بریارە پارتی دیموکراتی کوردستان چاردەمین کۆنگرێ خۆ لرۆژا ٢٦ ێ گوڵانێ گرێبدەت ، سالرۆژا بەرپاکرنا شۆرەشا گوڵانا پێشکەفتنخواز ل سالا ١٩٧٦ ، دوور ل چالاکیەکا مەزنا پارتایەتی ئەڤ کۆنگرە بیرا مرۆڤی لڤێ شۆرەشا پێشکەفتنخواز دئینیت ، چونکی بەرپابوونەڤا ڤێ شۆرەشێ پشتی بۆرینا نێزکی چاردە مەھان ل پیلانا خیانەتکاریا نیڤ دەولەتیا ( جەزائیر ) ل (٦) ێ ئادارا سالا ١٩٧٥ دژی بزاڤا رزگاریخوازیا کوردی و شۆرەشا مەزنا ئیلۆنێ ب رێبەریا پارتی دیموکراتی کوردستان و بارزانی نەمر .

بەرپابوونا شۆرەشا گوڵانێ ل وی دەمی پەیام و نامەیەکا بھێز بوو ، ئاراستەی رژێما عیراقێ و پشکدارێن وێ رێکەفتنا خیانەتکاری و جڤاکێ نیڤ دەولەتی ھاتیە کرن ، کۆ ئیرادا خەلکێ کوردستانێ و چریسکا بزاڤا رزگاریخوازیا کوردی و شۆرەشا ئیلۆنێ ل وێ پیلانێ مەزنترە و ناھێنە ڤەمراندن ، چونکی دوی دەمێ کورت دا سەرکردایەتیا پارتی دیموکراتی کوردستان ب سەرپەرشتیا سەرۆک مەسعود بارزانی و رێنمایی یێن نەمر مستەفا بارزانی شیا پێداچونەڤە و ھەلسەنگاندنەکا تێر و تەسەل ب فاکتەر و ئەگەرێن ناڤخۆیی و دەرڤە یێن وێ رێکەفتنا خیانەتکاری و خالێن بھێز و لاوازێن شۆرەشا مەزنا ئیلۆنێ و ئۆرگان و رێکخستنا پارتی دیموکراتی کوردستان دا بکەت و پلانەکا دارشتی و درێژخایەن دابرێژین بۆ قۆناغا داھاتی .

شۆرەشا گۆلانا پێشکەفتنخواز لسەر وێ پلان و وی بەرنامێ دارشتی ھەر زوی ھێزێن پێشمەرگەھێن کوردستانێ ب شێوازەکێ نوی و پێشکەفتیتر ھاتنە پێکئینان و رێکخستن ، رێکخستنێن پارتی دیموکراتی کوردستان ژی ل دەرڤە و ناڤخۆ ل پرانیا دەڤەرێن کوردستانێ ھاتنەڤ پێکئینان و کۆمکرن دناڤ جەرگێ رژێما بەعس دەست ب چالاکیا کرەڤە و پێشمەرگەھی ژی ب سەرۆکاتیا سەرۆک بارزانی و رێنمایی یێن بارزانی نەمر وەنەکر خەتیرا شۆرەشا مەزنا ئیلۆنێ مەڤریت و بناڤێ شۆرەشا گوڵانا پێشکەفتنخواز گەشتر بوو .

دارشتنا وێ پلانێ مینا کۆنگرەکێ نەتەوی بوو بۆ بزاڤا رزگاریخوازیا کوردستانی ل باشوور و ھەر زور بەرھەمێ وێ ئۆمێد بۆ خەلکێ کوردستانێ زڤران و ئەو بێ ئۆمێدیا پشتی رێکەفتنا خیانەتکاریا نیڤ دەولەتی یا جەزائیر ڤەرەڤاندن و ئۆمێدا خەلکێ وەلات پەروەرێ کورد ب پاشەرۆژێ گەش کر و بەرھەمێ وێ چەندین داستانێن مەزن و بێ وێنە بوون بسەر لەشکرێ رژێما عیراقێ و رێکخستنەکا پۆلایی و ئامادەکاریێن سەرھەلدانا پیرۆزا سالا ١٩٩١ و ئێکرێزیا ھێز و ئالیێن سیاسی .

ھیڤی یە کۆنگرا چاردێ یا پارتی دیموکراتی کوردستان کۆ بریارە ل ٢٦ ێ گوڵانا ئەڤ سالە بھێتە بەستن مینا شۆرەشا گوڵانا پێشکەفتن خواز ببیتە ئەگەرێ گۆرانکاریێن بنەرەتی ل ئۆرگانێن پارتی دیموکراتی کوردستان و ڤەگەراندن بۆ دادوەریا رێبازا بارزانی و بارزانی نەمر و شۆرەشێن ئیلۆن و گوڵانێ ، چونکی رەوشا کادر و ئۆگانێن خوارێ یێن پارتی و رێکخستنێن وێ ھەتا رادەیەکێ زۆر مینا پشتی رێکەفتنا خیانەتکاریا جەزائیر تووشی بێ ئۆمێدیێ بوونە ژبەر لاوازیا دادوەریێ و رەوشا دارایی و ھەلسەنگاندنێ و ھەبوونا دیاردا واستەکاریێ ل دەمێ پلەبلندکرنێ و پاداشتان دا .

کادر و ئەندام و جەماوەرێ پارتی ب چاڤەکێ مەزن بەرێ خۆ ددەتە کۆنگرێ چاردێ یێ پارتی و چاڤەرێ یە مینا بخۆداچوونەڤا پارتی پشتی سالا ١٩٧٥ و دارشتنا پلان و بەرنامەکێ مۆکم بۆ شۆرەشێ و رێکخستنێن خۆ ، خۆداچوونەڤێ ب رێکخستن و ئۆرگان و کادرێن خۆدا بکەت ، دا ل قۆناغا داھاتی دا ، بێ ئۆمێدی نەمینیت و گەشبینیەکا زێدەتر دناڤ کادر و رێکخستنان دا بەڵاڤ ببیت و خال و مادێن پەیرەو و پرۆگرامی بھێنە بجھئینان و مینا سەرکەفتنا شۆرەشا گوڵانێ دەسکەفت و سەروەریێن مەزنتر ببنە بەرھەم و دەسکەفتێن کۆنگرێ چارێ و رێبازا بارزانی و ئەم وەکی پارتی ببینە خودان دوو شۆرەشێن مەزنێن گوڵانا پێشکەفتنخواز .