نازانم بۆچی كە هەواڵ و زانیاریەكانی جێنێتی ویكیلیكس كەلە ساڵی 2007ەوە دروستكراوە و ئەو هەرایەی بەمدوایە ناویەتیەوە بەردەوام كتێبی «پێشبینیەكانی نۆسترادامۆس»م بیردەخاتەوە، لەگەڵ ئەوەی نۆسترادامۆس پێشبینیە، بەڵام ویكیلیكس زانیاری و بەڵگەنامەی شاردراوە و نهێنی پەیدادەكات و بڵاویدەكاتەوە. یەكەمجار كە كتێبی نۆسترادامۆسم خوێندەوە تووشی سەرسامیەكی زۆر هاتم، بەڵام لەدوای ئەوەوە فێربووم چیدی بەو جۆرە شتانە تووشی سەرسامی نەبم، بەتایبەت لەئێستادا كە تەكنەلۆژیان وا بێ سنوور پەرەی سەندوە وهێند ئاسان زانیاری و هەواڵ بەخێرایی دەگەن هیچ نەماوە ماوەیەكی زۆر بە نهێنی بمێنێتەوە وكاتێك دەستمان دەكەوێت هێند سەرسامی بین.
ئەگەرچی جێنێتی ویكیلیكس كە تەنیا وەك جێنێتێكی رۆژنامەوانی كاردەكات و بەگوتەی ئەو كەسەی لەپتشیەوەیە و، ئەو هێزەی لە پشتیەوەیە نەناسراوە، چەندین چالاك و هەڵسوڕاوی بواری رۆژنامەوانی لەپشتیەوەن و بە دەیان و سەدان پارێزەریان هەیە لە دنیادا، دامەزرێنەرانی دەڵێن گوایا رەهەندێكی ئینسانی گەورە بەخۆوە دەگرێت و، مەبەست لە دروستكردنی بەدواداچوون و پێشكەشكردنی خزمەتگوزاریەكانە بۆ پاراستنی ئەو كەسانەی كە زانیاری مەترسیدار و حەیابەری لایەن و حكومەتەكانی لە دنیادا دەستدەكەوێت وەكوو زانیاریەكان لە بواری سیخوڕی و گەندەڵیەكان وپێشێلكاریەكانی مافەكانی مرۆڤ. لە بوارەكانی تەندروستی و خۆراك و خوێندن و كوشتن و .تاد و، خزمەتگوزاریەكانی لە سەرتاسەری دنیادا پێشكەش دەكات بەبێ جیاوازی. ئیدی بەمشێوەیەش دەتوانین بڵێین سنووری چالاكی و تواناكانی لە رێكخراوی نەتەوە یەكگرتوەكان و هەموو رێكخراوەكانی مافەكانی مرۆڤ و رێكخراوە نێونەتەوەییەكانی بەدوای گەندەڵیەوەن و هەروەها ئەوانەی لە دۆسیەكانی سیخوڕی سیاسی و ستراتیژی و ئابووری دەكۆڵنەوە.
لە كۆتاییدا ئەوەی بۆ من گرنگ بوو چەند جار لە بەڵگەنامە و زانیاریەكانی ویكیلیكسدا ناوی كورد هاتووە، جارێك كە باس لەوە دەكات كە روسیا چەكی بە قاچاغ داوەتە كورد لە توركیا و، جارێك لە نامەكانی باڵیۆزخانەی ئەمەریكا لە عێراق كە دەڵێت گوایا كورد رۆڵی گرنگی دەبێت لە زامنكردنی سەركەوتنی شیعەكان لە عێراقدا، جاری سێیەم كە گوایا حكومەتی هەرێمی كوردستان سێ ئەمەریكی داوەتە ئێران. بەڵام ئەوەشمان بیرنەچێت كەئەمە دوورنییە مومارەساتەكانی زلهێزەكانی جیهان خۆیان بێت، كەبەباوەڕی من نهێنیەكی حەیابەری خۆیان هەڵدەماڵن، بۆ ئەوەی لەپاڵیدا چەندین نهێنی هێزەكانی تری بەرانبەریان هەڵماڵن و جیهانی لێ بەئاگابێنن.
ئەوەی جێنێتی ویكیلیكس زۆر باسی لێوەكردوە بەتایبەت ئەمدواییە زیاتر پێوەندی بە ناوچەی خۆرهەڵاتە و ئەوەی پێوەندی بە دەسەڵاتی زلهێزەكانی جیهانەوەیە لەو ناوچەیەدا وەكوو، عێراق، ئەفغانستان و ڤێنتام و. تاد.
لە كاتێكدا كە یاسا بۆ چەتەكانی سەر تۆڕی ئینتەرنێت دانراوە و بۆ نموونە سزای ئەوانە دەدرێت كە كۆپی ویندۆزی یان هەر سۆفتوۆرێكی كۆپی بەكارببرێت، بەڵام جێنێتی ویكیلیكس تا ئێستا بە شێوازی نهێنی و گوماناوی ئەو زانیاریانەی دەستدەكەوێت و لەلای خۆیەوە و بەگوتەی خۆیان پرۆگرامی جۆراوجۆری رێگرتن لە دزەكردنی ئەلەكترۆنی (خرق) و شفرەدانان بۆ ئەوەی كەس نەتوانێت دەستكاری جێنێتەكە بكات یان حەجبی بكات.
دواجار دامەزرێنەری جێنێتی ویكیلیكس (جەلیان ئاسانغی) بەرەگەز سویدی لەسەرەوەی لیستی ئەو كەسانەیە كە زۆرترین داوایان لەسەرە لەلایەن پۆلیسی ئەنترپۆلەوە. گرنگی ئەم جێنێتە لەوەدایە هەموو ئەو زانیاریانەی كە بڵاویان دەكاتەوە هەموو بە رێژەیەكی زۆر لە راستیەوە نزیكن و بگرە زۆریان راستن، چونكە هیچ شتێك لەسایەی تەكنەلۆژیادا شاراوە نییە و لەجیهانی تەكنەلۆژیای ژمارەییدا شوێن نییە بۆ شاردنەوەی زانیاری، ئیدی مەبەست لەمە دەبێت چیبێت، ئەگەر تەحقیقكردنی عەدالەتی ئینسانی بێت، ئەوا خودی عەدالەت چەمكێكی خەمڵێنراو و رێژەییە..
بەهەرحاڵ رەنگە هیچ روویەكی بەراورد نەبێت لە نێوان ئەو جێنێتەو كتێبی نۆسترادامۆس، بەڵام تا ئەو كاتەی راستی مەبەستی پشت دروستكردنی ئەو جێنێتە دەزانرێ، هەرجار ناوی دێت، ئەو كتێبەم بیردەكەوێتەوە.