ئەو گەراجەی (خۆجێیەتی) دراوسێمان، هەر سەردەمەو ئەركێكی لە ئەستۆ دەنرا، سەرەتا، خوێندنی ئامادەیی پیشەسازی و پاشان گەنجینەو گەراجی خۆجێیەتی، پاش شۆڕشی (14)ی گەلاوێژ، (دیلان) لەوێ كارمەند بوو، هەر لەو شوێنەش كەژاوەی ئاهەنگی بۆنەكان، بەتایبەتی (14)ی گەلاوێژ درووست دەكراو هونەرمەندی پێشەنگ (جەمال بەختیار) وێنەی (عەبدولكەریم قاسم) و سەركەژاوەكانی دەكرد، ئێمەش بەدیارییەوە رادەوەستاین و بە حەپەسان و سەرسووڕمانەوە، لە دەست و فڵچەكەیمان دەڕوانی، ژوورو بەر هەیوانەكەی (جوبرائیل تۆما) كە لێپرسراوی شوێنەكە بوو، ئەركی ستۆدیۆی دەبینی. پاش ماوەیەك بۆ یەكەمجار (پاس)ی گواستنەوەی ناو شار هاتە ئاراوە، ئیدی باس باسی پاسەكان بوو، هەندێ پێیان دەگوت (ئەمانە) لەبەر ئەوەی لە بەغدا سەر بە (امانة العاصمة) بوو، گوێم لە كەسانێك دەبوو، ئەمەش نەكەن بە پاسەكانی جەژن و تەپڵی پێ لێدەن و (لە خڕەی نێڕی نێڕی) تێدا بڵێنەوە، یان (ئەم بەر ئەو بەرە ناسكە دولبەرە). بە ناوشارا دەیانگێڕان و خەڵكی وەك گەشت و سەیران سواری دەبوون ئیدی بەپێی شەقامە سەرەكییەكانی ئەو سەردەمەی شار، وێستگەی وەستانی پاسەكانیان دیاری كردبوو.
ئەوەش هەزارو یەك كێشەو حەقایەتی لێكەوتەوە، یەكێك لەوانە، لەبەر دەمی دوكانی (ئەحە دێرەی خواروی سابونكەران، تەنیشت دوكانی (شمقار) و (كەریمە ڕەش)، خۆی پیاوێكی تا بڵێین دەمارگیر بوو، دوكانێكی سێ گۆشەی یەك مەترونیو دەبوو دوو سێ سەبەتەی بێ رزق و، وێنەیەكی جوانی شێخی نەمر، كە بەرامبەر خۆی هەڵواسرابوو، زۆر جاریش (شێخ لەتیفی حەفید) سەردانی دەكردو تەنیا ئەو كورسییە دارینەییەی شكی دەبرد بۆی دادەنا، خۆشەویستی بوو، لە دوورەوە دەزانرا ئەوە كاكە شێخە، چونكە ئۆتۆمبیلەكەی جیاواز بوو، ژمارەشی (1) سلێمانی بوو، هەمووان كە بەلایدا رادەبووردن هەستێكی تایبەتیان بۆی هەبوو هەرچۆن یادگاریی هەرە ئازیزی شێخی نەمر بوو، زۆر كەس دەیپرسی: ئەوە چۆنە شێخ سەردانی ئەو كابرایە دەكات؟ بەڵام ئەوانەی شێخیان دەناسی، دەیانزانی حیكمەتی ئەو بەسەركردنەوەیە چییە.
بەهەرحاڵ ئەم پاس هاتنەی شار، بوو بە دەردو بەڵا بۆ ئەو دوكاندارە هەژارەی، خۆی لەخۆیدا نەبوو، ئەمەشی هاتە سەر، هەر خەڵك بوو، پەیتا پەیتا، لێیان دەپرسی : ئەرێ خاڵە، پاسەكە نەهاتووە ؟ دەمێكە رابوردووە ؟ ئەی كەی دەگاتە ئێرە ؟ ...
پاش ماوەیە پردی تەحەموولی پسا، تووڕە دەبوو، نەخێر جنێوی دەدا، تا گەیشتە ئەوەی، كیلۆو ئیزرەم و حۆقەو تای تەرازوی بۆ هەڵدەدان . ناچار لەداخی پاس سەری خۆی هەڵگرت و چووە شاری بەغدا، لەوێش گەڕ گەڕ، لەكۆڵانێكی تەنیشت گازینۆ (كندی) سەر شەقامی (جمهوری) دوكانۆچكەیەكی گرتبوو، دووبارە وێنەكەی شێخی نەمری لە ژووری سەری دانابوو، ئەو گازینۆو گەڕەكەشی شوێنی كوردان بوو، بەتایبەتی كوڕو كاڵانی سلێمانی، لەوێش سەیر لەوەدا بوو نەك پاس، پایسكیلیش بەو كۆڵانەدا نەدەچوو تومەس لالە تووڕەكەی خۆمان، بەو تووڕەكردنە راهاتبوو، بۆیە لەو بەغدا بەرینەدا ئەو شوێنەی هەڵبژاردبوو لەویش وەك سلێمانی سەریان دەكردە سەری.
هەر بەو بۆنەیەوە گەراجەكەی دراوسێمان، كرایە گەراجی پاسەكان، شەوێكیان درەنگ وەختان بوو بەهەراو دەنگە دەنگ : ئادەی پێوەی نێ، بیگرن، رانەكا ... گەورەو بچووكی مەملەكەتەكە بەئاگا هاتن، زانرا: هاتوون پاسەكان بسوتێنن، بۆ بەیانی كەوتنە گرتنی چەند عەرەبانچییەك. دیارە گومانیان لێ كردوون، لەبەرئەوەی هەبوونی ئەو پاسانە، واتە نانبڕینی ئەو كەسانە، بەراستی لەو كات و تەمەنەدا هەستم بەكوێرەوەری ئەو دە پانزە خێزانە هەژارە نەدەكرد. هەتا ساڵی (1971) لەشاری بەغدا، لە شانۆی (بەغداد) لەلایەن تیپی هونەری نوێوە، شانۆی (الشریعةآ)ی (یوسف ئەلعانی) نمایشكرا، باسی لە گرفتی بەلەمەوانەكانی رووباری (دیجلة) دەكرد كە كاریان گواستنەوەی خەڵكی ئەم بەرو ئەوبەری رووبارەكە بوو، واتە بەری (كەرخ) و بەری (رەسافە)، بەڵام درووست كردنی پردی نێوان ئەم بەرو ئەوبەر، بۆ خەڵكی پیت و فەڕ بوو، بۆ ئەوانیش نانبڕین و كوێرەوەری، هەر لەكاتی نواندنەكەدا، روخساری بەلەمەوانە كڵۆڵەكانی سەر شانۆم لێ بووە رووخساری عەرەبانچییەكانی ئەو رۆژانەی شارەكەم، ئەمجارە كاردانەوەی شانۆییەكە بۆ من دوو ئەوەندەی هەموو بینەرانی ناو هۆڵەكە بوو، منیش لەتەك (سامی عەبدولحەمید)ی ئەكتەری كەسایەتیی ئەو بەلەمەوانەدا، بەكوڵ گریام، بەتایبەت لەو ساتەدا، كە هەواڵی پێ درا منداڵیان بوو، ئەو منداڵەی كە بەكامی دڵ عەزرەتخوازی هاتنی بوو، كە بیستی بەلەمەوان لەخۆشیاندا خەریك بوو شامەرگ بێ، بەڵام كە بیری لە ئایندەی بێ نانی خۆیان كردووە، دایە پڕمەی گریان.. لەولاشەوە (عەبودی) چڕتی بێ هودەیی لێ دەدا.