ئێمەو ناوچەكەو سیاسەتی نەفەسی درێژ

ئێمەو ناوچەكەو سیاسەتی نەفەسی درێژ
دیارە كە ئەمڕۆ بەبێ ویستی ئێمە و بەدەر لە دەسەڵاتی ئێمە، بارودۆخی ناوچەكە بە جۆرێك شێواوە، لەوە ناچێت لە هیچ سەردەمێكدا هاوكێشە سیاسییەكانی ئەم ناوچەیە هێندەی ئەمڕۆ ئاڵۆز و شێواو بووبن، جا ئەمەش دەرئەنجامی هەڵمەتی پشێوینانەوەی بنیاتنەرانە بێت، یان دەرهاوێشتەیەكی چاوەڕواننەكراو بووبێت، گرنگ ئەوەیە ئەم ناوچەیە روو لە گۆڕینی روخسارو ناوەڕۆكە، ئەم گۆڕانكارییەش راستە بە دەستی كورد نییە، بەڵام لەوانەیە بەدڵی كورد بێت، چونكە هەر گۆڕانكارییەك ئومێدی گەیشتنی زیاتری پێدەبەخشێت بۆ گەیشتن بەمافی زیاتر.
ئەوەی دەبینرێت ئەوەیە كە بەرەی ئەمریكا و ئەوروپا نەخشەیەك دەكێشن و، بەرەی رووسیا و چین نەخشەیەكی دی دەكێشن، عێراقیش كە پێكهاتەكانی بە شێوەیەكی ئاسۆیی لە نێو خۆدا دابەش بوون، بە هەمان شێوەش بە سەر ئەم دوو بەرەیەدا دابەش بوون و، هەر لایەكیشیان پشتگیریی لە یەكێك لەم نەخشانە دەكەن. كاتێكیش كە پێكدادانی بەرژەوەندییەكانی ئەم دوو بەرەیە بەرۆكی بەر ماڵی كورد دەگرێت، ئەوسا ناچار دەبێت كە بە ئاراستەیەك هەنگاو بنێیت و بێدەنگ نەبێت. بۆیە راستییان گوتووە كە زۆرجار لەوانەیە مێژوو هەمان سیاسەت بەرهەم بهێنێتەوە. رەنگە هەر لە بەر ئەمە بێت، شەڕی بەرژەوەندییەكانی ئەمڕۆی نێوان توركیا و ئێران هەر لە شەڕی نێوان دەوڵەتی عوسمانیی و سەفەوی بچێت، یان لە شەڕی نێوان رۆم و فارسی پێش زایینیش بچێت. كێشەكەش ئەوەیە كە ئەوە شەڕەكانی ئەوانە دێنە كوردستانەوە، نەك كوردستان چووبێتە شەڕەكانی ئەوانەوە، چونكە كوردستان زانیویەتی كە ئەگەر شەڕی فیلەكان لە سەر چیمەنی ئەودا بكرێت، ئەوا ئەوە كە زیانی لێدەكەوێت و چیمەنی ئەویشە كە دەپلیشێتەوە. بۆیە لێرەدا ئەوەی بۆ ئێمەی كورد گرنگە ئەوەیە كە :
یەكەم: یەكڕیزیی نەتەوەییمان بپارێزین، پێكەوە بین، لەیەكدی نزیك بین، كۆبین و پەرت نەبین، بۆ ئەمەش وا پێویست دەكات كە لە سەر ئاستەكانی هەر سێ سەرۆكایەتییەكەی هەرێم و سەرۆكایەتی حزبە كوردستانییەكاندا، بەرچاوڕوونییەك هەبێت سەبارەت بە ئاراستەی رووداوەكان و، خۆ دوور بگرین لە (ستراتیژیەتی دوودڵیی)و ئامانجی ژمارە یەكمان و یەكەم ئامانجی خۆمان دیار بكەین، هەوڵەكانیشمان لەپێناو گەیشتن بەو ئامانجە چڕ بكەینەوە، بە دۆزینەوەی رێگەیەك كە كەمترین زیانی هەبێت و، زۆرترین قازانجی بۆ كوردستان تێدا بێت .
دووەم: هەموومان وەك كوردستانییان پێكەوە خۆمان لە تای تەرازووی براوەدا بدۆزینەوەو، گرەو لەسەر ئەسپی دۆڕاو نەكەین و، بەپێچەوانەی ئاراستەی تەوژمی گۆڕانكارییە جیهانییەكەوە مەلە نەكەین، لەم پێناوەشدا بە جیاوازی رەنگەكانەوە دەتوانین چەپكە گوڵی خەبات و تێكۆشان دروست بكەین.
سێیەم: ئاگادار بین كە پرسی یەكڕیزیی نێوخۆیی فاكتەرێكی زۆر گرنگە بۆ بەرپەرچدانەوەی هەر هەوڵێكی نەیاران .
ئەزموونەكانی دوێنێ و راستییەكانی ئەمڕۆش هەر ئەوەمان پێدەڵێن كە سەركەوتنەكانمان لە یەكڕیزیماندا بوون، شكستەكانیشمان لە پەرتەوازەییماندا بوون. بۆیە ئێمەی كوردستانیی كە یەك خاك و یەك زمان كۆمان دەكەنەوە، جێگەی خۆیەتی كە یەك بەرژەوەندیی نیشتمانی و یەك ئامانجی نەتەوەییش كۆمان بكەنەوە.
ئەمڕۆ ئەوەی لای ئێمە گرنگە ئەوەیە كە لەم ململانێ سیاسییەدا نەفەسمان درێژ بێت، چونكە لەگەڵ تێپەڕبوونی كاتدا زیاتر و زیاتر بایەخی شوێن و پێگەی هەرێمی كوردستان بۆ ناوچەكەو جیهان دەردەكەوێت، كە هەرێمی كوردستان وەك بەشێكی خاوەن تایبەتمەندێتیی لەم عێراقەدا لە توانایدایە یاریزانێكی سیاسیی كارا بێت و، دەستیشی هەبێت لە دروستكردنی بەشێكی ئەو ئایندەیەی كە نەخشەی بۆدەكێشرێت لەناوچەكەدا، لەسەر بنەمای رێزگرتن لە سەروەریی و پاراستنی تایبەتمەندییەكانی یەكدی، ئاشتەوایی و بنیاتنانی ئایندەیەكی گەش بۆ كوردو كوردستان.
Top