چەند رۆژێكی دی ساڵی 2011 دەست پێدەكات. ئەو ساڵەی دێ، بۆ عێراقییەكان و بۆ حكوومەتی مالیكیش زۆر گرنگە. لە كۆتایی ساڵی دادێ، دەبێت بەگوێرەی (بڕگە 1ی ماددە 24)ی رێككەوتننامەی (سۆفا) و بەڵێنە یەك لەدوای یەكەكانی ئیدارەی باراك ئۆباما، ئەمریكا تەواوی هێزە شەڕكەرەكانی خۆی لە عێراق بباتە دەرێ. بەمەش دەوڵەتی عێراق لە رووی شكلییەوە، هاوڕێ بە دەرچوون لە فەسڵی حەفتەمی پەیماننامەی نەتەوە یەكگرتووەكان، سەروەری خۆی بەتەواوی وەردەگرێتەوەو ئیدی ئەركی حكوومەتی مالیكی دەبێت، پێوەندییە دیپلۆماسی و سیاسییەكانی خۆی لەگەڵ دەوروبەرو دنیای دەرەوەدا، لەسەر بنەمایەكی رۆشن و رێزگرتن لە یەكتر رێكبخاتەوە. دیارە تەواوكەری ئەو سیاسەتەش، یان مەرجی سەركەوتنی حكوومەتی عێراق لەم ئەركەیدا، بەندە بە ئاشتی و تەناهیی و سەقامگیریی ناو ماڵی عێراق خۆیەوە.
راستە، حكوومەتی تازەی مالیكی، هەرچەندە درەنگ پێكهات، لێ حكوومەتێكە، مالیكی گوتەنی «حكوومەتی شەراكەتی نیشتمانی»ییەو زۆرینەی كیتلە براوەكانی هەڵبژاردنی 7/3/2010 بەشدارییان پێكراوە و كیتلە سەرەكییەكان بەڵێنیان پێداوە كە كار بۆ سەرخستنی حكوومەت بكەن. بەڵام پێكهاتەی حكوومەتە تازەكەی مالیكی، بەو فرە ئیتنی و تایەفی و حزبییەوە، بەو پان و پۆڕییەوە (دەوروبەری 40 وەزیر)، لەبەر ئەوەی وەزیرەكان لەلایەن لیستەكانیانەوە كاندیدكراون و مالیكی دەورێكی ئەوتۆی لە دانانیاندا نەبووە، شلۆقە و هزر ناكرێ حكوومەتی تازە، حكوومەتێكی بەكارو دەستڕۆیشتوو و بەهێز بێت! و بكارێت بە ئاسانی پێش بە دەستدرێژییەكان و گەندەڵی بگرێت و خزمەتگوزاریی پێویست بۆ هاووڵاتیان دابین بكات و عێراق ئاوەدان بكاتەوەو بیخاتەوە سەر سكەی بوژانەوەو گەشەپێدان. لە هەمووشیان گرنگتر، وەك دیارە، هێزەكانی عێراق (سوپا و پۆلیس و دەزگاكانی تر)، ئاسان نییە عێراقیان پێ لە تیرۆر و خراپەكاری و دزەكردنی تیرۆریستان لە سنوورەكانەوە بپارێزرێ بەتایبەتی پاش ئەوەی هێزەكانی ئەمریكا دەكشێنەوە، هەرچەندە مالیكی و غەیری ئەویش جەخت لەوە دەكەنەوە كە هێزەكانی عێراق سازو ئامادەن و دەكارن تا كۆتایی ساڵی 2011 بەرپرسیارەتی فایلی ئاسایش و تەناهی وەئەستۆی خۆیان بگرن، لێ سەرنجێكی خێرای كاری تیرۆریستی لە سەرانسەری عێراقدا، كوردستانی لێ دەرچێ، پێچەوانەی ئەوەمان پێ دەڵێت. ئەوەش بە دیوێكی تردا، سەردەكێشێتەوە بۆ توندبوونی ململانە و نفووزی ئەقلیمی كە وێدەچێ لە ساڵی ئایندەدا لە رێگەی كارەكتەرەكانیانەوە لەناو ئەنجوومەنی نوێنەران و حكوومەتدا، بەتایبەتی پاش كشانەوەی ئەمریكا لە عێراق، ئاستێكی تر وەربگرێت، ئەگەر مالیكی نەكارێت دەستی تیرۆر كورت بكاتەوە و كێشەكانیشی لەگەڵ حكوومەتی هەرێم چارەسەر بكات و كورد بەلای خۆیدا رابكێشێ. بەتایبەتی جێبەجێكردنی ماددەی 140 لە بارێكدا هەندێ كاراكتەری سوننەی شۆڤینیست بە پانایی ماڵێ لەناو پەرلەمان و حكوومەتدا دێن و دەچن و هەڵدەسوڕێن!
داخوا حكوومەتی تازەی مالیكی لەو ساڵەدا، ئەولەویاتی چی دەبێت و چ پلانێكی بەدەستەوەیەو لەواقیعدا چی پێدەكرێ. داخوا لە بەرەنگاربوونەوەی تیرۆردا، دەستی كراوە دەبێت و یان دیسان بە «تایەفی» و نازانم چی و چیتر ناوی دەبرێت. داخوا دەرو جیرانەكانی عێراق تا چەند هاریكار دەبن لەمڕووەوە كە دیسان پێموایە، مالیكی، رێگەی بەردەمی راستەڕێ نییە و كۆسپ و تەگەرەی زۆری دێننە ڕێ. لە نەبوونی تەناهی و سەقامگیریشدا، باسكردن لە خزمەتگوزاری و ئاوەدانكردنەوە، دەبێتە شتێكی خەیاڵی و گەندەڵیش بە هەموو ئاستەكانییەوە لەوێ بوەستێ.
لەسەر ئاستی قانووندانانیشدا، وەكو مالیكی ئاماژەی پێداوە، داخوا ئەنجوومەنی نوێنەرانی عێراق، ساڵی دادێ «قانوونی نەوت و گاز» و «قانوونی دابەشكردنی سەروەت و سامان» دەبڕێنێتەوە و لەگەڵ حكوومەت هاریكار دەبێت یان نا؟