پیاوێكی ناسیاومان لەپێنج ژن كەیەكێكیان كۆچی دوایی كردوەو لەیەكێك جیابۆتەوەو، ئێستا سیانی هەیە، لەهەر پێنجیان 19 نۆزدە منداڵی هەیە، هەرسێ ژنەكە و هەر 19 منداڵەكەی بە كوڕ و كچ و زاوا و بوك و منداڵەكانیانەوە بەپێی سیستەمێكی عەشایەری هەموویان لەدوو باڵەخانەی گەلێ گەورەدا دەژین. كەدەچیتە ماڵیان لەهەموو رەنگ و ئاڕاستەیەكی حزبی و سیاسی تێدایە، لەئەوپەڕی چەپەوە بۆ ئەوپەڕی ڕاست، لە دینیەكی كۆنسەرڤاتیڤەوە بۆ عیلمانییەكی ئێجگار كراوە، ل ئازادیخوازەوە بۆ توندڕەوێكی كەللەپوت، ئیتر لەسەوز و زەرد و مۆر و شین و سوورەوە. تاد..
ئەم پیاوە دەڵێ: «لەوەتەی ئەو بارودۆخەی كوردستان وا تێكچوەو، لەوەتەی خۆپیشاندانەكەی بەردەركی سەرا دەستی پێكردووە، ماڵەكەی منیش بووەتە بەردەركی سەرایەك»، لەماڵەكەیدا باری نائاسایی ڕاگەیەنراوەو، بەردەوام لەقەیرانێكی ژیانیی سەختدا دەژین و، ئەگەری هەڵگیرسانی یەكەمین پریشكی شەڕی ئەهلی ئەوە لەماڵەكەی ئەوەوە سەرهەڵدات. هەروەها دەڵێ: یەكێك لە هۆكاری قەیرانەكە ئەوەیە كوڕی هەیە كە لە حزبەكەیدا كەیەكێك لەحزبەكانی دەسەڵاتە دژایەتی دەكرێت چونكە براكەی تری لایەنگیری بزوتنەوەی گۆڕان دەكات، كوڕێكی تری نێردراوەتەوە ماڵەوە و پێی وتراوە بڕۆ ئیسراحەت بكە و مانگانە وەرە مووچەكەت وەربگرە.
چیرۆكی ئەم پیاوە چیرۆك و بەسەرهاتەكانی رۆژگارەكانی سەردەمی براكوژی وەبیرهێنامەوە، ئەودەمی كەسانێك ناویان نابوو شەڕی براكوژی، هەندێك شەڕی ناوخۆ، بەڵام بەلای منەوە ناوی شەڕی براكوژی گونجاوتریان بوو، ئەو دەمە واماندەزانی شەڕ و كوشتنی براكان و دواتر رێكەوتنە ستراتیژیەكەی نێوان حزبەكان كەمێك لە كێشەكانی نێوانیانی بەلاداخست. بەڵام پرسیاری گرنگ لە ئێستادا ئەوەیە ئایا ئەوەی ئەمڕۆ روودەدات چی كۆتایی پێدەهێنێت؟ ئایا دەبێ جارێكی تر براكان رووی تفەنگەكان بكەنەوە سینگی یەكتر، یان دەبێت بەجیددی بیر لە چارەسەرێكی ڕیشەیی بكرێتەوە؟
ئێستا زۆربەمان تێدەگەین لەوەی كە رێكەوتنە ستراتیژیەكەی نێوان یەكێتی و پارتی تەنیا رێكەوتنێك بوو لەسەر ئالیەتێك بۆ دابەشكردنی دەسەڵات، نەك رێكەوتنێك بۆ چۆنیەتی ئاشتكردنەوەی خەڵكی سەر جادە و میللەتێك كە گرانترین باجی داوە بەدرێژایی مێژوو.
ئەمڕۆ كەڕۆژی هەینیەو ئەم وتارە دەنووسم بۆ 44 ڕۆژەمینە كە خەڵك دەچنەوە بۆبەردەركی سەرا، هەرئەمڕۆ ئێوارە تەقەیەكی زۆر بەسەر جەماوەری خۆپیشاندەران كراوە، دوێنێش پێنج شەممە 31ی مارت لە كەلار خەڵك تێكهەڵكێشی ناوخۆپیشاندران كراون بۆ ئەوەی هێڕش بەرنە سەر ئەندام پەرلەمانێكی گۆڕان و بەچەقۆ برینداری بكەن.
ئەمجارەیان حكومەتی هەرێمی كوردستان و هێزە سیاسیەكان دەبێت لەوە جیددی تر لەو مەسەلەیە بڕوانن، چونكە زۆر لەوەگەورەتر و هەستیارتر و مەترسیدارترە كەوا خەمساردانە مامەڵەی لەگەڵدا دەكەن. بەشبەحاڵی خۆم هەفتانە كە دەمەوێت وتارەكانم بنووسم ناتوانم لەبارەی هیچ باسێكی ترەوە بنووسم، چونكە ئەم قەیرانە نەك تەنیا هزری من، بەڵكو هزری هەموومانی داگیركردوە.
دەبێت ئەمجارەیان هێزە سیاسیەكان راستەوخۆ بەرانبەر بەجەماوەر بوەستن و لەگەڵ ئەوان دانوستان بكەن، دەبێت لەگەڵ ئەوان رێكەون و پێمان بڵێن چی بكرێت باشە. هەروەك ئاگادارن خۆپیشاندەران داوای ڕووخانی دەسەڵاتێك ناكەن، بەڵكوو داوای ڕووخانی سیستەمێكی گەندەڵ دەكەن، رەنگە لەڕووی لۆژیكەوە ڕووخانی دەسەڵاتەكە لە گۆڕینی سیستەمەكە ئاسانتر بێت، بەڵام ئەمجارە تۆپەكە لەبەرپێی دەسەڵاتدایە و واپێویست دەكات چارەسەری دووەم هەڵبژێرێت و ئەركە گرانەكە بەجێ بهێنێت كە گۆڕینی سیستەمەكەیە، ئەمجارە دەبێت رێكەوتنە ستراتیژیەكە لەگەڵ جەماوەردا مۆر بكات نەك لەنێوان خۆیاندا..