کۆنگرە مەزنترین دەستھەڵاتا حزب و رێکخراوایە کۆ ھەر چەند ساڵا جارەکێ دھێتە بەستن و ھندەک جاران لدیڤ رەوش و کاودن و گۆڕانکاریا کۆنگرێن پێشوەخت دھێنە بەستن .
مەبەست ل بەستنا کۆنگرێ پێداچوونەڤە و ھەلسەنگاندنە ل کار و بەرنامە و چالاکیێن وێ پارتیێ یان رێکخستنێ دناڤبەرا دوو کۆنگراندا و دارشتنا کارنامە و بەرنامێ وێ یێ سیاسی و دیارکرنا ستراتیژیەتا وێ یا ناڤخۆیی و دەرڤە بۆ قۆناغێن داھاتی و دارشتنا پەیرەو و پرۆگرامەکێ نوی کۆ دگەل سەردەمی بگۆنجیت و ھەلبژارتنا دەستەیەکا نوی بۆ سەرکردایەتیێ .
پارتی دیموکراتی کوردستان وەکی مەزنترین و کاریگەرترین و پڕدەستکەفترین پارتیا کوردستانی بریار دایە کۆنگرێ خۆ یێ چاردێ ل ٢٦/گوڵانا ئەڤ سالە ببەستین ، ئەڤە ژی وەرچەخانەکا مەزنا سیاسی و جڤاکی یە لسەر ئاستێ کوردستانێ و عیراقێ ، ژبەر ئاستێ وێ یێ جەماوەری و سەنگا وێ یا سیاسی .
کینە ئەندامێن کۆنگرێ ..؟ ئەڤە پرسەکا گرنگە، چونکێ ئێک ژ مەرج و فاکتەرێن سەرکەفتنا ھەر کۆنگرەیەکی ، ئەندامێن کۆنگرێ نە ، راستە گرنگە ئەندامێن کۆنگرێ د پرۆسێسەکا دیموکراستی دا ژلایێ ئەندامێن وێ پارتیێ بھێنە ھەلبژاردن ، لێ مەرجەکێ سەرەکی نیە، بتایبەت بۆ جڤاکێ کوردستانێ و ئەندامێن پارتیێن کوردستانی، چونکی ھێشتا لسەر بنەمایێ سۆز و ڤیانێ لایەنگریا خۆ دەردبرین، نەک لسەر بنەمایێ شیان و ئاستێ ھشیاری و رەوشەنبیری و ...ھتد . ئەز نابینم ھەلبژاردنا ئەندامێن کۆنگرێ دڤێ رەوشێ دا ببیتە ئەگەرێ دەستنیشانکرنا کەسێن ھەژی بۆ ئەندامەتیا کۆنگرێ .
پێتڤی یە سەرکردایەتیا پارتی و لیژنا ئامادەکاریا کۆنگرێ ژی لسەر بنەمایێ سۆز و ڤیانێ و پێگەھێ جڤاکی و پلەداریێ ئەندامێن کۆنگرێ دەست نیشان نەکەت ، ژبلی ئەندامێن سەرکردایەتیێ و ھندەک کادرێن بەرچاڤ کۆ رۆلێ وان ل راگەھاندنێ یێ دیار و بەرچاڤ ، کادرێن خۆ یێن رەوشەنبیر و راگەھاندکار و چالاکڤان و خۆدان ئەزمۆن وەکی ئەندامێن کۆنگرێ دەست نیشان بکەت ، مەرج نیە پلەکا بلندا پارتایەتی ھەبیت .
چونکی کادرێن بڤی رەنگی گرنگی و بەرپرسیارا کۆنگرێ دزانن ، دێ شێن گەنگەشێن باش و ئەرێنی لسەر پەیرەو و پرۆگرامی و ستراتیژیەتا داھاتی کەن و لدەمێ ھەلبژاردنا ئەندامێن سەرکردایەتیێ ژی ناکەڤنە بن کاریگەریا کەسایەتیا ، ژبلی ڤێ چەندێ زێدەتر ل خەلکەکێ پلەدار دناڤ جەماوەر و ئۆرگانێن خوارێ پارتی دانە و خالێن بھێز و لاواز دزانن و وێرەکیا دەست نیشانکرنا وان و ئاراستەکرنا رەخنێ ژی ھەیە .
چوونا وان بۆ ناڤ ھۆڵا کۆنگرێ بۆ سەرکەفتنا کۆنگرێ و دارشتنا پلانەکا درێژخایەن و باشترکرنا پارتی یە لپێش چاڤێن خەلکی . نەک وەکی گەشتەکێ و کەنڤالەکا وێنەگرتنێ .
ئەز باوەرم سەرکردایەتیا پارتی ب رێنمایی یێن سەرۆک بارزانی بەرنامەکێ موکم و ئەرێنی دارشتی یە کۆ ئەڤ کۆنگرەی ژی مینا ھەمی کۆنگرێن بەرێ یێ سەرکەفتی بیت و ل قوناغێن داھاتی دەستکەفتێن مەزنر بدەست بینیت ، چونکی پارتی ئەزمۆنەکا درێژ ل خەباتا سیاسی و جەماوەری و کارگێری ھەیە و ھژمارەکا زۆرا کادر و شارەزایێن سیاسی و ستراتیژی ھەنە بۆ دارشتنا رێکخستی بۆ سەرکەفتنا کۆنگرێ .
لێ ئەڤا ئەز دبێژم تنێ پێشنیارن و ب دیتنا من د بەرژەوەندا پارتی دایە و ب دیتنا رەئیا زۆرینەیا کادر و ئەندام و جاماوەرێ پارتی یە .