ل شەڤا ١٥ -- ١٦/ ٢/٢٠٢١ ھێرشەکا مۆشەکی لسەر ھەولێرا پایتەختێ ھەرێما کوردستانێ ھاتەکر ، بەحسێ زیان و زرارێن وێ ناکەین، رەنگە ل قەبارێ ھێرشکرنێ زۆر بچوکتر بن ، لێ رامان و پەیامەکا مەزن و دژوارە ، نە تنێ ھەوڵەکا تیرۆرستی یە بۆ تێکدانا رەوشا ئارامیا ئارامترین باژارێن عیراقێ و وەلاتێن دەور و بەر ، بەلکی ئاشکراکرنا پیلانەکا ھەرێمی یە دژی قەوارێ ھەرێما کوردستانێ، ئەو قەوارێ بوویە ئێمناھیترین و پێشکەفتیترین دەڤەر لسەر ئاستێ عیراقێ و خودان بریارا خۆ یا سەربەخۆ ، جودا ل عیراقێ کۆ سەنگ و بریارا خۆ یا سەربەخۆ لدەست دایە و بتەمامی کەفتیە بن بریار و رێنمایی و ئەجنداریێن وەلاتەکێ ھەرێمی یێ دیارکری و ھەوسارێ وێ کەفتیە د دەستێ وی وەلاتی دا ، کیڤە دڤێت دێ بەرێ وێ دەتەوێ کۆ ئیرانێ .
ئەڤ ھێرشێن مۆشەکی بۆ سەر ھەولێرا پایتەخت زەنگەکا مەترسیدارن دژی قەوارێ ھەرێما کوردستانێ و پرۆسا ئازادی و دیموکراسی و ئارامیا دەڤەرێ و بەرژەوەندێن وان وەڵاتێن کونسلخانە و نوونەرایەتی ل ھەرێما کوردستانێ ھەی و بەرژەوەندێن وان یێن سیاسی و ئابووری گەل یێن ھەرێما کوردستانێ تێکەل بووی .
ئەڤ تێکەلبوونا بەرژەوەندێن ھەرێمێ دگەل یێن وان وەڵاتان دبەرژەوەندا گرۆپ و میلیشیایێن چەکدارێن عیراقی بتایبەت یێن شیعی نینە ئەوێن رێنما و بریارا ل ئیرانێ وەردگرن ، لەوما ھەمی ھەوڵا ددەن رەوشا کوردستانێ مینا دەڤەرێن دی یێن عیراقێ لێبکەن داکۆ بشێن پرۆژێ شیعەگەریا ئیرانێ ل سەرانسەرێ عیراقێ ب کوردستان ژی ڤە بجە بینن ،
ئەو پرۆژێ کۆ ھەولێر بوویە مەزنترین ئاستەنگ بەرامبەر وان . چونکی ھەمی ھەوڵێن وان یێن بەری نھو وەکی بڕینا بۆدجە و مۆچی َ ھەرێما کوردستانێ و سەپاندنا گەماروویێن ئابووری و سیاسی و پاشان ھێرشێن چەکدارێن میلیشیایێن حەشدا شیعی و ھندەک وەڵاتێن ھەرێمی پشتی خیانەتا ١٦ ێ ئکتۆبەرا سالا ٢٠١٧ سەرنەگرتی و تووشی شکەستنێن مەزن بوون لسەر دەستێ پێشمەرگەھێن کوردستانێ و سیاسەت و لێزانین و حیکمەتا سەرۆک بارزانی و سەرۆک نێچیرڤان بارزانی و ھێزێن پاراستنا ئێمناھیا کوردستانێ .
پێتڤی یە خەلکێ ھەرێما کوردستانێ پشتی ڤان ھێرشا دەستا ل بەرژەوەندێن بەرتەسکێن حزبایەتی بەردەن و ژبووی بەرژەوەندێن گشتی و پاراستنا قەوارێ ھەرێما کوردستانێ گڤاشتنا لسەر حزبێن کوردستانی بکەن بتایبەت پارتی و ئێکەتیێ بۆ سازان و ئاشتەوایا سیاسی داکۆ پێکڤە ببنە ھێزەکا پۆلایی بۆ خۆڕاگرتن و زاڵبوون لسەر ڤان پیلانێن دەولەتەکا ھەرێمی و گرۆپ و میلیشیایێن چەکدارێن عیراقێ ، ئێکگرتن و ئێکرێزی و ئێک ھەڵویستیا وان تاکە رێکە بۆ ھەڵوەشاندنا ڤان پیلانا، ھەر لایەنەکێ کوردستانی ئەگەر دگەل ئێکرێزیێ نەبیت و ببیتە پشکەک یان ھەڤپەیمان لگەل وان لایەنێن پیلانگێرێن عیراقی دژی کوردستانێ پێتڤی یە ژلایێ خەلکێ کوردستانێ بھێنە شەرمزارکرن .
چونکی بسەرگرتنا ڤێ پیلانان وان، لدەستدانا دەسکەفتێن نەتەوی و نشتیمانی یێن کوردستانێ نە و زیانێن وێ بۆ تەڤایا خەلکێ کوردستانێ بێ جوداھیێن بیر و باوەرێن حزبایەتی و ڤەگراندەنە بۆ سەردەمێ داگیرکاریێ و بعەرەبکرنێ و دکتاتوریەتێ .
جھێ دلخۆشیێ یە پڕانیا سازیێن نیڤ دەولەتی و وەلاتێن جیھانێ و ھەڤپەیمانیا بسەرۆکاتیا ئەمریکا ئەڤ ھەوڵە ماندەل کرینە، ئەڤە ژی جھێ دلخۆشیا خەلکێ کوردستانێ یە و نیشانێ ھندێ یە کۆ کوردستان یا پاراستی یە و پشکەکا کاریگەرە ل وێ ھەڤپەیمانیێ ، دیسان بەڵگەیە لسەر سەرکەفتنا سیاسەت و دبلۆماسیەتا کوردستانێ دگەل وەلاتێن مەزن و ھەڤپەیمان .
ھیڤی یە ئەڤ پیلانە ببیتە دەرفەتەک بۆ دەسپێشخەریکا ئاشتەوایا سیاسی دناڤبەرا ھەمی ئالیێن سیاسی یێن کوردستانی لسەر دەستێ سەرۆک مەسعود بارزانی و سەرۆک نێچیرڤان بارزانی سەرۆکێ ھەرێما کوردستانێ داکۆ ھەمی ببنە ئێک ھێز و ئێک بریار بۆ پاراستن و بھێزکرنا قەوارێ ھەرێما کوردستانێ و ھەلوەشاندنا پیلانێن داھاتی یێن دوژمن و نەیارێن کوردستانێ .