لە سەرەتاوە، بۆ ئەوەی بە هەڵە لێم تێنەگەن، پڕ بە دەمم هاوار دەكەم و دەڵێم «لەگەڵ داواكردن و دابینكردنی هەموو داواكارییە ڕەواكاندام و بە بۆچوونی من ئەوانەی رێگا لە دابینكردنی داواكارییە ڕەواكان دەگرن و مافی خەڵكان زەوت دەكەن كەسانی ستەمكار و بێ ویژدانن، بێ گومانم، زوو بێت یان درەنگ، دەكەونە بەر لێپرسراویەتی مێژوو كە هەرگیز دلۆڤان نابێت لە گەڵیان».
هەرچی تایبەتە بە «داواكارییە ناڕەواكان» كە بابەتی ئەم وتارەیە، بە بۆچوونی ئێمە، بریتین لە هەموو ئەو داواكاریانەی كە:
- بەشێك نین لە مافەكان، واتە داوای شتێك دەكرێت كە مافی داواكار نییە.
- دژ بە یاساو ڕێنماییە كارپێكراوەكانە، واتە داوای هەڵاوێردی دەكەن لە یاساو ڕێنماییەكان بۆ بەدەستهێنانی بەرژەوەندییە تایبەتییەكان.
- رەچاوی بارودۆخی دابینكردنیان نەكراوە، واتە رەچاوی تواناوكاتی گونجاو بۆ دابینكردنیان نەكراوە.
ئەم «داواكارییە ناڕەوا» یانە لە كۆمەڵگای ئێمەدا زۆرن و زێدەڕۆیی ناكەین گەر بڵێین: ئەوەندەی گوێبیستی«داواكاری ناڕەوا» دەبین ئەوەندە گوێمان لەداواكارییە رەواكان نابێت.
جێگای خۆیەتی پرسیار بكەین :
- كێن ئەوانەی ئەم جۆرە داواكاریانەیان هەیە ؟
- ئەو هۆكارانە چین كە هانی خەڵكانێك دەدەن داوای «داواكاری ناڕەوا» بكەن ؟.
بۆ وەڵامی ئەم پرسیارانە دەڵێین :
خاوەنی ئەم جۆرە داواكاریانە لە هەموو شوێنێكی ئەم كوردستانەو لە نێو هەموو چین و توێژێكی كۆمەڵگاكەماندا بوونیان هەیەو بەدی دەكرێن واتە تایبەت نین بە ناوچەیەك یان چین و توێژێكی دیاریكراو.
هەرچی تایبەتە بەو هۆكارانەی كە هانی خەڵكانێك دەدات داوای «داواكاری ناڕەوا» بكەن بریتین لە:
- لاوازی هەستی نەتەوایەتی و نیشتمان پەروەری و بیركردنەوە تەنیا لە بەرژەوەندییە تایبەتییەكان و لە بیركردنی بەرژەوەندییە گشتییەكان .
- دابەش نەكردنی پلەو پایەو سامان بە شێوەیەكی دادپەروەرانەو بە پشتبەستن بە لێهاتوویی تاكەكان، كە لەلایەك دەبێتە مایەی هەست بەستەم كردن لای زۆرینەی خەڵك و لە لایەكی تر، بە پشت بەستن بە پرەنسیپی، «بۆ ئەوان رەوایە ببنە خاوەن ماف و جیاوكێك كە شایستەی نین بۆ بۆ من نا» داوای داواكاری ناڕەوا دەكرێت .
- وەڵامدانەوەی پۆزیتیڤی( ئەرێنی) «داواكارییە ناڕەواكان» لە زۆر كات و باردا لەبەر هەر هۆكارێك بێت .
- پەیڕەونەكردنی پرەنسیپی سزادانی ئەوانەی كە لە كاتی داواكارییە ناڕەواكاندا زیان بە بەرژەوەندییە گشتییەكان دەگەیەنن .
داواكارییە ناڕەواكان دیاردەیەكی قێزەون و زیان بەخشن بە كۆمەڵگاو نیشتمان بە شێوەیەك كە دەكرێت بڵێین : چەند وەڵامدانەوەی ئەرێنی داواكارییە رەواكان و دابینكردنیان كارێكی بە سوودە و لە بەرژەوەندی كۆمەڵگا و نیشتماندایە و هەنگاوێكی گرنگی دابینكردنی «دادپەروەری»یە لە كۆمەڵگادا، كە ئامانجێكی سەرەكی پرۆسەی چاكسازییە، هەندەو بگرە زیاتریش پشتگیری كردن لە داواكارییە ناڕەواكان، بە هەر پاساوێك بێت، زیان بە كۆمەڵگا دەگەیەنێت .
ئەوەی جێگای سەرنج و سەرسوڕمانە كەم نین ئەو میدیایانەی لە بری ئەوەی ئەم دیاردە قێزەون و زیان بەخشە ڕیسوا و مەحكوم بكەن،یان بە لایەنی كەم پشت گوێی بخەن و بایەخی پێ نەدەن، دەیكەنە بابەتی سەرەكی كارەكانیان و رووی كامێراكانیان لە داواكەرانی داواكارییە ناڕەواكان دەكەن و دەبنە پارێزەرانیان راستەوخۆ و ناڕاستەوخۆ بەرگرییان لێ دەكەن. ئەو میدیایانە بەم كارەیان،بیانەوێت یان نا، دەبنە هۆكارێك بۆ هاندانی خەڵك بۆ داواكردنی داواكاری ناڕەوا واتە دەبنە رێگر لەبەردەم دابینكردنی«دادپەروەری» لە كۆمەڵگادا .
چۆن ناتوانین پرۆسەی «چاكسازی» ئەنجام بدەین بێ ئەوەی وەڵامی ئەرێنیمان هەبێت بۆ «داواكارییە رەواكان» ی جەماوەری خەڵك بە هەمان شێوە پرۆسەی «چاكسازی» سەركەوتنی خوازراو بەدەست ناهێنێت بێ رووبەڕوبوونەوەی داواكارییە ناڕەواكان و وەرگرتنی هەڵوێستی یەكلاكەرەوە بەرامبەریان. هەرچی تایبەتە بە دیاریكردنی كاتی وەرگرتنی هەڵوێستی یەكلاكەرەوە بەرامبەر داواكارییە ناڕەواكان ئێمە لەو بڕوایەداین كاتی رووبەڕوبوونەوە هاتووە ئەمڕۆ پێش سبەینێ چاكترە .
نموونەكانی داواكارییە ناڕەواكان لە كۆمەڵگای ئێمەدا زۆرن و جیاكردنەوەیان لە داواكارییە رەواكان كارێكی گران نییە، بە تایبەتی بۆ ئەوانەی لە میدیاكاندا كار دەكەن، بۆیە داواكارین لەوان و لە لایەنەكانی تر هەموو توانایان تەرخان بكەن بۆ پشـــــتگیری كــــردن لەداواكارییە رەواكان و نەفرەت كردن لە داواكارییە ناڕەواكان.