هێشتا گەرمەی فرمێسك رشتن و دۆش دامانم بوو بەدیار كەناڵی ئاسمانی كوردساتەوە، كە لە شاری هەڵمەت و قوربانییەوە، رێورەسمی بەرەو گۆڕستانی شێخ مارفی نۆدێی بردنی پێشمەرگەی پەلەپیتكە و گەرووی دەگواستەوە و منیش هەر شیعرەكەی حەمدی ساحێب قڕانم دەگوتەوە:

ئەم سلێمانییە ساڵی جارێ
هەرئەبێ بۆی بێ بەڵا
یا بــە بۆمبـــا یا بـە ئاگـر
یا بەبــارانــی پــــــەڵە

مەلا رەمزی برادەرم، لە ئامەد(دیاربەكر)ـەوە ئاگاداری كردم كە سەیدا (مەلا موحەممەدی نور) چووە بەر دلۆڤانی خوا و ئەم، ئیرۆ تەرمی وی ڤەشارد، هەربۆیەكە خەمەكەم خۆی چەند بوو ئیدیشی هاتە سەر و ئەو بڕیارەی كە دابووم، بۆ نووسینی ئەم بابەتە و تایبەت كردنی بە محمدی سلێمانەیی، محمدی دیاربەكریشی تێدا جێبكەمەوە.
هەرلەسەرەتایشەوە دەزانم لە دەرەنجامی ئەم نووسینەمدا دەكەومە بەر رەحمەتی بێ بەزەییانەی تفەنگ و قەڵەمی ئەوانەی لە ژیاندا هەر نیو پەرداخی خاڵی دەبینن و لە سیفەتە جوانەكانی خوا، بەدەر لە (شدید العقاب)یان پێ ناخۆیندرێتەوە و تێیی ناگەن!، جا من كەی باكم لەوانە بووە تا ئێستا سەریان لێ بكەمەوە؟
مەلاموحەممەد نور: لە مانگی تەمموزی 2009دابوو، كە بۆچارەسەر چووبوومە وڵاتی توركیا و لە هاتنەوەمدا بەنێو كوردستانی بەریندا و بەشی باكووری، بە هاوڕێیەتی مامۆستایەكی لاوی ئامەدی، مەلا رەمزی، سەردانی پیاوێكی ردێن سپی بەژن بڵندی بەتەمەنم كرد لە ئامەد، كە لەنێو كتێبخانە گەورەكەی خۆیدا و لەگەڵ ئەوەی كە نەخۆش بوو لەنێو جێگادا كەوتبوو، هەستا بەرەو پیرمان و پێشوازییەكی هەر زۆر گەرمی وای لێ كردم بۆ خۆم شەرمم دەهاتەوە، كە ئەو پیاوە وەك باسیان دەكرد سەدان فەقێی گۆش و پەروەردە كردووە و ئیجازەی زانستیی داونەتێ، وێڕای سەرسام بوونم بەڕواڵەتە نورانییەكەی لەگەڵ ئەوەی تازە لای پزیشك هێنرابوو و، دوو ددانی پێشەوەیان بۆ دەرهێنابوو، فەرمووی: چونكە میوانی ئێمەن و لە بەشە كوردستانێكەوە هاتوون كە ئازادە و بۆ ئێمە وەك رووگەیەكی كوردایەتیی و جێگە هیوایەكی گەورەیە، قیروسیا لە تەندروستی خۆم دەكەم و بۆخۆی قاوەی لەبەر دەمم دانا و فەرمووی: كوڕم بزانن ئەوەندەی ئێمەی كورد هەین هەمیشە بەنێوی ئایینەوە خاپێنراوین و فریو دراوین، ئەوەی عوسمانێكان كاتی خۆی بە ئێمەیان كردووە لەژێر پەردەی ئایین و خەلافەتی ئیسلامیدا، كەسی دی لەژێر پەردەیەكی دیكە، ئەوەی نەكردوووە؟، لە داهاتوویەكی نزیكدا نووسینێكی درێژی لەسەر دەنووسم انشا الله - ئیتر ئەم كەسایەتییە گەرچی بەرەو جێی هەق رۆیشت و وادەزانم بە لە دەستدانی ئەو مەلا كوردە، كورد كەسایەتییەكی هەر زۆر گەورەی لە دەستدا و خوای گەورە بۆمانی قەرەبوو بكاتەوە، كە من وەك بڕوادارێك باوەڕم بەوە هەیە كە مردنی زانایەك، مردنی جیهانێكە وەك پێغەمبەر(د.خ)دەفەرموێت: (موت العالم موت العالم)، كە مامۆستا ئەحمەدی برام لە بەهاری ساڵێكی نێوەندی حەفتاكانی سەدەی رابردوودا بۆ مردنی مامۆستایەكی پیریان لە بەغدا، فەرموویەتی:

بای ئەجەل لای خۆی هێشتا بەهارە
بۆ هەڵت وەران گەڵای ئەو دارە
بەهەلت زانی چوویتە سەرخەتیب
كوشتت ئەوپیرە شیرین رەفتارە
هەرئەوت نەكوشت بۆیە بەیەكجار
لام نەما ئارام لام نەما قەرار
موت العالم موت العالم
گەڵا هەڵوەری و رووتایەوە دار

حمە جەزای پێشمەرگەی پەلەپیتكە و گەروو: لەوەتی من ناسیومە لە دوورەوە، پێشمەرگەبوو بە جەستە و بە رۆح و بە گەرووی، گومانم لەوەدانییە ئەوكاتەی ئەو بە هەڵە وەك مرۆڤێك تووشی وابەستە نەبوونێكیش بووبێت بە خواست و داواكانی ئایینەوە، ئەو پیاوە بێ بڕوانەبوو، دیمانەكەی كاتی هێنانەوەكەی بۆ كوردستان كە دەڵێ: (بەڵكو خوا شیفام بۆ بنێرێ)بڕوا بوونە بەخوا و بەوەی شیفا لای ئەوە و ئەمەیش ئیمانە، كەسێك لە رۆحی شەریعەت تێبگات، لەم داوە دەزووە جوانە تێدەگات.
ئەوكاتەی هەزاران جاش و خۆ فرۆش، خۆیان دۆڕاندبوو، ئەو لاوێنی خۆی بە چیا و دۆڵەكانی كوردستانەوە دەبردەسەر و شاخەو شاخی دەكرد، بۆ بەدیهێنانی ئازادییەك كە ئەمڕۆ ئێمە لەسایەیدا دەحەوێینەوە.
ئەوكاتەی ئەو پەنای بۆ چیاكانی كوردستان بردبوو، زۆرێك پەنایان بۆ ستەمكار بردبوو و لە دیوەخانە گەرمەكانیدا دەحەوانەوە!
هەربۆیە كە من لە ئاستی خۆمەوە ئەوەندەم هیوا بەڕەحمەتی خوا زۆرە، كە ئەگەر ئەو پیاوە لاسارییەكیشی بووبێت، بی بەخشێت بەو هەموو رەنج و ماندو بوونەی لەپێناوی سەربەرزی مرۆڤی كورد و كوردستان دا دای و سەڵاو لەگیانی و خوای گەورە دڵی خانەوادەكەی و هەموو لایەكمان لەو برینە ساڕێژ بكات.