ل ھەمی دەما و دناڤ ھەمی گەل و وەڵاتان دا بەرامبەر خەباتکار و شۆرەشگێرێن ژ پێخەمەت ئازادی و رزگاریا گەل و وەڵاتی خۆفرۆش و خیانەتکا ھەنە ، ئانکۆ بەرامبەر شۆرەشگێرا شۆڕیشڤەگێر ھەنە .

گەلێ کورد و بزاڤا رزگاریخوازیا کوردستانی ھەر لسەردەمێ میرگەھێن کوردی ھەتا دگەھیتە شۆڕەشێن نەتەوی و نشتیمانی و سەرھەلدانێ، جەماوەری لڤێ خیانەتا ھندەک سیاسەتمەدارا یا ڤالا نەبوویە ، خیانەتا وان کاریگەری لسەر لاوازکرنا شۆڕەش و دەسھەلادارێن کوردی ھەبوویە و رەنگە فاکتەرێن سەرەکی یێن ژناڤچوونا وان بن .

لەوما نفشێ نھۆ یێ کوردان گلە و گازندا ل باب و باپیرێن خۆ بکەن و رەخنێ لێ بگرن ژبەر ھەبوونا خیانەتێ دناڤدا و نە ئێکگرتنا وان ، ھەمی دبێژن ژبەر خیانەتێ کورد نەگەھشتینە ماف و ئارمانجێن خۆ یێن نەتەوی و نشتیمانی و ناگەھنێ ژی ..!
راستە ئەڤ خیانەتە ل ھەمی دەم و جھا ھەیە و لێ ھەبیت ھەر لسەر ئاستێ بەرپرس و پلەدارا ھەتا دگەھیتە ئاستێن خوارێ ، ئەڤەژی تاوانەکا مەزنا نشتیمانی و نەتەوی یە ، لێ پێتڤی یە لسەر ئاستێ جەماوەری خیانەتکار خۆ فرۆش نەخاسمە ئەوێن پلەدار و خۆ ب سەرکردە دبینن بھێنە شەرمزارکرن بتایبەت لڤی سەردەمێ رەوشەنبیریێ و راگەھاندنێ و سۆشیال میدیایێ و تەکنەلۆژیا سەردەم ، ب دیتنا من پشتەڤانیا کەسێن خائین و خۆفرۆش و وەڵات فرۆش ژلایێ جەماوەری ل تاوانا خیانەتا وان مەزنترە .

ئەگەر بێینە سەر رەوشا ھەرێما کوردستانێ ، ھەبوونا ڤی قەوارێ یاسایی و دەستووری ، و دەسکەفتەکێ ھەرە مەزنە ل دیرۆکا گەلێ کورد و بزاڤا رزگاریخوازیا کوردستانی دا و ھیڤی یەکە بۆ پاشەرۆژا کوردا ل ھەر جھەکێ ھەبیت ، ئەڤ قەوارە بناغەیەکە بۆ مەزنترکرنا دەسکەفتێن دیتر ھەتا دگەھینە ئارمانجا داویێ کو سەربەخۆیی یە ، ژبەر ڤێ چەندێ نەیار و دوژمنێن گەلێ کورد پەنا بریە بەر درۆستکرنا نۆکەر و خیانەتکارێن کورد کۆ دژی ھەرێما کوردستانێ براوەستن و پشتەڤانیا داگیرکرنەڤە و لاوازکرنەڤا وێ بکەن .

ئەڤ قەیرانێن نھۆ حکومەتا ناڤەندیا عیراقێ ئەوا لژێر کۆنترۆ شوفینیا عەرەبی لسەر ھەرێمێ سەپاندی و ناکۆکیێن بۆ کوردستانێ درۆست کری ژئەنجامێ نە ئێکرێزیا ھێز و ئالیێن سیاسی یێن کوردستانێ و گۆڕینا کوردایەتیێ و نەتەوایەتیێ و پارێزەریا دەسکەفتێن نشتیمانی یە ب خیانەت و وەلات فرۆشیێ و بازرگارنیێ و نۆکەریێ یە ژلایێ سەرکردێن ھندەک پارتیێن خۆ ب کوردستانی ھژمار دکەن ،

چونکی ئەو سیاسی و پەرلەمانتارێن وان پارتیا بووینە پشکەک ل پرۆژێ شیعەگەری و شوفینیەتا عەرەبیا عیراقی دژی ھەرێما کوردستانێ و درۆستکرنا ناکۆکیێن سیاسی و سەپاندنا وێ قەیرانا ئابووری ئەوا لایەنێن سیاسی یێن عەرەبی لسەر ھەرێما کوردستانێ سەپاندی وەکی بڕینا بودجە و مۆچێ ھەرێمێ و داخازیێن نەدەستووری و نەیاسایی یێن عیراقێ بۆ کۆنترۆلکرنا نەفت و داھاتێ کوردستانێ .
ئەڤ مەرجێن گرانێن عیراقێ لسەر ھەرێما کوردستانێ راستەوخۆ ھەولێن لاوازکرن و نەھێلانا قەوارێ دەستووریێ ھەرێما کوردستانێ نە .

راستە ئەڤ ھەولێن عەرەبێن شۆفینی یێن عیراقێ تاوانێن مەزنن بەرامبەر ھەرێما کوردستانێ ، لێ تاوانا وان سیاسی و پەرلەمانتارێن کورد ئەوێن پشتەڤانیا پرۆژێن شیعەگەری و شۆفینیەتا عەرەبی دکەن مەزنترە ، چونکی سرۆشتێ شوفینیەتا عەربی بەرامبەر کوردستانێ ئەوە لدەمێ لاوازیێ کوردا ب برا و ھەڤپشک دبینن و لدەمێ بھێزبوونێ دا خەونا ب عیراقولعەزیم و ژناڤبرنا کوردا دبینن ..!

لێ جھێ حیبەتیێ ئەوە لڤی سەدەمێ پێشکەفتنا تەکنەلۆژیایێ و رەوشەنبیریێ و زانستی خەلکەکێ سیاسی ھەبیت ھێشتیا نۆکەیا داگیرکارا بکەت و بازرگانیێ ب وەلاتی و دەسکەفتێن نەتەوی و نشتیمانی بکەت و بۆ خۆ بکەتە شانازی ، یا ژڤێ حیبەتی تر ئەوە ھێشتا خەلکەکێ ھەی شانازیێ ب وان وەلات فرۆش و ھەلگرێن پرۆژێن دووبەرەکیێ و لاوازکرنا پێگەە و دەسکەفتێن کوردستانێ دکەن .

پێتڤی یە خەلکێ نشتیمان پەروەر و تێھنی یێن ئازادی و رزگاریا کورد و کوردستانێ دکاودانێن دژوار و ئاسایی دا ببنە پشکەکا کاریگەر بۆ پرۆژێن نەتەوی و نشتیمانی بۆ بھێزکرن و مەزنتر کرنا دەسکەفتا و دژی ھەر پرۆژەکێ د خزمەتا داگیرکار و شوفینیەتا عەرەبی بیت راوەستن ، ئانکۆ بەرژەوەندێن نەتەوی لسەرڤەی بەرژەوەندێن حزبایەتی دابنێن .

لسەر حکومەتا ھەرێما کوردستانێ و سەرکردایەتیا ھەرێمێ و ئالیێن سیاسی یێن کوردستانی ئەوە رەوشا ئابووری یا خەلکێ کوردستانێ بەرچاڤ بگرن و ھەلگرێن پرۆژەکێ ئێکگرتی بن بۆ چارەسەرکرنا پرسا مۆچێ خەلکێ کوردستانێ و زاڵبوون بسەر ڤێ قەیرانا ئابووری و خۆ گونجاندن لگەل بەرژەوەندێن وەلاتێن باندۆر و کاریگەر لسەر عیراقێ و تێکەلکرنا بەرژەوەندێن وان لگەر بەرژەوەندێن کوردستانێ ،

خۆشبەختانە ژلایێ سیاسی و ئابووری دەرفەتا ھەی ئەو وەلات زێدەتر نێزیکی کوردستانێ ببن و پشتەڤانیا کوردستانەکا بھێزتر بکەن ، چونکی ئەو پیلانێن ھەرێمی یێن دژی قەوارێ ھەرێما کوردستانێ بتایبەت یێ شیعەگەری دژی بەرژەوەندێن وەلاتێن زلھێز و دیموکراتخواز و ئارامیا دەڤەرێ نە بتایبەت ئەمریکا .