بەهۆی نەبوونی متمانەو یەكنەگرتنەوەی بەرژەوەندییەكانی حزب و گرووپ و لایەنە سیاسیەكانی عێراق، خەریكە عێراق بەرەو قۆناخێكی دژوارتر لە رابردووی مل دەنێ، ئەگەرچی هەموولایەك باس لە پابەندبوونی خۆیان بە دەستوورەوە راگەیاندووە، بەڵام لە بنەڕەتدا زۆربەی لایەنەكان هۆكارێكن بۆ بەتاڵكردنەوەی ئەو دەستوورە،ئەوكاتەی سەحوە دامەزرا و ئەمریكا یارمەتی و كۆمەكی سەحوەی كرد مالیكی دژی وەستا، بەڵام ئەمریكا بوو بۆیە مالیكی هیچی بۆ نەچووە سەر، ئێستاش مالیكی ئەنجوومەنەكانی ئیسناد دروست دەكات،كەچی هیچ حیساب و راوێژێك لەگەڵ ئەو گرووپ و لایەنانە ناكات كە تا ئێستاش هاوپەیمانی یەكترین،یا جۆرێك لە رێككەوتنیان لە نێواندا هەیە، لە سەرووی هەموویانەوە ئەنجوومەنی باڵای ئیسلامی كە بە دروستكردنی ئیسناد تەواو نیگەرانەو مالیكیش هیچ هەڵوەستە لەسەر رای ئەنجوومەنی باڵاو تەنانەت رەوتی سەدرو فەزیلەو ئینجا حزبی ئیسلامی عێراقی و ..هتد ناكات.
ئێستا ئەنجوومەنی باڵای ئیسلامی و تەنانەت گرووپ و لایەنەكانی تریش هەستیان بە مەترسی مالیكی كردووە لە مانەوەی لە حوكمڕانیكردنیدا، رۆژ لە دوای رۆژیش ئەو ترسە زیاتر دەبێت، كە بەگشتی عێراق بەرەو قۆناخێكی دژوار دەبەن.
تا ئێستا لەناو سەحوە سەركردەیەكی سیاسی بەدی ناكرێ، هەر بۆیە بەرنامەیەكی سیاسیشیان نییە، نە تەوافوق و نە حزبی ئیسلامیش نوێنەری راستەقینەی سەحوە نین،كە ئەمانە هیچ ئاماژەیەكی چاك بۆ ئایندەی عێراق نیشان نادەن، 000 100 چەكدار بریتی بن لە عەشایەری بێ سەركردەی سیاسی ئەمە خۆی لە خۆیدا گرفتێكی ئاڵۆزە. ئەم ئاڵۆزییە زیاتر بووە بە تایبەتی كە ئێستا مالیكی كەوتۆتە خۆی وئەنجوومەنی ئیسنادی دروستكردووە، بێ ئەوەی بڕیارەكە لە لایەن پەرلەمان یا ئەو حیزبانەشەوە گفتوگۆی لەگەڵ كرابێت كە هۆكاری سەرەكین بۆ مانەوەی مالیكی لە حوكمدا.
دروستكردنی ئیسناد لە ناوەڕاست و باشووری عێراق و دوور نییە لە ئایندە لە شارەكانی كوردستانیش بەتایبەت كەركوك پێك بهێنرێت،لە كاتێكدا شارەكانی باشووری عێراق كێشەیەكی ئەوتۆیان نەبووە تا پێویست بە دروستكردنی ئیسناد بكات، لەوەش زیاتر ئەو ئیسنادە سەر بە وەزارەتی ناوەخۆ یا دەوڵەت نییە، بەڵكو راستەوخۆ سەر بە مالیكییە، تەنانەت پارێزگاری شارەكانی باشووریش هیچ راوێژیان پێ نەكراوەو زۆربەی پارێزگارەكان دژی دروستكردنی ئەنجوومەنی ئیسنادن، هەر بۆ نموونە ئەو كۆنگرەیەی لە كۆتایی مانگی رابردوو كرا جگە لە پارێزگاری كەربەلا كە سەر بە مالیكییە تەواوی شارەكانی تری ناوەڕاست و باشووری عێراق رەفزی دروستكردنی ئیسنادیان كرد و جەختیشیان لەسەر ئەوە كردەوە كە دروستكردنی ئیسناد نا یاسایی و نا دەستوورییە، چونكە بە پێی دەستوور حكومەتە ناوخۆییەكان (مەبەست پارێزگاكانە) خۆیان بەرپرسن لە دۆسێی ئەمنی پارێزگاكە،كەواتە چۆن دەبێت ئیسناد پرس و راوێژ لەگەڵ پارێزگاكان نەكات،ئەمە چ جۆرە ئەمنییەت پاراستنێكە.
بە دروستكردنی ئیسناد كێشەی گەورە دەكەوێتە نێوان بەدرو ئەنجوومەنی باڵا لە لایەك و مالیكی و حزبی دەعوە لە لایەكی ترەوە، هەروەها دوور نییە رەوتی سەدرو فەزیلەش بە تەواوی لە ئەنجوومەنی باڵا نزیك ببنەوە لە دژی مالیكی، مالیكیش نایەوێ ئیمساڵ هەڵبژاردنی پارێزگاكان بكرێ، چونكە هێشتا جێ پێی خۆی باش قایم نەكردووەو ئیسنادیش تەواو دروستنەبووە، بۆیە دەیەوێ بیخاتە ساڵی داهاتوو بەڵام نەك سەرەتای ساڵی نوێ بەڵكو ناوەڕاست و دواوەتریش، بەمەش هەڵبژاردنی گشتی دوا دەكەوێت، چونكە ناكرێ دوو هەڵبژاردن لە ماوەی چەند مانگێكدا بكرێت، بەمەش خۆی لە حوكم درێژە پێ دەدات تا بەتەواوی رەگی خۆی قووڵدەكاتەوە، ئەمە بەرنامەی مالیكییە بۆ ئەوەی لە هەڵبژاردنی پارێزگاكان و دواتریش لە هەڵبژاردنی گشتیدا مالیكی ئەوەندە پێویستی بە رێككەوتن و هاوپەیمانی ئەم لایەن و ئەو لایەن نەبێت، تا دەسەڵات بگرێتە دەست، یا ترسی ئەوەی هەبێت بیرووخێنن،بەڵام پرسیاری گەورە ئەوەیە، ئایا مالیكی لە بەرامبەر ئەنجوومەنی باڵاو حزبی ئیسلامی و رەوتی سەدرو فەزیلەو دواجار كورد دا ئەمەی بۆ دەچێتە سەر؟ لە داهاتوویەكی نزیكدا وەڵامەكەی دەستدەكەوێت.