لەو رۆژەوەی كۆنگرەكانی لەندەن و پیرمام لەسەروبەندی رووخانی سەدام دەبەستران، گرفتی كورد لەنێو كۆنگرەكان زەق دەبوونەوە، ئەمە لەكاتێكدا كۆنگرەی پیرمام لەژێر كۆنتڕۆڵی هێزی پێشمەرگەی كوردستاندا بەستراو هێشتاش سەدام هەر لە بەغدا لە حوكمدا بوو، ئەو عەرەبانەی بەشداریشیان لە كۆنگرەكە كرد، جارێ هیچ پشكیان لە فەرمانڕەواییكردنی عێراق بەرنەكەوتبوو، لێرەش حكومەتی هەرێم دەیپاراستن، كەچی راشكاوانە دانیان بە مافەكانمان دانەدەنا، لەكاتی پێكهێنانی ئەنجوومەنی حوكمیش سەركردایەتی كورد لەگەڵیان زۆرماندبوو، بەڵام ئەوان نەیاندەویست قەناعەت بە خۆیان بهێنن، بۆیە چ لەكاتی حوكمڕانی عەللاوی و چ لەكاتی حوكمڕانی جەعفەری، كورد هیچی بە هیچ نەكردو نەیتوانی هەنگاوێك بە رەزامەندی حكومەتی هەریەك لە مالیكی و جەعفەری بچێتە پێشەوە،كورد تەنها هاوكارێكی یەكلایەنە بوو بۆ حكومەتی بەغدا , بێئەوەی بەغدا لەبەرامبەر ئەو هاوكارییەی كورد دا یەك هەنگاوی چكۆڵەش بهاوێن,بۆیە كورد ناچار بوو دەست لە پشتیوانكردنی جەعفەری بەربدات و لە حوكم دووری بخاتەوەو مالیكی شوێنی بگرێتەوە, مالیكی كەسایەتییەكی ئەوەندە دیار نەبوو، پێگەیشی چ لە ناو شیعە(بە بەیتی شیعیشەوە) چ لە سیاسەتی دەرەوەش وەكو جەعفەری بەهێز نەبوو، بەڵام كورد پشتی گرت و هەوڵیدا لەم پۆستەی سەربكەوێت، مالیكیش سەرەتا بۆ ئەوەی پێگەی خۆی پتەو بكات، هەندێك هەنگاوی زۆر سەرەتایی نا كە گوایا ئەمە نیازپاكی ئەو نیشاندەدەن، بەڵام كە جێگەی خۆی گرت، ئەویش چەقی، ئەمە لەكاتێكدا ئەگەر كورد نەبوایە، دەمێك بوو مالیكی رووخابوو، مالیكیش باش دەزانێ ئەوكاتەی(منع التجول) بوو لە بەغداو ناوچەی سەوزیش كەوتبووە بەر هاوەنی تیرۆریستانەوە سەرۆك بارزانی فریای حوكمڕانی بەغدا كەوت و تەنانەت كەشوهەوای سروشتیش هێندە ئاڵۆز بوو فڕۆكە بە ئاسانی نەدەگەیشتە بەغدا، بەڵام بارزانی هەر چوو، زۆر نموونەی دیكە هەن كە ئاماژە بە دڵسۆزی سەركردایەتی كورد دەكەن بۆ هێنانەدی عێراقێكی دیموكراتی فیدراڵی، یەكگرتوو، لێ دەسەڵاتدارانی بەغدا بەتایبەت مالیكی ماوەیەكە هەڵوێستەكانی بەرامبەر بە كوردو تەنانەت لە بەرامبەر بە سەروەریی نیشتمانیش"ئەوكاتەی توركیا هەڕەشەی هاتنی بۆ سەر هەرێم دەكرد" هەڵوێستەكانی زۆر لاوازو نەشیاو بوون، هەڵوێستێكی جیدیمان لە مالیكی نەبینی چ بەرامبەر هەڕەشەكانی توركیا، چ بەرامبەر جێبەجێكردنی مادەی 140 چ لە بەرامبەر وەڵامدانەوەو دەمكوتكردنی شەهرستانی، وەك ئەوەی مالیكی جۆرە رێككەوتنێكی ژێراوژێری لەگەڵ شەهرستانی هەبێت، ئەوەی لە بیرچووە چەندین جار هەڵوێستی كورد نەبوایە، مالیكی دەمێك بوو ئەو شوێنەی لە دەستدابوو، مالیكی لەسەر كوڵخانەیەك دانیشتووە، كە هەمووی پەنگرو پشكۆن، بەیەك سرووە با هەمووی دەگەشێتەوەو ئەویش لەگەڵیدا دەسووتێ. بۆیە مالیكی و ئەمسالەكانی ئەو دەبێت ئەو راستییە بزانن دروستكردنەوەی عێراقی نوێ بەئەقڵییەتی مەزەبی و بە دوورخستنەوەو بێبێەشكردنی ئەم لایەن و ئەو لایەن نایەتەدی , كورد تا ئێستا شەریكێكی كاریگەرە لە عێراقی پاش دیكتاتۆرییەت ,نا عەدالەتی لە دابەشكردنی داهاتی نیشتمانی و سەیركردنی كورد وەك ئەوەی كە نەتەوەیەكی سەرەكی نییە لە عێراق هەموو ئەو قەوانانەی پێشوومان بیر دەهێننەوە كە سەرۆكەكەو دارو دەستەكەیشی سەری خۆیان تیا چواند.
عێراقی یەكگرتوو بە كوردەوە بەستراوە، دەبێت دەسەڵاتدارانی عەرەبیش لە ناوچەكە ئەو راستیە تێبگەن كە كورد نەبوایە عێراقی نوێ بەم شێوەیەی ئێستا نەدەبوو، بۆیە داواكارییەكانی كورد، داواكارییەكە، گفتوگۆ هەڵناگرێت و لە دەرەوەی دەستوریش نییە، بە ئارەزووی خۆشمان گەڕاینەوە بۆ عێراق تەنها بۆ ئەوەی عێراقێكی نموونەیی بێتە دی. بەڵام ئەم عەقڵیەتەی لەبەغدا هەیە، ئاراستە جوانەكان بەتەواوی دەگۆڕێ.