راستیەكی حاشا هەڵنەگرە داعش بە تەنها بە شەڕ كۆتایی پێنایەت چونكە كارگەیەكی بەردەوامی پێگەیاندن و بەرهەمهێنانی هەیە كە هزری توندڕەویی یە كە سەرچاوەیەكی لەبن نەهاتووە بۆ ئەو رێكخراوە تیرۆریستییە. ئەم داعشە نووستوانەی نێو خۆمان كە لەراستیدا بێدارن، لە راگەیاندنی بیرو بۆچوونە داعشییەكانیاندا ناپرنگێنەوەو بە ئاشكرا باسی دەكەن و لەسەر لاپەڕەی رۆژنامەو لە چاوپێكەوتنەكانیدا بێ ترس بڵاوی دەكەنەوە. ئەوەتا ئیسلامییەكی نێوخۆ دەڵێت كە سەیری زانكۆی مووسڵ و زانكۆی سلێمانی دەكەیت و بەراوردیان دەكەیت، بە ئاشكرا دەبینین كە زانكۆی مووسڵ شەریعەت بەجێ دەهێنێت و زانكۆی سلێمانی بەجێی ناهێنێت، ئەمە لەكاتێكدا هەموومان دەزانین كێ لە مووسڵ حوكمڕانە، بە واتایەكی تر دەڵێت داعش لەسەر هەقە و ئێوە ناهەق و ئەمەش بێ ترس لە لێپرسینەوە دەدركێنێت.

ئەوەتا لە كەناڵە بانگخوازەكان و رادیۆكانیان و وتارو ئامۆژگارییەكانیاندا رۆژانە مێشكی گەنج و لاوەكانمان بە بیرۆكەیی بێهودەیی ئەم دنیاو خۆشگوزەرانی فیردەوسی ئەو دنیا پڕدەكەن و هانی دەدەن كە رێز بۆ هیچ بەهایەكی سەر زەوی دانەنێت و دیموكراتی و مافی ئافرەت و لێبوردەیی و پێكەوەژیانی ئاشتیانە و یەكتر قبوڵ كردن بە بیدعەی رۆژئاوا لە قەڵەم دەدەن و ئامادەی دەكەن بۆ كاری تیرۆریستی لەژێر پەردەی تێكۆشان بۆ چەسپاندنی بڕیارەكانی ئاسمان.

یەكێك لەو وڵات و هەرێمانەی كە مەترسی گەورەی سەرهەڵدانی لەمەودوای ئەو جۆرە رێكخراو و توندڕەوانەیە، هەرێمی كوردستانە، چونكە نە پرۆسەی دیموكراتی و نە تێگەیشتن لێی لەو ئاستەدایە كە رێگربێت لە چەكەرەی ئەو رەوتە توندڕەوانە، ئەگەرچی كوردستان بەوەش ناسراوە كە پێكەوەژیان و قبوڵ كردنی دیموكراتی تێدا لەچاو گەلانی ناوچەكەدا، تارادەیەك باشترە لەگەڵ ئەوەشدا ئەوەی لەم دواییەدا تێبینی دەكرێت رەوتی توندڕەوی بەڕادەیەكی ترسناك لە برەودایە. ئەوە نییە لە سلێمانی پایتەختی رۆشنبیری بەپێی رۆژنامەكان حەڤدە رەوتی سەلەفی جیا جیا وجودی هەیە، ئەمە جگە لە دەیان رەوتی ئاشكراو نهێنی كە دەبێتە سامانی داهاتووی داعش و بێچووەكانی لەمەودوا. بۆیە دەبێت هەرێم فریای خۆی بكەوێت و هەر لەئێستاوە كۆمەڵێك بڕیار بدات بۆ رێگری لە پەرەسەندنی ئەو رەوتانە كە لە سەروویانەوە پێویست دەكات بە گۆڕینی ناوەڕۆكی مەنهەجی وانەی ئایینی و لابردنی ئەو بڕگەو بابەتانەی كە بانگەشە بۆ توندوتیژی و توندڕەوی دەكەن.

ئەوەی لە میسری ئەمڕۆ دەكرێت ئاراستەیەكی باشە بۆ بەرەنگاری ئەو رەوتە توندڕەوانە كە هەرێم دەتوانێت سوودیان لێوەرگرێت، دەنا بەم شێوەیەی ئێستا بڕوات زۆر زەحمەتە جڵەوی ئەم رەوتە بگیرێت و فەرخە داعش بە بەردەوامی بەرهەم دەهێنرێت.