لەو رۆژەوەی شەهرستانی گرفتی بۆ واژۆكردنی گرێبەستە نەوتییەكانی هەرێمی كوردستان دروست دەكرد، مالیكی بێدەنگی هەڵبژاردبوو، لێ ئەوەدەزانرا كە راستە مالیكی خۆی رووبەڕووی ئەم پرسە نابێتەوە، بەڵام لەجیاتی خۆی شەهرستانی كە تایبەتمەندەو وەزیری نەوتیشە باشترین كەسە بۆ ئەم كارە، هەروەها لە لێدوانە نەزۆكەكانی ئوسامە ئەلنەجێفی بە هەمان شێوە ، مالیكی رۆژێك لە رۆژان هەڵوێستێكی نەك هەر لە بەرامبەردا وەرنەگرت، بەڵكو لە ژێرەوە جۆرە رێككەوتنێكیشیان هەبووە.ئەم گرفتانەی رۆژانە بۆ هەرێمی كوردستان دروستدەكران، گەیشتنە ئەو رادەیەی كە ئیتر نەك هەر تەنیا سەرۆكایەتی هەرێمی كوردستان هەڵوێستی روونی بەرامبەر بەو كارانە هەبێت كە مالیكی دەیكات، بگرە كار گەیشتە ئەوەی سەرۆكایەتی كۆماریش بە فەرمی هۆشداری بداتە مالیكی و لەو كارو فەرمانە تاكڕەوییانە ئاگاداری بكاتەوە كە مالیكی پیادەیان دەكات.بەڵام مالیكی لەجیاتی تێوردبوونەوەیەكی لۆژیكانەی لە هەڵوێستی سەرۆكایەتی هەرێمی كوردستان و هەروەها سەرۆكایەتی كۆمار، كەچی زاڵبوونی زهنییەتی تاكڕەوی و دیكتاتۆرییانەی وای لێكرد كە سووربوونی خۆی رابگەیەنێ لەسەر كارە تاكڕەوییەكانی كە بۆ ئەمڕۆ دیارترینیان دروستكردنی ئەنجوومەنەكانی ئیسنادە.
مالیكی باسی لەوەدەكرد كە تەنها دەستوورە كۆماندەكاتەوەو جیاوازییەكانیشمان هەر دەبێت ئەوەندە بن كە لە چوارچیوەی دەستووردان، لێرە پرسیارێكی زۆر سادە بەڵام لە ناوەڕۆكدا گرنگ خۆی قوتدەكاتەوە كە ئەوەیە تۆ بڵێی تەنها مالیكی پەیڕەوی دەستوور بكات و سەرۆكایەتی كۆماریش دەستووریان وەلاوەنابێت؟گرفتی گەورەی دەستوور ئەوەیە دەسەڵاتی لە سەرۆكایەتی كۆمار وەرگرتۆتەوەو بەخشیویەتییە سەرۆكایەتی ئەنجوومەنی وەزیران، بێ ئەوەی دەنگی هەردوو جێگری سەرۆك وەزیران ئەو رۆلەیان هەبێت كە جێگرەكانی سەرۆك كۆمار هەیانە،گرفتەكە لێرەدایە وڵاتێكی وێرانی دەستی دیكتاتۆرییەت بە بێ سەپاندنی هێز ناتوانێ وڵات بەڕێوە ببات كە رێك ئێستا مالیكی لەم جۆرەیە، هێزی ئیسنادی بە پارەو پوولی عێراق دروستكردووەو باشترین مووچەی بۆ داناون كەچی ئەڵێت ئێمە هیچمان پێ نەداون، ئەی مالیكی چی لەو نامانەی دەكات كە بە دەستی خۆی بۆ هەندێك لە شێخ و عەشیرەتەكانی عەرەبی ناوچەكانی موسڵ ی نووسیوەو پێیان دەڵێت مووچەی هەر یەكێك لەو خەڵكەی دەبێتە ئیسناد (700000) حەوتسەد هەزار دینارە، جگە لەو كەسەی كە سەرۆكی عەشیرەت یا فەوجەكە دەكاتەوە كە هەموو كۆمەكییەكی دەكرێت. ئایا مالیكی ئەم هەموو پارەو پوولە لە گیرفانی خۆی دەبەخشێتەوە؟ ئا لێرەدایە مالیكی لەو دیمانەیەی ئەم دواییەی سەرۆك بارزانی و لە هەڵوێستی سەرۆكایەتی كۆماری عێراق حاڵی بووە كە سەردەمی موجامەلە بەسەر چوو، بۆیە وتی رێككەوتنی بە موجامەلە كۆتایی هات.
دروستكردنی سەحوەش لە ئەنبار، بەخواستی مالیكی نەبوو، بەڵكو ئەمریكییەكان دروستیان كرد و چاویشیان لە ناڕەزاییبوونی مالیكی سوور كردبووەوە، كەچی مالیكی وتی خۆ حزبی دەعوە لە ئەنبار نییە، كەچی سەحوەمان دروستكرد، سەیركە چۆن دەیەوێ خۆڵ بكات بە چاوی خەڵكەوە لە كاتێكدا هەمووی چەند مانگێكە سەحوە دروستكراو ئەمریكاش لەبەرامبەر ناڕازیبوونی مالیكی هەڕەشەی كودەتای لێ كرد.
ئەوەی پێویستە ئاماژەی بۆ بكەین، لەوەتەی هەڵبژاردنی پەرلەمانی عێراق كراوە، گۆڕانكاری زۆر بەسەر جۆری هاوپەیمانێتییەكاندا هاتووەو زۆر گۆڕانكاری تریش هەروا بەڕێوەن، بۆیە رەنگە بۆ هەڵبژاردنی ئایندەی پەرلەمانی عێراق، گۆڕانكاری لە ئێستا زیاتر لەنێو هێزو لایەنەكان دروست ببێت، وەك لە هەڵبژاردنی ئەنجوومەنی پارێزگاكان دەردەكەوێت مالیكی رەنگە نەتوانێ جارێكی تر هەندێك لایەنی خاوەن دەنگ و هێز بۆ خۆی ئیستغلال بكات، وەك دەبینین نە ئەنجوومەنی باڵا، نە باڵی جەعفەری، نە رەوتی سەدریش لایەنگیری خۆیان بۆی دەرنەبڕیوە، كە مالیكی بەمە زۆر سەخڵەت بووە , تا هەڵبژاردنی پارێزگاكانیش جگە لە گەرمكردنی گوتارەكان شتێكی تر نابێت، بەڵام دەكرێ كورد لەگەڵ هەندێك لایەن زیاتر نزیك ببێتەوە كە لە عێراقدا هەژموونی خۆیان هەیە، چونكە بۆ هەڵبژاردنی پەرلەمانی داهاتوو گۆڕان لە هاوپەیمانێتی و لەو لیستانەشدا دەكرێن كە ئێستا بۆ ئەنجوومەنی پارێزگاكان دانراون.