سەد ساڵە گەلێکی چەوساوە خەبات دەکات، تێدەکۆشێت، قارەمانی ئەو گەلە سەدان داستانی تۆمار کردووە، هەزاران ڕۆڵەی ئەم گەلە خوێنیان بۆ ئەمڕۆ داوە، توانراووە هەرێمێک لە چەشنی دەوڵەت دروست بکرێت و چاوی جیهانی بۆخۆی ڕاکێشاوە.
یەکدەنگی و کۆدەنگی کوردان ئەمڕۆ پتر لە هەر کاتێکی تر پێویستە، تەبایی هێزە سیاسیەکان و یەکهەڵوێستی ئەوان لەمەڕ پرسە هەنوکەییەکان دەبێتە هۆی ئاییندەیێکی باشتر، پتر لە ئێستاو هەمووکات خزمەت بە دۆزی ڕەوای گەلەکەمان دەکات و کورد دەباتە قۆناغێکی باشتر لەسەر ئاستی هەرێمی و نێودەوڵەتی.
دوژمنانی گەلەکەمان ڕێگەی جیاوازیان گرتە بەر بۆ ئەوەی شوناس و کلتوری کوردانەمان نەهێڵن، بە هێزی سەربازی بێت، یان بە هێزی نەرم و سیاسەت و ڕێککەووتنە ژێر بە ژێرەکان، نەیانتوانی حەقیقەتی کوردبوونمان لێ بستێنن، نەیانتوانی کوردستان بسڕنەوەو مەسحی بکەن.
دەبێت ئەوە بزانین کە یەکڕایی دەرمانی دەردی ئێمەیە، تەوهین و تەخوین، پەلاماردان و گێرەشێوێنی، جگە لە تۆمارێکی کرێت و مێژوویەکی ڕەش، هیچی تر نییە، مێژوو ڕەحم بەوانە ناکات کە سەنگەر لە دژی براکانیان لێدەدەن و بوونەتە ڕۆبۆت و ڕیمۆد کۆنتڕۆڵی خۆیان داووەتە دەستی نەیارانی کوردستان.
کوردستان سەردەکەووێت..