کۆێلە ئانکۆ ( عبد ) بوویە شیرێ ئێکتر شکاندن و بریندارکرنێ و تاونبارکرنێ، بتایبەت ل سوشیال میدیا ھەڤدژ و دوژمنکاری ، تشتەکێ نۆرمالە ھەر کەسەکی یان لایەنەکی راگەھاندن و سۆشیال میدیا یا خۆ یا تایبەت ھەبیت و تێدا چالاکیێن خۆ بەلاڤ بکەت و بەرەڤانیێ ل ھزر و بیر و بۆچوونێن خۆ بکەت ، لێ مخابن لڤی سەردەمی زۆر ل بکارئینەرێن سۆشیال میدیایێ ڤێ تەکنەلۆژیایێ دکەنە چەکەکێ ژەھردار و ل کەس و لایەنێن ھەلگرێن بیر و بۆچوونێن جودا ژ بیر و بۆچوونێن خۆ د وەشینن ..!
دڤێرەدا دیار دبیت کۆ ئەو کەسێن ڤێ رەفتارێ دکەن یێن سۆشیال میدیایا جڤاکی ب شێوازەکێ بەرۆڤاژی بکار دئینن زیانەکا مەزن دگەھینە ئاشتەوایا جڤاکی .
دڤێرەدا بابەتێ من نە لسەر سۆشیال میدیایێ یە لێ دیاردا بکارئینانا کۆێلە بەرامبەر کەسێن دیتر ئەوێن بەرەڤانیێ ل ھزر و دیتنەکا تایبەت یا سیاسی دکەت نھۆ بەربەڵاڤ بوویە ، بێ کۆ بزانیت ئانکۆ دیار بکەت کۆ ئەو ژی زێدەتر ل کەسێ بەرامبەر یێ کۆێلایەتیێ دکەت و لەوما بڤی شێوازەی خەلکەکی تاوانبار دکەت .
زۆر جارا تۆ کۆێلێ فلان حزبیێ یان فلان کەس و بنەمالێ د کۆمێنتێن خەلکەکی دا دبینین لسەر ھندەک پۆستان ل سۆشیال میدیایێ ، بێ کۆ ناڤەرۆکا بابەتی بدرۆستی بخوینن ، یان خۆدانێ بابەتی بناسن ...!
جھێ پسیارێ یە ئەرێ بۆچی لدەمێ تۆ بەڕەڤانیێ ل ئایدیولۆژیەکا تایبەت دکەی ، شانازی و سەرفیرازی بیت ، لێ کەسێ بەرامبەر لسەر ھەمان پرس بکەیە کۆێلە ..؟!
ئەگەر ئەڤ ھەمی خەلکێ پشتەڤانیا ھزر و ئالیێن سیاسی یێن تایبەت دکەن ل سۆشیال میدیایێ ھەمی کۆێلەبن ، ئەرێ رێژا ئازادیخواز و دیموکرتخوازا ل کوردستانێ دێ چەند بیت ..؟ ئەرێ کۆێلەکرنا خەلکی چ مفایێن جڤاکی تێداھەنە ..؟
ئەرێ ئەو پێشمەرگەهــ و شۆرەشگێرێن کوردستانی ئەوێن چەندین سالە خەباتێ دکەن و قوربانیا ژ پێخەمەت رزگاریا کوردستانێ و دیموکراسیکرنا جڤاکی دکەن کی بوون ..؟ چ لێھاتینە و ل کیڤەنە ..؟! بۆچی بەری نھۆ ھەمی شۆرەشگێر و ئازادیخواز بوون ، ئەڤرۆ کۆێلەنە ..؟! .
دڤێرەدا دیار دبیت ھندەک کەس و ئالیێن سیاسی یێن کار لسەر تێکدانا شێوازێ جڤاکی و سیاسی یێ کوردستانێ دکەن و بەرژەوەندێن خۆ یێن تایبەت و یێن حزبایەتی ل بەرژەوەندێن نشتیمانی و نەتەوی مەزنتر دکەن ، ژبوی ھندەک دەسکەفت و بەرژەوەندێن مادی و رازیکرنا سپۆنسەرێن خوو .
ئەگەر بکارئینەرێن ڤێ پەیڤێ کۆێلە نەبن ، خەلکەکی ناکەنە کۆێلە..! ، ئەگەر وەلات و جڤاک و دەسھەڵاتا کوردی بڤێت ، دێ کار لسەر ئاشتەوایا جڤاکی و پێکڤە ژیانێ کەن و ھەڤکارێن حکومەت و دەسھەڵاتا کوردستانێ بن بۆ پاراستن و بھێزکرنا قەوارێ ھەریما کوردستانێ .
پیتڤی یە جھێ ڤێ چەندێ ب ھەستەکا نشتیمانی و نەتەوایەتی ھەلسەنگاندنا ئالیێن سیاسی و سیاسەتمەدارێن کوردستانی بکەن بۆ ژێک ڤاڤارتنا بەڕەڤانکارێن دەسکەفتێن خەلکێ کوردستانێ ئەوێن سەدان سالە خەونا پێڤە دبینن و بسەدا ھزارا شەھید ژپێخەمەت داینە و ئەوێن بووینە دیڤەلانکێن داگیرکارا و ب سپۆنسەریا وەڵاتێن داگیرکار ب پیلانێن رێکخستی یێن وان کار لسەر لاوازکرنا پێگەهێ هەرێما کوردستانێ و ڤەگەراندنا بریارا پاشەرۆژا هەرێما کوردستانێ یا سیاسی و ئابووری بۆ بەغدا یا پایتەختێ عیراقێ کۆ بوویە بنگەهێ شوفینیەتێ و مەزهەب پەرستیێ و قەبۆلنەکرنا ئەوێ دی .
ئەگەر وە گەل و وەڵاتێ خۆ بڤێت نە دبنە کۆێلە و دیڤەلانکێن کەسی ، نە کۆێلایەیێ ل کەسی قەبۆل دکەن ، بەلکی دێ بنە فاکتەرێن ئاشتی و ئاشتەوایێ و برایەتیێ و بەختەوەریا جڤاکی و پاڵپشتێن کوردستانەکا بهێز و ئارام و کەسی ب کۆێلە نابینن .