دیارە ماوەیەکە ژ ئالیێ زورەک ژ حزب و پارتێن سیاسی ڤە ل هەرێمێ ئەو گرژی و ئالوزیێن دناڤبەرا هەرێمێ و پەکەکێ دا روو ددن دهێن پێناس کرن ب شەڕێ دناڤبەرا پارتی و پەکەکێ دا،ئەڤە د دەمەکێ داکو هەرێما کوردستانێ وەکو هەرێمەکا دەستوری دان پێدای پارچەک ژ ولاتەکێ ب ناڤێ ئێراقە و پەکەکە ژی وەک پارتەکا کوردی کو مەیدانا خەبات و چوار چوڤێ بەرخوەدانا وێ ل دژی وەلاتەکێ یە ب ناڤێ تورکیا کو پەکەکە وەک هێزەکا چەکدار خوە ب خوادنا کێشەیا کوردا ل باکور کو پارچەکە ژ تورکیا ددت ناساندن...

لێ ئەوا سەیر ئەوە کو هەر ژ سالێن هەشتیان دا و هەتا نها پەکەکێ مەیدانا خوە حەشاردان و خەباتا خوە ل باشور دا چوارچوڤ کریە ،ئەڤە چەندە ب تایبەت پشتی سەرهلدانا بهارا 1991ێ هاتیە بەرچاڤ کرن و دوو جاران ژی بەرخوەدانا خوە ل دژی هەرێما کوردستانێ راگەیاندییە،،ئەڤ بزاڤ و لڤینێن نابەجێ یێن پەکەکێ پشتێ هێرشا رێکخستیا تروری یا داعش بو سەر هەرێمێ پەکەکێ ب دەلیڤە دیتنە و روژ بو روژ زێدەتر بوویە بگرە هەموو هەولێن خوە ژی ددت بن پێ کرنا سەروەریا هەرێمێ ژ ئالیەکێ ڤە و سەپاندنا بریار و ویستێن خوە ژ ئایلەک دی ڤە، ئەوا جهێ مخابنی یێ ئەوە کو ل باشور ژی پارت و ئالیێن سیاسی هەنە کو هەڤرکیا سیاسی دناڤبەرا خوە و پارتی دا کرینە بهانەیەک بو تاگیرا پەکەکێ ب مەبەستا لاوازکرنا پێگەها پارتی ،هەلبەتە ئەڤ مژارە ژی هەڤیرەکە زور ئاڤێ د هەلگریت، و هەر کەسەێ ب هویری چاڤدێریا بارودوخێ سیاسی یێ ناوچەیێ کربیت باش دزانیت سەرچاوەیێ ڤان ئالیا ژ کیڤەیە و ب چ مەبەست ل دژی پارتی دهێن هاندنان،هەر چەندە مروڤ سەرسورمایی دمینت کو ئالیێن سیاسی ژ لایەکێ هەپشکێن پارتی بن د حکومەتێ و پەرلەمانێ هەرێمێ دا کو ل گور هەردوویان بوونا پەکەکی ل باشور نایاسایی یە،لێ دهەمان دەم دا ئەڤ ئالیە ل هەمبەر بن پێ کرن و فشارخستنا لسەر حکومەتێ د بێ دەنگ و بێ هەلویست،

بوونا پەکەکێ ژ بلی بێ رێزی کرن ب هاوەلاتی دەستهەلاتا باشور و کاڤل مانا سەدان گوندێن سنوری ،بوویە ئەگەرا هندێ کو ئەڤ دەڤەرێن سنوری بەردەوام ل ژێر رەحما بومبە و ئوپراسیونێن تورکیا دا بمینن، و هەردەم تورکیا ئەڤ هەبوونا وان ل دەڤەرێ ب دەلیڤە زانیە بو بەزاندنا سنورێت هەرێمی و دیسان فشار خستنا سەر هەرێمی،بزاڤ و رێکخستنێن پەکەکێ ب تنێ ل دەڤەرێن سنوری نە راوستیاینە ئێدێ ب هەڤکاریا ئالیێن ناڤخوە وەک مە لسەری ئاماژە پیدایی دەربازی ناڤا شارو شاروچەکیان بوویە ،بێ حاشایە ل ئەوا دبێژنێ زونا کەسک ئێدێ ژ ئەنجامێ وێ ئاسانکاریا ب هاتیە کرن بوویە خوادن بڕیار ژی و هەبوون و بەلاڤ کرنا ئیراهابا فکری ل ناوچێ و بن پێ کرنا سەروەری و پیروزیا ل باشور ب گشتی و زونا کەسەک ب تایبەت ب زوری پەیوەستە ب وێ ئیرهابا فکری ڤە،

دیارە پشتی ئوپەراسیونا ڤێ داویێ یا پەنجەیا پلنگی کو ژ ئالیێ تورکیا ڤە هاتیە راگەیاندن کو ب مخابنی ڤە زەرەر و زیانەک زور گەیاندیە چیا و زەڤیێن باشور و دیسان بوویە ئەگەر بو هندێ کو تورکیا ب دیار و ئاشکەرا دەیان بنگەهێن خوە یێن سەربازی ل هەرێما باشور دابنیت و گڤاشتنێن مەزن ل هەرێمێ بکت ل دور پەکەکێ و هەبوونا وێ،ئێدێ حکومەتا هەرێمی وەک دەستهەلاتا شەرعی یا هەلبژاردی ب مەبەستا کێمکرنا فشارێن ل سەر خوە ژ هەر دوو ئالیێن تورکی و پەکەکێ ڤە داخواز ژ پەکەکێ کریە مەیدانا خەباتا خوە ڤەگوهێزن باکور بو هندێ کو هەجەتا تورکیا ژی ل باشور ب داویی بهێت، لێ دیارە پەکەکە ب ڤێ یەکێ نارازی یە ماوەیەکێ ب ئاشکەرا شەر دژی باشور راگەیاندیە ،و چەندین هێرشێن چەکداری بو سەر هێزێن پێشمەرگەیی کرینە ژ بلی تەقاندنا بوریا نەفتا باشور بو جیهان،دیارە هێزێن پێشمەرگەیی تا نها دان ب خوەداگرتینە و پشکەک نەبووینە ژ شەڕی ،لێ زور سەیرە هێزێن بەشدار د حکومەتێ دا ڤی شەڕی کورت بکەنب شەڕێ دناڤبەرا پارتی و پەکەکێ دا.!!کو ئەڤە بخوە زور پرسان دخوەدا هەلدگریت،

گەلو سەروەریا هەرێمێ یا پارتی ب تنێ یە؟گەلو چما شەڕێ پەکەکێ دگەل پارتی ب تنێ یە؟گەلو پا ئەرک و رولێ هێزێن بەشدار د حکومەتا هەرێمێ دا ل دور پاراستنا سەروەریا هەرێمی چی یە؟ گەلو چما پارتی ب تنێ ئارمانجا ڤان هێز و ئالیێن سیاسی یە؟گەلو بێ هەلویستیا هندەک ئالیێن سیاسی یێن بەشدار د حکومەتێ دا بانگا دوو ئیداربوونێ راناگەهینت؟

هەلبەتە بو بەرسڤا ڤان پرسیاران تنێ پێدڤی بیر ل بوویەرێن 16ی ئوکتوبەرا 2017ێ دا بکین دێ بەرسڤێن باش و گونجایی ب دەست مە کەڤن،،