ئەو بەیاننامەیەی لەلایەن بزووتنەوەی گۆڕانەوە لە 29/1/2011دا بڵاوكراوەتەوە، لەناوەندی كۆمەڵگەی كوردستانی و هێزە سیاسییەكاندا مشتومڕی چڕو زۆری لێكەوتۆتەوە، بەندەش وەك خوێنەر و بەدواداچووییەكی ئەو بەیاننامەیەی كە لە ڕۆژنامە و كەناڵە ئاسمانیەكانەوە پەخش و بڵاوكرایەوە، پێم باشبوو، وەك ئەركی كوردانەی كوردێكی بەشی خۆرئاوای كوردستانەوە بیروبۆچوونی خۆم لەم بوارەدا بەشێوەیەك لە شێوەكان و دوور لە باكگراوەندی سیاسیمەوە (كەشانازی پێوە دەكەم) بخەمەڕوو، هەروەها بەشێوەیەكی دوور لەبەكارهێنانی وشە و واتای سیاسی باوی ڕۆژانە كە لەناو ڕاگەیاندنەكانەوە بڵاودەكرێنەوەو بێ ئەوەی من ببمە لایەنگری ئەو وشە و واتایانەی وتراون و دەوترێن،چونكە من وتەبێژێك نیم بەناوی كەسانی دیكەوە قسان بكەم، یا بەرگری لە سیاسەتی كەسانی دیكە بكەم.
ئەم بەیاننامەیە بەپێی دیباجە و بڕگەكانی بەتایبەتیش لە بڕگەكانی (1،3،4،5،7) دا بانگەوازێكی ڕوون و هاندانێكی ئاشكرایە بۆ ڕاگەیاندنی ڕاپەڕینێكی میللی لەدژی هەموو دامودەزگا شەرعییەكانی كە لە كوردستاندا دروست بوون، ئەمەش بەچاولێكەری ئەو ڕووداوانەی لە ڕاپەڕینی تونس و میسردا ڕوویانداوە.
لەم ڕووەوە ناكەومە ناو وەڵامدانەوە و جەدەلیەتی ڕەوایی بوون و بێنەو بەردەو دروستییەتی ناوەڕۆكی بەیانەكەوە، لە بڕوای تەواومەوە بە ئازادی بیروڕا و ڕێزگرتنی ڕای بەرامبەر، ئەو شێوازی چەند و چوونە بەكارناهێنم، چونكە هیچ كەسێك ڕەهایانە سەكۆی حەقیقەتی لا نییە، بەڵام لەسەر شێواز و میكانیزمی ئەو داوایانەی سەركردایەتی گۆڕان هەڵوەستە دەكەم كە داخۆ چەندیان ڕەوان و بە ئەنجامدانیان گەلی كوردستان ژیانێكی ئازاد و پڕ عەدالەت و داهاتوویەكی پڕشنگدارو بژێوی خۆشگوزەرانی لە هەموو بوارەكاندا بۆ مسۆگەر دەبێت یان نا ؟ پێش ئەوەی لەسەر بڕگەكانی ئەو بەیاننامەیە ڕای خۆم دەرببڕم، پرسیارێكی ڕەوا لە سەركردایەتی گۆڕان دەكەم، هیوام وایە وەڵامێكی ڕوونیان هەبێت و ڕاشكاوانە دڵ و دەروونی جەماوەری پێ نیگەران نەكەن و نەخرێنە ناو بۆسەی چەند هەرایەكی كۆنترۆڵ نەكراوی واوە كە سەرئەنجام دەبنە هۆی گرژی پشێوێیەكی نەخوازراو كە كەس حەزی پێناكات.
باشە ئەو لایەنە كێیە كە زەمانەتی ئەوەمان بۆ بكات كەسانێكی ئاژاوەگێڕ و تیرۆریستێكی سەر بە ڕێكخراوی قاعیدە و گرووپە هاوشانەكانی ناكەونە ناو خۆپیشاندەران و لەپاڵ ئەواندا هەرچی ئامڕاز و مومتەلەكاتی گشتی و تایبەتی و هەرچی كۆمپانیاكان و بارەگای باڵیۆزخانەكانی بیانییە لە كوردستان تێكو پێك نەدرێت و تاڵان ناكرێن.
لە هەمووی گرنگتر ئەو لایەنە كێیە، یان ئەو دەزگایانە كامانەن كە زامنی ئاسایش و پاراستنی ژیان و موڵكی خەڵكی خۆپیشاندەر دەگرێتە ئەستۆ، لەكاتێكدا دامودەزگاكانی ئاسایش كە لە لایەن سەركردایەتی گۆڕانەوە بە گەندەڵی و مەحسوبیەت و مەنسوبیەت بۆ حزبەكانیان تۆمەتبار كراون وەك لە دەقی بەیانەكەی گۆڕاندا هاتووە.
ئەوەتا لە بڕگەی یەكەمی بەیاننامەكەدا داوا لە پارتی و یەكێتی دەكات كە دەستیان لە حكومەت و پەرلەمان ببێتەوە، ئەمەش پێچەوانەی ئاسانترین و سەرەتاییترین ڕێباز و بنەمای دیموكراتی و سیستمی پەرلەمانییە لە هەموو جیهاندا، هەر لە خۆرهەڵاتەوە بگرە تا خۆرئاواش، چونكە روون و دیارە ئەم حكومەتەی ئێستاش بە ئیمتیازەوە حزب پێكیهێناوە و، سەرۆكی ئەنجومەنی وەزیران و جێگرەكانی و وەزیرەكانی و ئەندامانی پەرلەمانیش هەموویان سەركردە و بەرپرسی باڵان لەناو حزبەكانی خۆیاندا، بە پشتگیری و پاڵاوتنی حزبەكانیان هاتوونەتە سەر كورسی دەسەڵاتی جێبەجێكار و تەشریعی و یاسایی. لەم ڕووەوە بەپێی هەموو لۆژیكێك زۆر ئاساییە تەرجومەی بەرنامەكانی ئەو حزبانە لەناو حكومەتدا بكەنەوە.
ئەردۆگان لە توركیا و دەیڤید كامیرۆن لە بەریتانیا و نەتەنیاهۆ لە ئیسرائیل و باراك ئۆباما لە ئەمەریكا لە هەموو بوارەكانی سیاسەت و ئابووری و هەروەها لە سیاسەتی دەرەوەو پێوەندییە نێودەوڵەتییەكاندا ئەو بەرنامەیە جێبەجێ دەكەن كە حزبەكانیان دایانڕشتووە،لە كوردستانیش بەهەمان شێوەیە، ئێستا زۆرینەی هەڵبژێردراو لەلایەن گەلەوە ئەوانەن كە ئێستا حكومەتی هەرێمی كوردستان بەڕێوە دەبەن، كەچی بزووتنەوەی گۆڕان داوای ڕووخاندنیان دەكات، ئەمانەی لە كوردستان دەنگیان هێناوە گەر بە رێژە وەریبگرین لە رێژەی زۆرینەی ئەردۆگان و نەتەنیاهۆ كە لە توركیا و ئیسرائیل دەنگیان پێدراوە ژمارەیان زیاترە، باشترین نموونەش لەم ڕووەوە بردنەوەی سەرۆكی ئەمەریكای پێشوو جۆرج دەبلیۆ بۆش بوو لە هەڵبژاردنەكانی كۆمارییەكاندا كاتێك لە ئەلگۆر پاڵێوراوی دیموكراتییەكانی بردەوە بەجیاوازی تەنیا یەك دەنگ بردنەوەكەی مسۆگەر بوو لەلایەن ئەندامانی لیژنەی دادگای دەستووری (5-4) بەهۆی هەڵەیەكی تەكنیكی و ئیلتیباسێكی بچووك لە ئەنجامی هەڵبژاردنەكاندا بۆ بەرژەوەندی بۆش یەكلاكرایەوە.
ئەو پرسیارەی كە پێویستی بە وەڵامی ڕوون و ڕازیكارە ئەوەیە كێ حكومەت دەڕوخێنێت؟؟
پەرلەمان یان سەرۆك یان شەقام. ؟؟ كام لەمانە خەسڵەتی یاساییان بۆ دامەزرانەوەی حكومەتێكی گوازراوەی تەكنوكراتی سەربەخۆ بەدەستەوەیە؟؟ وەڵامدانەوەی ئەم پرسیارە دەكەوێتە ئەستۆی سەركردایەتی بزووتنەوەی گۆڕانەوە، بەرپرسیارێتی و ئەركی ڕەها و بێ چەند و چوونی ڕووداوێكی پڕ لە كارەساتی وەهاش هەر دەكەوێتە ئەستۆی ئەوانەوە.
داواكردنی هەڵوەشانەوەی پەرلەمانی ئێستا و سەرلەنوێ هەڵبژاردنێكی پەرلەمانی پاك و بێگەردی دیموكراتی لەماوەی تەنیا سێ مانگدا، زۆرسەیروسەمەرەترە لە داواكردنی ڕووخانی حكومەت و پەرلەمانی ئێستا، پەرلەمانێك كە لە ئاكامی پرۆسەیەكی هەڵبژاردنی ئازاد و بێگەردەوە هاتۆتە دی.
بە ددان پیانانی زۆرینەی زۆری چاودێرە ناوخۆیی و نێودەوڵەتییەكان بەتایبەتیش چاودێرانی كۆمیسیۆنی باڵای هەڵبژاردنەكان و هەموو لایەنەكانی دیكە بە گۆڕانیشەوە كە بەهەموویان چاودێریان لەسەر سندووقەكان دانا بوو،هەروەها سەرپەرشتیكار بوون لەسەر هەڵبژاردنەكە و هەمووانیش ئەنجامەكانیان پێ قبوڵ بوو، بە فراكسیۆنی گۆڕانیشەوە لە پاڵ فراكسیۆنە ڕكەبەر و فراكسیۆنەكانی سەربە دەسەڵاتیش ئەنجامی كۆتایی قبوڵ كرا.
ئیتر لەو هەڵبژاردنەدا بزووتنەوەی گۆڕان چارەگی كورسییەكانی پەرلەمانی بۆخۆی دەستەبەركرد و هەموو ئەندام پەرلەمانە براوەكانیش سوێندی یاساییان خواردووەو كە لە سوێندەكەدا هاتووە، پارێزگاری بكەن لە بنەما و ڕوكنەكانی سیستەمی پەرلەمانی و هەموو دامودەزگاكانی و دەسكەوتەكانی كوردستانیش، لەدوای هەموو ئەمانەی ڕوویداوە و گوزەشت، دواتر وەبەرگومان خستنەوەی بێگەردێتی و پاكی پرۆسەی هەڵبژاردن بەوەی گوایە ساختەكاری بە ویست و ئیرادەی دەنگدەرەوە كرابێت و گوایە بەو شێوەیە دوو حزبەكە زۆرینەی ڕەهایان لە كورسی هێنابێت !! بەم شێوەیە بزووتنەوەی گۆڕان خاڵێكی سلبی لەسەر سەرجەم ڕەوایەتی هەڵبژاردنەكەی پێشوو تۆمار بكات، ئەگەر بەمشێوەیە بێت بۆچی هەر خۆیان دواجار ئەنجامەكانیان قبوڵ كردووە، بۆچی رازی بوون لە دانیشتنەكانی پەرلەمانێكی ساختەدا هاوبەشی كورسیەكانی پەرلەمان بكەن، بەو حیسابە بێت بۆچی رازی بوون ڕۆژانە لەناو پەرلەماندا وتووێژیان لەگەڵ ساختەكاراندا بكەن، گەر وابووایە پێویست بوو بەپێی لۆژیك و هزری راست و دروستەوە لەیەكەمین دانیشتنیانەوە بەشداری فیعلیان نەكردبایە و لە پەرلەمانێكدا دانەنیشتنایە كە بە ساختە تۆمەتباری دەكەن .!!
چونكە بەم شێوەیە خۆیاندەكەن بە شایەتحاڵێكی ساختەكار لەسەر پرۆسە و كار و بڕیارەكانی پەرلەمانێك كە خۆیان بە گومانی ساختە تۆمەتباری دەكەن، لە بڕوایەكی خاكڕایەوە دەیڵێم ؛ باشترین چارەسەر و جوامێرانەترین دەستپێشخەرییان باشتر دەبوو گەر لە یەكەم دانیشتنەوە دەستلەكاركێشانەوەی هەموو ئەندامانی پەرلەمانی سەر بە فراكسیۆنی گۆڕان هەر لە لایەن سەركردەكانی گۆڕانەوە رابگەیەنرایە و چ پێویست بوو گاڵتە بە خۆیان و پەرلەمانێكی شەرعییانەی گەلێكەوە بكەن؟!
گەر لەو تاوانباركردنەیان ڕاستبوونایەو بۆ ئەو ئامانجانەیان بەوەفان كە ئێستا جەماوەری بۆ هان دەدەن، لەمەش گرنگتر لە خۆیانی كەمینەیەك زیاتر ئەو لایەنە كێیە كە سیفەت و دەسەڵاتی بەخۆیداوە، پەرلەمانی ئێستا هەڵبوەشێنێتەوە و داوا بكات هەڵبژاردنێكی خێرا و بەپەلەپرووزێ ئەنجام بدرێتەوە، ئایا ئەم جۆرە داوایە تایبەت نییە بە سەرۆكایەتی هەرێم؟
هاوكات ڕاگەیاندنی گۆڕان زۆربەی كات ناڕەوایەتی و نادەستووریەتی ئەم پۆستەی سەرۆكایەتی هەرێمی كوردستان كردۆتە بالۆرەو لە هەموو بۆنەیەكا باسی دەكەنەوە وا وەسفی دەكەن گوایە پۆستێكی دیكتاتۆریانەیە .
پرسیار لێرەدا ئەوەیە ئایا كۆمیسیۆنی باڵای هەڵبژاردنەكان ئامادەیی خۆیان وەرگرتووە بۆ هەڵبژاردنێكی كتوپڕ و خێرا لەو ئان و ساتەی كە لە بەیانەكەی گۆڕاندا دیاری كراوە؟ بۆ نموونە هەروەكو گریمانە باسی بكەین، گریمان لەو هەڵبژاردنە داواكراوەی سەركردایەتی گۆڕاندا هەمان ئەنجامی پێشوو یان ئەنجامێكی زیاتر لەو كورسیانەی ئێستا لە بەرژەوەندی گۆڕاندا وەدەستنەهێنراون بۆ هەردوو حزبی دەسەڵاتدار وەدەست بێتەوەو سەركەوتنێكی باشتر بۆ ئەو دوو حزبە دووبارە بێتەوە، ئەمانیش دیسانەوە بە كەمینەیەكی كەمتر دەربكەون و هەردوو حزبەكەش بە زۆرینەیەكی زۆرترەوە دەربچنەوە، ئایا ئەو كاتە بارودۆخ و هاوكێشەكە نابەنەوە ناوچوارچێوەی یەكەم شێوەو حاڵ و گوزەرانی بزووتنەوەی گۆڕان و پێگەكەیان نابێتە شێوەی ئەو پیاوەی كە ئەسپەكەی لێ دەدزرێ دواتریش دوای سێ مانگ هەر لەلای خۆی دەدۆزرێتەوە.
رێبازی ڕێزگرتن و قبوڵكردنی كەمینە بۆ ڕای زۆرینە و بڕیارەكانیان ڕێبازێكی سەقامگیر و پتەوە لەناو هەموو وڵاتانی جیهاندا، تەنانەت لەناو ڕژێمە تۆتالیتارییە زۆر مەحكەم و سامناكەكانیشدا، گەرچی ئەو ڕێزگرتنە كارتۆنیش بێت.
بە داوای لێبوردنەوە لەسەركردەكانی گۆڕان ڕێگەم پێبدەن كار بكەین بە ڕێبازی ڕێزگرتنی ڕەئی بەرامبەر و بڵێین ئەزموونی هەرێمی كوردستان، بۆتە نموونەیەكی شارستانی لەسەر هەموو ئاستەكان، ئەمەش نەك لە هەواوە بیڵێم بەڵكو بەشایەتحاڵ و ددان پیانانی هەموو هێز و دەوڵەت و لایەنە سیاسییەكانی هەرێمایەتی و نێودەوڵەتی دنیا، بەو چواردەوڵەتەشەوە كە ئەندامی هەمیشەیی ئەنجومەنی ئاسایشی نێودەوڵەتین و، ئیتر تۆمەتباركردنەكەی گۆڕان بەوەی هەرێم بۆتە نموونەیەكی خراپ و گوایە خەڵكانی تر چاوی لێدەكەن لە خراپیدا، دەكەوێتە خانەی لەكەداركردن و هەڵەكردنی بە ئەنقەستەوە، هەروەها ڕشتنی بەنزینە بەسەر ئاگرێكدا كە هێزە شۆڤینییە نەیارەكانی لە دژی مافەكانی گەلی كورد هەوڵ دەدەن، پێشترهەڵیان گیرساندووە. بەو وەسف كردنە پڕ چەوت و چەوێڵەی گۆڕان بۆ هەرێمی كوردستان هەست و ویژدانی هەموو نەتەوەی كورد بریندار كراوە، چەند جوامێرانە دەبوو بۆ گۆڕان گەر ئەو وەسفەی كە لە حەقیقەت و واقیعدا ڕاستی تیا نییە، بگۆردڕایە بۆ وەسفی بەرپرسانەی دوور لە ئاوەژوو بۆ نموونە داوای مافی چارەی خۆنووسینیان بكردایە وەك چۆن بزووتنەوەی میللی باشووری سودان دڵسۆزانە داوایەكی وەهایان كرد، بەمەش گۆڕان خیتابی سیاسییانەی خۆی بەرزو جوامێرانە ڕابگرتایە، یان داوای لە جەماوەر بكردایە وەك قەڵغانی بەشەری لەسەر سنوورەكانی كوردستان لە ڕووی ئەو تەعدایانەی وڵاتانی دراوسێ ڕابوەستنایە، یان هەڵوێستێكی پۆڵایینیان لە بەرامبەر حزبەكانی دەسەڵات لە بەغدا لەسەر مەسەلەی كەركوك و ناوچە دابڕاوەكانی تری كوردستان وەربگرتایە، یان داوای كۆنفیدرالیەتیان بۆ كوردستان لە بەغدا بكردایە، یان بەرگرییان لە ژیانی هەزاران خێزانی كوردی ڕاونراو لە بەشەكانی تری كوردستان و هەروەها لەناوچەكانی موسڵ و مەندەلی كە لە ژێر فشاری تۆقاندنی بەبەرنامەرێژكراوی دامودەزگا شۆڤینییەكان ئەنجام دەدرێن بكردایە. ئەو كاتە گەر ئەم دەستپێشخەرییانەیان بكردایە ئایا بزووتنەوەی گۆڕان بە كارێكی وا شەرەفمەند و جوامێر و بەرز مەدالیای سەربەرزی و سەرفرازی بۆ كاروانەكەی خۆی مسۆگەر نەدەكرد؟؟!!
زیاد لە جارێك وتوومە من لە شاعیرانی كۆشك و ڤیللاوە دوورم، هەرگیز مەدح و سەنای دەسەڵاتدارانم نەكردووە، لەم بۆنەیەشدا دەیڵێمەوە زۆر شەرمە و شورەییە و دابەزینە بۆ ئاستی قین لەدڵی و بوغز و كینەهەڵگرتن گەر ئینكاری ئەو دەستكەوتانە بكرێت كە گەلی كورد و سەركردایەتییەكەی لەسەر هەموو ئەو ئاستانی ناوخۆیی و هەرێمایەتی و نێودەوڵەتی بەدەستیان هێناوە، ئایا ئەمە شانازی نییە بۆ هەموو كوردێك و بۆ هەموو پارچە دابڕاوەكانی كوردستانیش، كە ڕەمزێكی كوردی وەك جەلال تاڵەبانی سەرۆك كۆماری عێراق بێت، بۆ دووەمین جاریش لە دەستاو دەستكردنی دەسەڵاتدا بوونی خۆی سەلماندبێت و هەر بەسەرۆك كۆماری بمێنێتەوە، وێڕای ئەو هەموو فشارە نێودەوڵەتی و هەرێمایەتییەی خرابوونە سەر كورد بۆ دەستبەردان لە پۆستێكی وا بەرز بە فشارەكانی سەرانی گەورەی كۆشكی سپیشەوە، ئەوا ئێستا سەرۆكایەتی لوتكەی پاشایان و سەركردە و میرزادەكانی 22 دەوڵەتی عەرەبی پێدەسپێردرێت، چ شانازییەك بۆ هەموو كوردانمان لەمە مەزنترە كە سەرۆك بارزانی بەدەستپێشخەرییەكەی لەسەر بڕیاردانی چارەنووسی عێراق بە گەل و نیشتمانەوە سەركەوتن بەدەست بێنێ و لەمیانەی ئەو دەستپێشخەرییەی لە هەموو دنیاوە بەسەركەوتوو لەقەڵەم درا، لەكاتێكدا چەندین گەمەكاری گەورە لەسەر شانۆی هەرێمایەتی و نێودەوڵەتی نەیانتوانی دەستپێشخەرییەكی هاوشێوەی سەركەوتووی وا وەدی بێنن. ئینجا پێشتریش ئەم سەرۆكە بە دەنگ و ڕەنگەوە و بەجل و بەرگی نەتەوەیی میللی خۆیەوە و بە زمانی كوردی لەگەڵ سەرۆكی ئەمەریكا بیبینین، هەروەها گوێبیستی ئەو هەموو نامەی سوپاس و پێزانینەی مەسیحییەكانی جیهان بین، لە پێش هەمووشییانەوە سوپاس و پێزانینی پاپای ڤاتیكان بۆ سەرۆك بارزانی كە توانی لەناو جوگرافیایەكی تەسك و دەورەدراو بە تەلی دڕكاوی ژیان و گیانی ئەو مەسیحیانە بپارێزێت كە كەوتبوونە بەر هەڕەشەی جینۆسایدی هێزە تیرۆریستەكانەوە.
سەرۆك بارزانی توانی خەندەو هیوا بۆ لێوی منداڵی برا كریستیانەكان بگەڕێنێتەوە و لەو هەرێمەی كە سەركردایەتی گۆڕان بە خراپ و وێران ناوی دەبات بە جوانترین شێوە ببێتە شوێنی ئارامی بۆ هەمووان، هەروەها محەمەد ڕەئوف ڕەشید كە دادوەرێكی كوردەو چارەنووسی گەورەترین جەللادی گەلی كورد لەسەر سەكۆی دەست و دەنگی ئەوەوە بدرێت، بڕواناكەم ئەم دەستكەوت و بەرهەمانە و زۆرانی تریش لە خەیاڵ و خەون و ئومێدەكانی هەموو گەلی كورددا بسڕدرێنەوە، بە هەزاران تێكۆشەری كوردستان شەهید كران لە پێناوی ئەوەی چاویان بە ئاڵای كوردستان بكەوێت كە بەسەر شاخ و بەسەر دامودەزگاكانی كوردستانەوە بشەكێتەوە، هیچ دەوڵەتێكی ئیسلامی دەسەڵاتی هەرچەندێك بێت، تەنانەت ئەو ملیۆنەها موسڵمانانەی سێیەمیی ڕوكنی ئەركانەكانی ئایین لە فەریزەی حەجدا جێبەجێ دەكەن، ئەو ماف و دەسەڵاتەیان نییە كەعبە بگوازنەوە بۆ مەدینە، بەمەرجێ مزگەوتی صلعەمی بە مزگەوتی پێغەمبەر ناسراوە لەوێیە، هەروەها گۆڕی پیرۆزی پێغەمبەریش هەر لەوێیە. هەموو مەسیحییەكانی دنیاش ناتوانن كلێسای قیامە لە شاری بیت لەحمەوە بۆ شوێنێكی تری ناو دنیای مەسیحی بگوازنەوە. بەراورد بەم جیاوازییە گەورانەی كە لەنێوان شەرعیەتەكانی ئاسمان و بەها نەتەوەییەكاندا هەیە، سەركردایەتی گۆڕان پێویستە بەخۆیان دابچنەوە گەر بڕوایان وابێت ئەم كیانەی بەسەر ئێسك و پرووسكی هەزاران هەزار شەهیدەوە دروست بووە كە مافی بەشەكانی تریشی لە سەروەری تێدایە، هەڵەن گەر وابزانن چارەنووس و قەدەری ئەم هەموو قوربانیدانە بكەنە قوربانی میزاج و حەزێكی شەخسی سەركردەیەكی خۆیان، چونكە ئێستا هەرێمی كوردستان موڵكی هەموو نەتەوەی كوردە، مافی هەموو كوردێكیشە لە هەر كونجێكی دنیاوە بێت، لێرەدا ژیانی خۆی بەئارامی و ئازادی درێژە پێبدات. چ ئەوانەی لەبەر چەوسانەوە ڕوودەكەنەوە ئەم هەرێمە و لەناویدا هەست بە ئارامی دەكەن، یان ئەوانەی بۆ زانست و زانیاری ڕوو دەكەنە زانكۆ و پەیمانگاكانی هەرێمی كوردستان، یان ئەو كوردە دەربەدەركراوانەی لە پێناوی بژێوی ژیانی منداڵەكانیان كە لەبەشەكانی تری كوردستان چەوسێنراونەتەوە و دەرگاكانی ژیانیان لێداخراوە، لەم دەرگایەیان داوە و بۆ كاركردن هاتوونەتە ناو ماڵی خۆیانەوە. زمانی هەڕەشە و گوڕەشەكردن هەرگیز جێگەی ئەركی بەرگریكردن لە دەستكەوتەكانی ئەم زەوی و خاك و دامودەزگا شەرعیانە ناگرێتەوە. لە كۆتاییدا داوا لە سەركردەكانی بزووتنەوەی گۆڕان دەكەم، با وەكو جاران هەست بە بەرپرسیاریەتی نەتەوەیی و نیشتمانی خۆیان بكەنەوەو، لەم ڕێگەیەشەوە داوا لە گەنجانی ئەو بزووتنەوەیە دەكەم بەتایبەت ئەوانەیان كە نەوەی شەهیدان و ئەنفالكراوەكانن،بۆ خوێنی باو و باپیرانیان بەوەفابن و بە هەموویان هەوڵبدەن ئەم بزووتنەوە گەنجە نەكەنە وێستگەیەك بۆ تۆڵەسەندنەوەی كەسانێك كە بۆ چەند ساتەوەختێك خۆیان پەراوێزخستووەو و ئێستا دروشمی ئەو پەندەیان هەڵبڕیوە كە دەڵێت (گەر بۆ من نەبێت، لە هەمووان دەكەمە دۆزەخ)ئەمەش لە پێناوی چەند دەستكەوتێكی حزبییانەی كاتیی، یان لە پێناوی پۆستێكی وەزاریی، یان بۆ وەدەستكەوتنی چەند كورسییەكی زیاتری لەپەرلەمان،ئامادەیە تەڕ و وشك پێكەوە بسووتێنێت
زۆر دەرفەت و وێستگەی تر هەیە لەم دووساڵەی داهاتوودا چاوەڕوانی هەمووان دەكات و ئەو دوو ساڵەش كۆتایی مێژوو نییە. هەركەسێك بەپەلە پرووزەیەك داوای شتێك بكات ئەوا لە دەستی هەمووان و لە دەستخۆشی دەدات، كاتی ئەوە هاتووە بۆ ئێمەی كورد خۆمان لە گرێی هەست بەكەمسەری كردن و ئەزموونی گەلان و ناوچەكانی تر ڕزگار بكەین و بەبێ هەڵسەنگاندن كۆپی نەكەینەوە، ڕاپەڕینی پیرۆزی گەلی كورد لە ساڵی 1991 كوردستانی لە زاخۆوە تا خانەقین ڕزگار كرد و ئەمەش باشترین پێشەنگ و نموونە بوو بۆ تونس و میسر كە چاو لە كوردستان بكەن.