هاڕەی عێراقە دڵخوازەكەی گۆڕانخوازان

هاڕەی عێراقە دڵخوازەكەی گۆڕانخوازان
ئەوەی لە بەغدا ڕوودەدات، داڕووخانێكی نوێی دەوڵەتی عێراق نییە، هاڕەی قەوارەیەكی بەزۆر سەپێنراوە بەناوی عێراق. ئەو عێراقەی وینستۆن چەرچڵی سەرۆك وەزیرانی بەریتانیای مەزن لەبارەیەوە دەیگوت: لە چركەیەكی شێتایەتیدا ڕۆنراوە. ئەوەی ئێستێ دەگوزەرێت، هاتنەوە هۆش و بەردانی ئەو شێتایەتییەیە. مەعلوومە كە ئەمریكا و ئێران و ڕەنگە زۆر لایەنی تریش، بكەونەوە خۆیان تا ئەم هاڕەكردنەی عێراق بە دەوڵەت و داوودەزگەكانییەوە ڕاگرن، بەڵام، چونكە عێراق، سووڕی ژیانی خۆی تەواو كردووە، پێناچێت بەرگرتن لەو ڕووداوە حەتمییە لە توانای هیچیاندا بێت. تاكە ئەگەرێك كە دەبێت ئێمەی كوردستانی لەگەڵیدا بین ئەوەیە؛ ماڵجیاكردنەوەكە دوور بێت لە شەڕ و خوێنڕشتن. بەشدارییكردنی سەركردایەتی كوردستان لە هێوركردنەوەی ڕووداوەكان، مانای بەشدارییكردن نییە لە هەوڵەكانی ڕاگرتنی هاڕەكردنی عێراق و سەرلەنوێ بیناكردنەوەی عێراق. نەخێر، بۆ ئەوەیە، پرۆسەی جیابوونەوە و پارچەپارچەبوونی عێراق، بە هێمنی و قەناعەتی هەر سێ پێكهاتە تەواو بێت. هەروەك ئەمە، ویست و ئیرادەی ئەمریكا و زۆربەی كۆمەڵگەی نێودەوڵەتیشە. ئەوەی سەیرە، گۆڕانخوازێك كە دەمێكە بێدەنگە، لە باسی ڕووداوەكانی بەغدادا، دەڵێت بۆچی ڕاگەیەندنەكانی پارتی تانە لە گۆڕان دەدەن كە زۆر تەمای بە عێراق و بەغدا بووە، ئەم عێراقەی ئەمڕۆ وای بەسەرهاتووە، دروستكراوی خۆیانە، شكستەكەشی هی ئەوانە. جارێكی تر: ئەو گوتەیە چەند جوانە كە دەڵێت: ئەگەر شەرمت نەكرد چ دەكەی بكە. ئەم عێراقەی هاڕەی كرد، خۆی و سیستمە سیاسییەكەی، دڵخوازی گۆڕان و كۆمەڵ و بڕێك كەسی تر بوو. ئەوەی لە عێراقە دڵخوازەكەی گۆڕان و بەغدا نموونەییەكەی كۆمەڵی ئیسلامی ڕوودەدات، پێشبینیكراو و چاوەڕوانكراوە. تا نەڵێن حزبایەتی دەكات، باسی پێشبینییەكان و دەستشووشتنی پارتی و سەركردایەتییەكەی و پارتییەكان ناكەم لە عێراق، نەك ئێستێ بگرە چەند ساڵێكە، وەلێ، ئەوە ڕاستییەكەیەتی، گۆڕان و كۆمەڵی ئیسلامی و لێرە و لەوێش هێندێك كەسی تری لێ دەركەی، هەموو دنیا دەیانزانی، نە شتێك ماوە بەناوی دەوڵەتی عێراق، نە هیچ ئومێدیكیشیان بە داهاتووی ئەم دەوڵەتە دەستدرووە مابوو، نە ئێمەی كوردستانیش هەقە چیتر خۆمان بەم بەڵایەوە خەریك بكەین. چونكە گۆڕان و پاشكۆكانی، لە سیاسەتكردندا پشتیان بە فەرەزییەی (خەڵك سادەیە و زوو شتی بیر دەچێتەوە) بەستووە، ڕاستییەكەش، پێچەوانەی تێڕوانینی ئەوانە، خەڵكی كوردستان بیریان زۆر تیژە و وەك دەگوترێت: كاغەزی سپی دەخوێننەوە، بە ڕێكخەرەكەشیانەوە، زوو زوو لێیان دەقەومێت. وا دەزانن خەڵك بیری چووەتەوە هەموو جارێك كە ڕۆژنامەوانان لە سەرانی گۆڕانیان دەپرسی: چ جۆرە سیستمێكی سیاسیتان بۆ كوردستان دەوێت؟ دەمودەست بە دەنگێكی دلێر وەڵامیان دەدایەوە: سیستمی پەرلەمانی وەك بەغدا. هێندە شیرین دەیانگوت وەك بەغدا، شەكراو لە دەمیان دەچۆڕا. بەغداش ئەمەیە كە بینیمان. خۆ هەمووی دوو هەفتە لەمەوپێش بوو، عەلی باپیر بە بەغدا و عبادی و (چاكسازییەكان)یدا هەڵدەدا و ئەوەی دەیگوت نەیدەگوتەوە. ئەدی سەركردایەتی كوردستانی تۆمەتبار نەدەكرد كە گوایە بڕوبیانوو دێننەوە بۆ ئەوەی پشتیوانیی (چاكسازییەكان)ی عبادی نەكەن. خەڵك زۆر باشیان لەبیرە، هەرچی گۆڕانخوازەكان و هاوكارەكانیان هەبوو، سەرەڕای بڕینی قووتی خەڵك لە لایەن بەغداكەی مالیكی و عبادییەوە، دوو ساڵە هاوارهاواریانە كە گوایە خەتاكە هی بارزانی و حكوومەتی هەرێمی كوردستانە، نەك كاربەدەستانی بەغدا. ئەی كێ بوو، بۆ یەكلاییكردنەوەی كێشە نێوخۆییەكانی كوردستان، هەموو ڕۆژێك پەنای بۆ بەغدا و دادگای فیدرالی دەبرد؟ هەقە بۆ یەكەمین جاریش بێت، عێراقچییەكان، ئەوانەی لە تەلەڤیزیۆنەوە بانگەشەی سیستمێكی سیاسی (وەك بەغا)یان دەكرد، دان بە سەرچیخچوونی خۆیاندا بنێن و بۆ دواجار دەست لەو عێراقە هەڵگرن كە نەماوە.
Top