ئێمە باوەڕمان بە ئازادی بیروڕایە، باوەڕمان بە جیاوازی رەنگ و دەنگ و باگراوەند و بیركردنەوە و تەنانەت دین و فكریشە، باوەڕمان بەهەموو جۆرەكانی تری ئازادییە، هەروەك باوەڕیشمان بەوەیە سنووری ئازادییەكان لەو جێگەیەدا تەواو ئەبێت كە ئازادی ئەوانیتر دەستپێدەكات، جگەلەوە باوەڕیشمان بەوەشە كە نابێت بەناوی ئازادی خۆمانەوە زیان بەوانیتر بگەیەنین. بەتایبەت باوەرمان بەوە كە سیستەمێكی سیكولاریزم كە جێگە هەموو بیروبۆچوون و دین و رەنگەكانی تیادەبێتەوە، تەنها چارەسەرە بۆ ئەم سەردەمی كرانەوە و دنیا بینیە فراوانەی تاكەكانە كە خەون بە كۆمەڵگایەكی بەختەوەر و ئازاد و دیموكراسیەوە دەبینن، بەڵام پرسیاری گرنگ ئەوەیە ئایا ئێوەش وان؟ ئایا ئێوەش بەهەمان شێوە باوەڕتان وایە كە سنوری ئازادیەكانتان لەویا تەواو دەبێت كە ئازادیەكانی ئێمە دەستپێدەكات؟ باوەڕتان بە دەنگ و رەنگ و بیروبۆچوون و دین و فیكری جیاوازی ئێمە هەیە؟ ئاخر ئازادی پرۆسەیەكی یەكلایەنە نییە، هەروەك دیموكراسی پرۆسەیەكی بیردۆزی نییە.
گوایا مەلایەكی خەڵكی هەولێر بڕیاریداوە بەبێ بەرانبەر ژن لەو پیاوانە مارە بكات كە ژنی دووەم و سێهەم و چوارەم دەهێننەوە، ئەمەش بوەتە هۆی نیگەرانیەكی زۆر لەناو خوێنەر و چالاكوانەكان و بەتایبەت لە پەرلەمان، گوایا هاژە سلێمانی پەرلەمانتاریش بەنیازە بەپێشێلكردنی یاسا ناودەبات و بەنیازە بەدواداچوونی یاسایی بۆ بكات.
تەنانەت لەسەر تۆڕی كۆمەڵایەتی فەیسبوك خەڵكێكی زۆر دژی قسەی مەلاكەن و هەریەكە لەگۆشەنیگای خۆیەوە ئەو هەڵوێستەی ئەو مەلایە بە ناشارستانی و نابەجێ و دژی بنەماكانی مافی مرۆڤ و بەتایبەت مافی ژن لێكدەدەنەوە. لە كاتێكدا من رایەكی تەواو جیاوازم هەیە، ئەویش ئەوەیە با رێگە بدەین ئەوانە قسە بكەن، ئەوانە رای خۆیان بڵێن، هەتا ئەو سنوورەی كە رادەردەبڕن، لانیكەم لایەنێكی پۆزەتیفی هەیە، ئەویش ئەوەیە تێبگەن كە كەشوهەوای ئازادی چەند تەندروست و خۆشە، كە تۆ بتوانیت وا ئازادانە گوزارشت لە راكانی خۆت بكەیت، بۆ ئەوەی فێریش بن كە ئەوانیش هەمان ماف بەبەرانبەرەكانیان بدەن. ئێ خۆ ئەو مەلایە نەیگوتووە بەزۆر دەچم ژنەكان لە پیاوەكان سەربەهەوێ مارەدەكەمەوە، نەیگوتووە ئەوەی ئەوەنەكات بە شمشێر ملی ئەپەڕێنین، خۆ نەشیگوتووە هەر ژنێك رازی نەبوو سەربەهەوێ شووبكاتەوە ئەیكوژین.
ئینجا ئەو خاتوونە پەرلەمانتارەی دەیەوێت بەدواداچوون بۆ قسەكانی ئەو مەلایە بكات، با بیكات، بەڵام ئەگەر وابوو و ئەو قسانەی كردبوو خۆ بە هیچ یاسایەك ناچێتە ژێر خانەی توندوتیژییەوە، چونكە قسەیە و كردوویەتی و وەكوو وتم ئێمە قسە لە ئازادییەكان و كەشوهەوای دیموكراسی و كۆمەڵگایەكی سیكولاریزم دەكەین، ناتوانێت بەهیچ یاسایەك حوكمی بدات، ئەگەر بە یاسای قەدەغەكردنی فرەژنی لێی ئەچێتە پێشێ، ئەوەنەی من بزانم ئەو یاسایە هیچ سزایەكی نەبڕێوەتەوە بۆ كەسێك یان مەلایەك ئەگەر خۆبەخشانە راگەیەنێت بەبێ بەرانبەر ژنی دوەم و سێهەم و چوارەم لە پیاوەكان ماربەكاتەوە.
بەڵام من دەپرسم: ئایا كێشەی كۆمەڵگای كوردی تەنها ئەو مەلایەیە كە ئەو قسەیەی كردووە؟ ئایا كێشەی ئێمە لەگەڵ ئەو ژنانەدایە كە لەچك لەسەر ئەكەن؟ یان كێشەی ئێمە زۆر لەوە گەورەترە؟ كێشەی كۆمەڵگای كوردی كێشەی نەبوونی هوشیاریە، هوشیاریەك كە وا لە ژن بكات خۆی هەست بە ئینسانیەتی خۆی بكات و رازی نەبێت سەربەهەوێ شووبكاتەوە و، كێشەی ژنانێكە رازی نەبن هەوێیان بەسەر بێتەوە. كێشەكە كێشە ژنانێكە كە تەلاق دەدرێن وەكوو ئادەمیزاد حسابیان بۆ بكرێت و سووك سەیرنەكرێن، كێشەی كۆمەڵگایەكە بەچاوی رێزەوە لە كچی سەڵت بڕوانێت كە تەمەنێكی تێپەڕاندووە و هێشتا شووی نەكردووە و بە (قەیرە) ناوی نەبەن و هەموو پیاوانی عەشرەت لێی نەبن بە خاوەن.
كێشەی كۆمەڵگای ئێمە چەند لە هوشیاریدایە ئەوەندە لە یاسادایە، ئەوەندەی تریش لە كەمتەرخەمی رێكخراوەكانی ژناندایە كە بەس ئازان حزبایەتی بكەن و رۆژی ژنان جلی باق و بریق لەبەر بكەن و خیتابەكان بۆ حزبیە پیاوەكان بخوێننەوە و بەشان باهوویانا هەڵدەن بۆ ئەوەی شتێ بودجەی زیاتریان بدەنێ.
كێشەی ئێمە لەوەدایە ژن خاوەن كەسایەتی خۆی نییە و هیچ لایەن و دەزگایەكی پسپۆر و تایەبتمەندمان نیە ژن وەكوو مرۆڤ لەناو كۆمەڵگادا تەئهیل بكات و بیكاتە كائنێكی بریاردەر و بەهێز توانای رووبەرووبوونەوەی كۆمەڵگای هەبێت و توانای داكۆكیكردنی هەبێت لەخۆی لە كاتی پێویستدا.
خاتوو هاژە ئەگەر راستدەكات، با لەپەرلەماندا پرژەیەك پێشكەش بكات بۆ دەسكاریكردنی یاسای بەدەوڵەتكردنی دامەزراوە و رێكخراوەكانی ژنان و ئافرەتان و بزانم ئەتوانێت لەژێر یەك چەترا كۆیانكاتەوە و ئیشیان پێبكات؟
كێشەی كۆمەڵگای كوردی ئەوەندەی لەگەڵ دواكەوتوویی و داخراوی و دابونەریت و عورفی كۆمەڵایەتی كۆنەپەرستدایە، ئەوەندە و زیاتریش لەگەڵ ئەو بەناو هەڵگرانی بیری پێشكەوتووخواز و عیلمانیانەی بانگەشە بۆ كۆمەڵگایەكی سیكولاریزم و ئازاد دەكەن كە هەتا سەر ئێسقان خۆیان بە (فێمینیزم) دەزانن كەچی لە هاتوهاوار زیاتر هیچی تریان نەكردووە و بەردێكیان نەخستۆتە سەر بەردێك.
هەڵبەتە نەشیاوە كە وا بەرەهایی ئەنوسم، بەڵام ئێمە زیاتر باس لە حاڵەتە زەقەكە و زۆرینەكە دەكەین. هەتا ئیستا چەند ٍشیكاری زانستی كراوە بۆ لێكۆڵینەوە لە هۆكارەكانی ئەوەی ئایا پیاو لە كۆمەڵگای كوردیدا بۆچی ئەوەندە مەیلی زەبر و زەنگ و چەوساندنەوە بێئرادەكردنی رەگەزی بەرانبەری هەیە؟ هەتا ئیستا چ لێكۆڵینەوەیەك كراوە سەبارەت بەوەی بۆچی سیاسەتمەداری كورد ئەوەندە كەمتەرخەمە لە ئاست كێشە كۆمەڵایەتیەكان و بەتایبەت پرسی ژن و ئامادەیە هەموو شتێك بكاتە قوربانی دەسكەوتی پارە و بازرگانیكردن. ئایا چ لێكۆڵینەوەیەك كراوە لەوەی ئایا بۆچی هەتا ئیستا رێكخراوەكانی ژنان و ئافرتان دژایەتی یەكتر دەكەن و رازی نین پێكەوە لەژێر یەك چەتردا ئیش بكەن؟ چ بەدواداچوون و شرۆڤەیەك كراوە لەبارەی ئەوەی بۆچی ژنی كورد ئەوەندە خەنی و خۆشبەختە بەوەی بەوجۆرە مامەڵەی لەگەڵ دەكرێ و وەكوو دیكۆر و جوانكاری بونەتە بووكەشووشەی دەستی حزبەكان بە ئارەزووی خۆیان دایان دەنێن و لایان دەبەن؟ ئەی بۆ دراسەیەك ناكەن لەبارەی ئەوەی بواری پەروەردە لە وڵاتی ئێمەدا هێند لەدواوەیە و هەتا ئیستاش كوڕ چەقی خێزانە و لایەنە بەهێزەكەی هاوكێشە خێزانیەكەیە و كچیش هەمیشە بوونەوەرە بێئیرادەكراو و ماف زەوتكراوەكەیە؟
بەهەرحاڵ كابرایەكی وەكوو ئەو مەلایە بۆ قسە نەكات، لە كۆمەڵگایەكی وەكوو كۆمەڵگای ئێمەدا كە ئەو هەموو سەقەتی و ناتەواوی و خواروخێچیە هەیە، ئەویش خەڵكی خۆی هەیە گوێی لێبگرێ و بەقسەشی بكات، بەس با ئێمە تەنها ئەو و نمونەكانی ئەو بەرپرس نەكەین، با كەمێك خۆشمان بەرپرس بكەین.