەڵام هەوڵ بدرێ -وەك هەستی پێ دەكرێت- بۆ گۆڕینی تەرازووی هێزو سیستەمی سیاسی و زەمینەسازی بۆ دوو ئیدارەیی بێت لە پشێوی و شێواندنی ژیانی دانیشتووانی و لاوازكردنی پێگەی هەرێم زیاتری لێ شین نابێت.