بەر لەوەی هیچ كۆمێنتێ لە بارەی ئەو «پەرەسەندن»ەی لە میسر روویدا بدەم، ئاخاوتنێكی رەحمەتی مەسعود محەمەدم دێتەوە بیر كە بە وڵاتانی ئەم ناوچەو دەڤەرەی ئێمەی دەگوت: «جیهانی سەدو سێ» لە بری «جیهانی سێ». نكوڵی ناكرێ لەم وڵاتانەدا، دامودەزگای دەستووریی شەرعی و چاودێریی كارا و رێزگرتن لە رێسا و بنەماكانی بەناو گەمەی دیموكراتی، یان ئەوەتا لە حوكمی نەبووندان، یان ئەگەر هەشبن، رواڵەتی و ناچیزەو نابودو ناكاران. ئەو شێوەو ستایلەی حوكمڕانی پەراوێزێكی كەمی بۆ خەونی «دیموكراتیزەكردن و بە مەدەنیكردن»ی دەوڵەت و كۆمەڵگە هێشتۆتەوەو هەندەی چاو لەسەر «كەسایەتیی سەركردەكان»ە، نیو هەندە لەسەر «دامودەزگاكان» نییە. لەگەڵ ئەو، بەدبینییەی منیشدا، میللەت لە رەعیەتبوون دەرچووەو پرۆسەیەك دەستی پێكردووە...
محەمەد مۆرسی، بەربژێری پارتی ئازادی و دادپەروەری «تۆ بێژە ئیخوان» لە دوای سەركەوتنی راپەڕینی 25ی ینایەر، لە 24/6/2012 بە رێژەی (51.13%)ی ئەوانەی دەنگیان دابوو، بووە سەرۆك ((رێژەی دەنگدەران 49.7% بوو لە كۆی ئەوانەی مافی دەنگدانیان هەبوو))، لێ بە «كودەتای سەربازی» لە 3/7/2013، نەك وەك دەڵێن بە «مایەی خۆتێكردنی سوپا» لە سەر كورسیی حوكمڕانیی هێنرایە خوارێ.
شایەد، مۆرسی لە ماوەی (1) ساڵ حوكمڕانیی خۆیدا:
• بەڵێنە زۆرەكانی خۆی ((64 بەڵێن)) پێ نەبرابێتە سەر كە لە ساتەوەختی هەڵمەتی هەڵبژاردندا بە خەڵكی دابوون،
• هەڵەو پەڵەی گەورەی كردبێ و گوێی لە بەرەی عەلمانی و لیبراڵیی وڵاتەكەی رانەگرتبێ و دڵی هاوپەیمانەكانی خۆی شكاندبێ،
• بلەز هەوڵی «بەئیخوانكردن»ی دامودەزگاكانی دەوڵەتی دابێ و زۆر شایەدیی دیكەش،
راستە مۆرسی نەشیا، رێژەی كورتهێنانی بودجە (11.4%)، رێژەی بێكاری (13.2%)، رێژەی هەژاری و نەداری (25.2%) كەم بكاتەوە و هەنگاو بە ئاقاری چارەسەری گرفتەكانی نان و تەناهی و هاتوچۆ و نیشتەجێبوون و تەندروستی و پاك و خاوێنی... هەڵێنێتەوە، بەڵام پیاو هەق بڵێ، ساڵێكیش بۆ حوكمڕانیش پێوەر نییە!
راستە پرۆژە دەستوورێكی خستە راپرسییەوە كە قیبتییەكان و هێزە عەلمانی و لیبراڵەكان پێی نیگەران بوون، راستە دەستوور بە (63.8%)ی ئەوانەی دەنگیان دا، پەسندكرا، بەڵام (67%)ی ئەوانەی مافی دەنگدانیشیان هەبوو، نەچووبوونە راپرسییەكەوە، ئەوجا حیسابی خۆت بكە!
بەڵام كودەتا نەك هەر چارەسەر نییە، كارێكی تا بڵێی نامەدەنی و ئەنتی دیموكراسیشە. ئاخر ئەو كودەتا سەربازییە، گورزێكی پشتشكێنی لە پرۆسەی مەدەنی و دیموكراتی نەك هەر لە میسر، بەڵكە لە تەواوی رۆژهەڵاتی ناڤینیش دا.
راستە، بەتەنیا هەڵبژاردن رەوایی ناداتە هیچ رژێمێك و تاكە كۆڵەگەی دیموكراسی نییە، بەڵكە بنەماگەلێكی تریش هەن كە دەبێ هەر رژێمێك بۆ ئەوەی سەركەوتوو بێ و شەرعیەتی هەبێت، پێڕەوی لێ بكات، بەڵام هەڵەو چەوتییەكانی مۆرسی و ئیسلامی سیاسی نابنە پاساو بۆ هیچ كودەتایەكی سەربازی...من لێرەدا، شین بۆ مۆرسی و ئیسلامی سیاسی ناگێڕم. بەڵام تەنیا بۆ بەراوردو دەبل ستانداردی دنیای پێشكەوتوو، نموونەیەكی هاوشێوە لە نەوەتەكانی سەدەی رابردوو و لە جیهانی مەسیحینشیندا دێنمەوە. لە هایتی كە دەوڵەتێكی ئەمریكای خوارووە، لە (ئەیلوولی 1991)دا، سوپا كودەتای بەسەر سەرۆكی هەڵبژێردراودا كرد (جان برتران ئەرستید بە رێژەی 67% لە ئەیلوولی 1990 بە سەرۆكی هایتی هەڵبژێردرابوو، بۆ زانین ئەرستید، كاهینێكی كاتۆلیك مەزەب بوو). پاش كودەتاكە سەرۆكی كودەتا بەسەركراو بەناچاری هایتی جێهێشت و هەڵات. بەڵام ئەمریكا و ئەنجوومەنی ئاسایشی UN زوو بە زوو فشاریان خستە سەر كودەتاچییەكان. ئەمریكا لە سەردەمی بیل كلنتۆن دا، بەزەبری هێز سەرۆكی لەسەركارلادراوی گەڕاندەوە سەر كورسیی حوكمڕانی (لە ناوەڕاستی مانگی ئەیلوولی 1994)!
بەهەر حاڵ، بەگوێرەی قانوونی كارو كاردانەوە، زەبروزەنگ و توندوتیژی هەر كێ پیادەی بكات، زەبروزەنگ و توندوتیژیی بەرهەمهێناوەو بەرهەمدێنێ. خستنە دەریێ ئیسلامی سیاسی لە گەمەی دیموكراسی، رادیكاڵتری دەكات و ئیدی ناوچەكە بێ ئافات بێ!