(1)
دێزمۆند تۆتۆ كەسایەتییەكی سیاسی و كۆمەڵایەتی ناسراوی باشووری ئەفریقایە و، ئاشتیخوازێكی نێو نەتەوەییە، دۆستی گەلی كورد و لایەنگری مافەكانییەتی و، پشتیوانی چارەسەری ئاشتییانەیە، لە باشووری ئەفریقا، هەروەها كەسایەتی پەرلەمانی و شارەوانی و ڕووناكبیری پشتیوانی كورد و، كۆمیتەی پارێزگاری لە مافی كورد، هەنە.
تۆتۆ لە كۆتایی مانگی گەلاوێژ، پەیامێكی نووسیوە، بۆ رەجەب تەیب ئوردوگان، سەرەكوەزیرانی توركیای بنێرێت، نیگەرانی و پەژارەی خۆی دەربڕیوە بەرامبەر بە نوێبوونەوەی شەڕوپێكدادان لە نێوان سوپای توركیا و هێزی پارتی كرێكارانی كوردستان، هەر بۆیەش داوای كردووە، ئەو توندوتیژییە دەسبەجێ رابگیرێت و، حكومەتی ئوردوگان رووبكاتە گفتوگۆ لەگەڵ لایەنی كورد، چونكە چارەسەری ئاشتییانە تاكە رێگەی چارەسەری دروستی پرسی كوردە، تا چیتر خوێنی گەنجانی تورك و كورد نەڕژێت.
(2)
دێزمۆند تۆتۆ ویستبووی پەیامەكەی راستەوخۆ بەدەستی تەیب ئۆدۆگان بگەیەنێت، هەر بۆیەش نوێنەرێكی تۆتۆ و چەند ئاشتیخوازی باشووری ئەفریقا لەسەردانی باڵیۆزی توركیا لەو وڵاتە، ویستبوویان پەیامەكە رادەستی باڵیۆز بكەن، بەڵام ئەم رەتیكردۆتەوە، واتە: حكومەتی توركیا پەیامی ئاشتیخوازانەی تۆتۆی وەرنەگرتووە، كە تێیدا بە ئوردۆگان دەڵێ:
- خەریكی پارێزگاریت لە غەزە و مافی فەلەستینیان، لە كاتێكدا هاووڵاتیانی كوردتان لە توركیاش پێویستیان بە هاوكاری و پشتیوانییە بۆ چارەسەری ئاشتیانەی پرسەكەیان.
(3)
سوپاسی بێسنوور و رێزمان بۆ تێكۆشانی ئاشتیخوازانەی دێزمۆند تۆتۆو، سۆپاسی گشت دۆستانی كورد لە باشووری ئەفریكا ئەكەین.
جا، چ ئەم نامەیەم بەدەستی بگات یا نەگات، بۆ ئەم مرۆڤەدۆست و ئاشتی پەروەرە دەنووسم:
- دێزمۆند تۆتۆ گیان:
زویر مەبە، بەس تۆی خێرخوازنیت، كە داوات رەتدەكرێتەوە، وتەی چاك هێشتا رەواجی كەمە، یا رەواجی هەر نییە.
خۆ ئەگەر دەەسەڵاتدارانی وڵاتانی رۆژهەڵات گوێیان بە وتەی چاك بدابا، ئەوە زۆربەی گرفت و كێشەكان بە ئاسانی چارەسەر دەبوون.
نزیكەی سێ هەزار و پێنج سەد ساڵ بەرێ، زەردەشتی دانای رۆشنبیر، مرۆڤگەلی بۆ پەیڕەوكردنی سێ رەوشتی بەرز رێنومایی كردووە:
(بیری چاك، وتەی چاك، كرداری چاك)
پاش ئەوەندە ساڵیش هێشتا ئەم پەیامە كورتە جێگەی لە دڵ و وێژدانی دەسەڵاتداراندا نەبووەتەوە.
گیانە:
تۆ وتەی خراپت نەنووسیوە، بیر چاكی خۆت داڕشتووە.
وتووتە، ئاشتببنەوە و پێكەوە هاوكاری دەردی یەكتر ببن و بە ئارامی بژێن.
خۆ بەس سەروەكوزیرانی توركیا نییە كە پەیامی وەها، بە ئاسانی، رەتدەكاتەوە، هەرچەندە باسی ئاشتبوونەوە و كرانەوە بەڕووی كوردا، لەسەر زاریەتی!
بەڵكو لە وڵاتانی رۆژهەڵاتی ناڤیندا، بەدرێژایی سەدەی بیستەم، ئەم دەساڵەی سەدەی بیستوویەكەمیشی لەگەڵدابێ، وتەی چاك هەمیشە رەتكراوەتەوە، بەڵكو بە تاوانی گەورەیان زانیووە و وتاربێژیان خستۆوەتە بەر ئەشكەنجە و ئازار و .. هەڕەشەی مەرگەوە.
وتەی چاكیان لە ئاستی هەر كێشەیەكی دیكەشیان رەتكردۆتەوە، نەبەس دەرهەقی پرسی كورد.
(4)
خۆ ئەگەر، بۆ دەسەڵاتدارانی هەر وڵاتێكی كوردی تێدایە، بنووسن:
-( بیانگرە، بیانكوژن، ئەم كوردە یاخیبووانە لە ناو بەرن)
ئەوە یەكسەر نامەكەتان وەردەگیران و، دەیخەنە بان سەر!
- خۆ ئەگەر بتنووسیبا:
-( ئەم كوردە نمەك حەرامانە شایانی مان و ژیان نین، هەمیشە ئاژاوەگێڕ و مایەی خراپی و تێكدانن... نەهێڵن بە زمانی خۆیان ورتەیان لێوەبێ، نەهێڵن قاچ درێژ بكەن.. نەهێڵن نینۆك دەربكەن...)
ئەوە، دەسبەجێ نامەكەیان لێوەردەگرتی و دەعوەتیانیش دەكردی بۆ گەشت و گوزار لە وڵاتەكانیان و...(خەڵاتیان) بۆ ئامادە دەكردی.
بەڵام جەنابتان، بە وتەیەكی چاكی روون و كورت، نووسیووتە: كورد هاووڵاتیتانن، كێشەكەیان بە ئاشتی چارەسەر بكەن، لە تەكەیان بكەونە گفتوگۆ....
ئالێرەدایە تۆ دەمارت گرتوون، چونكە (گفتوگۆ).. واتە: دانیشتنی بەرابەری دوولایەنی یەكسان)...
ئەوانیش، دروست ئەوەیان نەویستووە، لە هیچ وڵاتێكی (كوردنشینی) خۆرهەڵاتی ناڤین، نەیانویستوە كورد بەرامبەر خۆیان بناسن و، وەك بنیادەمی(نەوەی ئادەم و حەوا) بە مرۆڤیان بزانن و، بە خاوەنی رەز و باخ و گوند و رووبار و دەشت و چیای خۆیان بیانناسن.
وتەی چاك، هێشتا لە ناو خۆمانیشدا، قەومی زۆرلێكراون وەك پێویست رەواجی نییە، جا چ بگات بە زۆرداران!
تۆ هەوڵی خۆت داوە، وتەی چاكی خۆت دركاندووە، بیری چاكت چاندووە، رۆژی دێ، هەر وتەیەكی چاك لەسەر بنجی خۆی شین دەبێ و گوڵدەكات، بەو ئومێدە بژێین چاكترە لە پەژارەی نائومێدی.