شاراوە نییە، كە مالیكی كرا بە سەرۆكی ئەنجومەنی وەزیرانی بەغدا، بە پشتگیری جیدی كورد بوو، دوای ئەو هەڵوێستە نێگەتیڤانەی لە جەعفەری هاتنە ئاراوە دەربارەی كێشەی كورد، ماوەیەكە هەمان ئەو هەڵوێستانەی جەعفەری كە بەرامبەر بە كورد هەیبون، لای مالیكی دووبارە دەبنەوە، هەر لەبەر ئەوەیشە كورد بێدەنگ نەبووەو لە رێككەوتی 21/12/2006 یاداشتنامەیەكی پڕ لە نیگەرانی بۆ مالیكی حەواڵە كرد،كە تەئكید لە جێبەجێكردنی داخوازییەكانی كورد كراونەتەوە، ئەو داخوازییانەی دەستوور قسەیەكی بۆ جێبەجێ نەكردنیان نەهێشتۆتەوە.
كورد ئەگەر بیەوێ كۆتایی بە حكومەتی مالیكی بهێنێ، ئێستا لە هەموو كات باشتر دەتوانێ، چونكە مالیكی تەنها بەهۆی لیستی هاوپەیمانەوە درێژە بە حكومەتەكەی دەدات، هەموو ئەو لیستانەی وەك تەوافوق، عێراقییە، تەیاری سەدر، فەزیلە، حیواری ناوەتەنی، متمانەیان لە حكومەت كێشاوەتەوە، بۆیە بە كشانەوەی لیستی هاوپەیمان، مالیكی بەتەواوی پەكی دەكەوێت، لە كاتێكدا ئەنجوومەنی باڵای ئیسلامیش هێندە مكوڕ نییە لەسەر مانەوەو بەردەوامبوونی مالیكی، یا روونتر بڵێین بەهۆی ئەم گرفتانەی مالیكی لەگەڵ كورد دروستیكردوون، ئەنجوومەنی باڵاش وەكو جاران پشتگیری لە مالیكی ناكات، بەڵام ئەوەی جێگەی سەرنجە تا ئێستاش كورد لەگەڵ ئەوەدایە پڕۆسەی جێبەجێكردنی داواكارییەكانی كە خۆی لە جێبەجێكردنی مادەی 140 و یاسای نەوت و بودجەی پێشمەرگەو یاسای دەسەڵاتی هەرێمەكان و ...هتد دەبینێتەوە، بێنە چێكردن.
ئێستا ئەو راستیە حاشاهەڵنەگرە زەق بووەتەوە كە مالیكی و پێشتریش جەعفەری هەر بە تەنها عەرەبی سوننەیان پشتگوێ نەخستووە، بەڵكو كوردیشیان پشتگوێ خستووەو، تەنانەت ململانێ لە نێو خودی باڵەكانی شیعەشدا هەیە،بۆیە مالیكی و حكومەتەكەی بە رادەیەك لاوازە، كە هیچ كۆنتڕۆڵێكی بەسەر باشووری عێراقیشدا نەماوە، كە شیعە نیشینیشن، ئەو حكومەتە ناوەندی و بەهێزو یەكگرتوو و دیموكراتیەی كە ئەمریكا لەگەڵ رووخانی بەعس خەونی سەوزی پێوە دەدی، بوون بە هەڵم و لەچاوان گوم بوون، خەون بوون، واقیعی ئایندەی عێراق نەبوون . ئێستا ئەمریكا ئەو راستییە باش دەزانێ و حاڵی بووە كە ئیتر حكومەتێكی ناوەندی بەهێز نەزەمینەی دروستبوونی هەیەو نە ئیتر بەغداش جارێكی تر دەتوانێ كۆنتڕۆلی هەموو پارچەكانی عێراق بكات.
مالیكی لە هەموو كەس باشتر دەیزانێ كە ئەگەر كورد بیوستبایە بیرووخێنێ، دەمێك بوو مالیكی بە دەردی جەعفەری چووبوو، تەنها كورد هەڵوێستی بۆ بەرژەوەندی گشتی و هاوتەبایی بووەو لایەنگیری لایەنێكی نەكردووە لە بەرامبەر لایەنێكی تر،ئەم هەڵوێستەی كورد جگە لە مالیكی، ئەمریكییەكانیش هەستیان بەوهەڵوێستە نیشتمانییەی كورد كردووە، بۆیە پرسی لادان یا لانەدانی مالیكی گرنگ نییە بەقەد ئەوەی نابێ داخوازییەكانی لایەنێكی بنەڕەتی بەشداربوو لە حكومەتی عێراق پەراوێز بكرێ، لەكاتێكدا لەدەستوور دەنگی لەسەر دراوە، كورد نامەی ناڕەزایی گەیاندە مالیكی و ئیتر چاوەڕوانی دروێنە دەكات نەك چاندن، مالیكیش لە زمانی نامەكە حاڵی بووە، هەست دەكرێ خەریكی هەنگاوهەڵێنانە، بەڵام دیدارەكانی ئەم چەند رۆژەی دوایی مالیكی لەگەڵ ئەو لیستانەی كە لە حكومەت كشاونەتەوە، خەریكن مالیكی بە لارێدا ببەن دەهەنبەر پرسی كورد، كە ئەمەش گەورەترین زیان بە مالیكی دەگەیەنێت، چونكە هەر ئەو لیستانە بوون لە حكومەتی مالیكی كشانەوەو، بە تەنها كورد و ئەنجوومەنی باڵا مانەوەو دیفاعیان لە مانەوەی حكومەتی مالیكی كرد، دەنا ئێستا مالیكی رووخابوو، ئێستا كاتی گفتوگۆو موجامەلە بەسەرچووە، یان ئەوەتا مالیكی گرەو لەسەر ئەو لیستانە دەكات كە لە حكومەتەكەی كشاونەتەوە و پشت لە كوردو ئەنجومەنی باڵاو عەرەبی سونە دەكات، كە بەمەش ناتوانێ خۆی لە رووخانی قورتار بكات، یان ئەوەتا دەبێ ئەوە بزانێ شەراكەت تەنها بۆ بەرژەوەندی لایەك نابێت، شەراكەت بەرژەوەندی هاوبەشە، كاتیش نەماوە لەم چەند هەفتەی دادێ، هەموو گرێكوێرەكان یەكاڵادەبنەوە.