ئه‌و رێكه‌فتناما ڤێ دوماهیكێ ل ناڤبه‌را حكومه‌تا هه‌رێما كوردستانێ و عیراقا فیدرال دا هاتی ئیمزاكرن ل سه‌ر شنگالێ بوو جهێ كارڤه‌دانێن زۆر و جۆراوجۆر ، ب تایبه‌ت كو ناڤه‌رۆكا وێ هنده‌ك فایلێن گرنگ بخۆڤه‌دگرتن وه‌ك فایلێ ئیمناهیێ و سیاسی و كارگێری ، كو ب دیراسه‌ت ل ناڤبه‌را هه‌ردوو لایان بەغدا و هەولێر دا و ب ئاماده‌بوونا نوێنه‌رێن نه‌ته‌وێن یه‌كگرتی و ل دویف ڤیانێن خه‌لكێ شنگالێ و ب تایبه‌ت یێن ئاواره‌ هاته‌ دارشتن ، ئه‌ڤ خه‌لكه‌ ژی ل ماوێ ڤان شه‌ش سالێن بۆری دا زۆر ده‌رده‌سه‌ری و نه‌هامه‌تی دیتنه‌ ل ئاواره‌ییێ ، و ژیانا ئارام ل ناڤ كه‌مپان دا هه‌لدبژێرن ژ ژیانا ل ناڤ شنگالێ و ل ژێر سیبه‌را هێز و گرووپێن چه‌كدار دا ، ب تایبه‌ت بارودۆخێ شنگالی ێ ئیمناهیێ یێ نۆكه‌ ل قه‌یرانه‌كا زۆر مه‌زن دایه‌ .
ژ كه‌سی ناهێته‌ ڤه‌شارتن كو خه‌لكێ ڤێ ده‌ڤه‌رێ ل هێڤیا دیاربوونا چاره‌نڤیسێ سیاسی و ئیداری یێ نوو یێ شنگالێ نه‌ ، كو ئه‌منێ به‌رقه‌رار بكه‌ت ، ب تایبه‌ت پشتی هێرشا داعش بۆ سه‌ر شنگالێ و زیانێن ب به‌ر خه‌لكێ كه‌فتین ژ كوشتن و ره‌ڤاندن و وێرانكرنێ .
لێ پشتی هێزێن پێشمه‌رگه‌ی خۆ ل به‌ر زۆرئاسته‌نگان گرتی و شیایی ئه‌فسانه‌یا داعش شكاندی ل زۆربه‌یا ده‌ڤه‌ران ژ وان ژی ل ده‌ڤه‌را شنگالێ ب شیانێن سه‌ربازی یێن دیاركری ، چه‌كدارێن پارتا كاركه‌رێن كوردستانێ ئه‌ڤ بارودۆخێ نه‌خۆش بۆ خۆ ب ده‌رفه‌ت دیتن و گرووپێن چه‌كداری دامه‌زراندن ژ وان ژی ب ناڤێ (YBŞ) كو گرووپه‌كا چه‌كداری یه‌ كاردكه‌ت ل ژێر فه‌رمانێن یه‌كینه‌یێن پاراستنا گه‌ل یا ب ناڤ (YPG) او یان هێزێن پاراستنا گه‌لێ كوردستانێ (HPG) كو ژماره‌یه‌ك خه‌لكێ شنگالێ یێن ئاواره‌ی رۆژئاڤابووین چوونه‌ ناڤ رێزێن وان ژ ترسا هێرشین داعش .
ژ لایێ خۆ ڤه‌ (په‌كه‌كه‌) ئه‌و خه‌لكه‌ ناچاركرن بزڤرن ناڤ شنگالێ و هاریكاریا چه‌كدارێن وان بكه‌ن بۆ به‌ره‌ڤانی ژ شنگالێ ل دویف تێگه‌هێن وان ، كو ئارمانجا سه‌ره‌كی یا وان مفا دیتن بوو ژ ڤان لاوان و ئینانا وان بۆ ناڤ رێزێن خۆ و دوورئێخستنا وان ژ كوردستانێ .
ئه‌وا ئه‌ڤرۆ ل شنگال به‌رپرسیاره‌تیا ئه‌خلاقی یا حكومه‌تا عیراقا فیدراله‌ ، ژ ئه‌گه‌رێن جۆراوجۆر ، ب تایبه‌ت كو ژ ده‌ست پێكا ڤان روودانان یا بێ هه‌لویست بوو و رۆلێ دیتنێ ب تنێ ئه‌نجام دایه‌ ل ماوێ ڤان شه‌ش سالێن بۆری هه‌تا ئیمزاكرنا رێكه‌فتنناما شنگالێ ل گه‌ل حكومه‌تا هه‌رێما كوردستانێ كو تێدا بابه‌تێ ئیمناهیێ و ده‌رئێخستنا هه‌موو گرووپێن چه‌كداری ژ شنگالێ یه‌كلادكه‌ت .

لێ هه‌ڤدژی ناڤه‌رۆكا رێكه‌فتننامێ ئه‌ڤرۆ گرووپێن چه‌كدارین حه‌شدا شه‌عبی و په‌كه‌كه‌ بارودۆخێ ئه‌منی تێكبده‌ن ، ژ شوونا كو رۆلێ چاره‌سه‌ركرنێ ببینن و شنگالێ چۆل بكه‌ن ، ب ڤی كاری ئه‌ڤ گرووپێن چه‌كدار ده‌رفه‌تێ دره‌خسینن بۆ ده‌وله‌تێن دراوسێ كو مایێ خۆ ل كاروبارێ ناڤخۆیی یێ وه‌لاتی بكه‌ن .
ل ڤێره‌ هنده‌ك پرسیار درووست دبن :

٭ ئه‌گه‌رێ هه‌ڤركیێن ناڤده‌وله‌تی ل شنگال چنه‌؟؟
٭ بۆچی هه‌رجار شنگال دبیته‌ قوربانی ؟؟
٭ ئه‌رێ ئه‌م دشێن هه‌بوونا حه‌شدا شه‌عبی ب پێنگاڤێن دانانا سنورێن هه‌یڤا شیعی ل شنگال ؟؟
٭ ئه‌رێ توركیا دڤێت هه‌ڤركیێن خۆ ل گه‌ل په‌كه‌كێ ل شنگالێ یه‌كلابكه‌ت؟؟
٭ ئه‌رێ شنگالا وێران بوویه‌ ده‌روازه‌یه‌كا بازرگانی بۆ هنده‌ك وه‌لاتان ؟؟


وەرگێران : حسین شنگالی
۱۹ی ئادارێ ۲۰۲