پشتی خیانەتا 16 ێ ئکتۆبەرا ساڵا 2017 و داگیرکرنا کەرکووکا دێ کوردستانێ و دەڤەرێن کوردستانی یێن دەرڤەی ئیدارا هەرێما کوردستانێ ژلایێ حەشدا شیعی
و میلیشیایێن هندەک وەڵاتێن هەرێمی ب رێنیشاندەریا گرۆپەکێ باڵا دەست دناڤ ئێکەتیا نشتیمانی کوردستانێ کۆ بوویە ئەگەرێ لدەستدانا زێدەتر ل نیڤەکا ئاخا پیرۆزا کوردستانێ، زۆر وەڵات و لایەنێن ساسی ل کوردستانێ و عیراقی و هندەک کەسایەتیێن کوردستانی د وێ باوەریێ دابوون کۆ قەوارێ هرێما کوردستانێ بەرەڤ ناڤچوونە و نەشێت بەرسینگێ وان هێزێن داگیرکار بگریت چونکی ژلایێ رێژێ و شیانێن لەشکری و ئابۆری ناهێتە بەڕەووردکرن ، ژلایێ سیاسی و ئابۆری ژی نەشێت لبن گڤاشتن و گەماروویان هەرێمی دەربکەڤیت و دێ زۆر دەسکەفتان لدەست دەت و وازێ ل زۆر شایسا ئینیت .
لێ خۆڕاگری و بەرخودانا پێشمەرگەهێن کوردستانێ ب پشکداری و سەرپەرشتی و رێنمایی یێن سەرۆک مەسعوود بارزانی ب شکاندنا وی لەشکرێ خودان شیان و نووترین چەکێ پێشکەفتیێ سەردەم و تۆمارکرنا داستانێن مەزن و بێ وێنە ل پردێ و سحێلا و مەحموودێ و تلسقۆف، هزر و بۆچوونێن چاڤدێر و ڤەکۆلەرێن سیاسی و پێشبینی و ئۆمێدێن داگیرکار و خیانەتکار بەرۆڤاژی کرن و کرنە خەون و خەیاڵێن بێ بنەما .
چونکی ب وێ باوەریێ هاتبوون کۆ هێزا پێشمەرگەهێن کوردسانێ هاتیە هەڵوەشاندن و بێ ئۆمێدبوون و شیانێن بەرگرکرنێ نەماینە و لدەمێ کۆرت دا دێ وان ئارمانجێن خۆ بجهــ ئینن ئەوێن لگەل کوردێن خۆفرۆش پیلان بۆ دارشتی ...!
ڕەنگە وان هێز و میلیشیایێن عەرەبی و بیانی ب درستی شیان و ئیرادە و باوەری و هەستا بلندا نەتەوی و نشتیمانیا پێشمەرگەهێن کوردستانێ و پەیرەوکارێن رێبازا پیرۆزا بارزانی بۆ بەڕەڤانیکرنێ ل ئاخ و خەلکێ کوردستانێ و دەسکەفتێن ب خوین و خەباتێ بدەست هاتی نەزانی بیت و دیرۆک و سەربۆڕا وان هەر ل شۆڕەشێن بارزان و پاشان بەڕەڤانیکرن ل پاراستنا کۆمارا کوردستان ل مەهابات لسالا ۱۹٤٦ و خۆڕاگریا حیبەتی بەرامبەر لەشکرێن سێ وەڵاتا و دەربازبوون ل رووبارێ ئاراس هەتا گەهشتینە ئێکەتیا سۆڤیەتا بەرێ ، یان داستانێن بێ وێنە یێن شۆڕەشا مەزنا ئیلۆنێ ب رێبەریا بارزانی نەمر و پاشان داستان و سەرکەفتنێن هەری مەزن ل شۆرەشا گوڵانا پێشکەفتنخواز ب سەرپەرشتیا سەرۆک مەسعوود بارزانی هەتا دگەهیتە سەرهەلدانا 1991 و شکاندنا هێزدارترین و درندەترین رێکخستنا تیرۆرستیا جیهانی ( داعش ) نەخووندبیت ، پێتڤی وان خۆفرۆشێن کورد ئەڤ راستیە بۆ سپونسەرێن خۆ شرۆڤە کربا .
ب ڤان سەرکەفتن و داستانێن مەزنێن پێشمەرگەهێن کوردستانێ بسەر وان هێزێن هەری مەزن، دیدەڤانن کۆ نفشێ نهۆ یێ کوردستانێ و پێشمەرگەهێن گەنج و لاو برەنگەکێ زانستی و پڕاکتیکی وانە و سەربۆر ل باب و باپیرێن خۆ یێن پێشمەرگەهێن شۆڕەشێن مە ئاماژە پێکر وەرگرتینە و ژوان فێری پەروەریا نەتەوەیی و نشتیمانی و خۆنەچەماندنێ بوونە کۆ ژ رێبازا پیرۆزا بارزانی پەیدا بوونە .
ڤان داستانا دیارکر کۆ پارتی و بزاڤا رزگەریخوازا کوردستانی و پێشمەرگەهێن ئێک ئارمانج هەیە ئەو ژی ئازادی و رزگاریا کوردستانێ و پاراستن و پێشڤەبرنا دەسکەفتێن خەلکێ کوردستانێ ، ڕامان نە ئەوە شۆڕەشێن کوردستانی و پێشمەرگەهێن کوردستانێ د شەرخازن ، هەردەم شەر دووماهی بژاردە بوویە ، هەر وەکی بارزانی نەمر کەرەم کری (ئەم شەری دکەین ژ پێخەمەت نەمانا شەری ) لێ هەردەمێ شەر ژی هاتبیتە سەپاندن ژبەر ووڕە بلندیێ و باوەری بخۆبوون ب دۆزا گەلێ خۆ و سەرکردایەتیا خۆ بەرامبەر دوژمنێن زۆر ل خۆ بهێزتر سەرکەفتینە ، ئەڤان داستانێن سالا 2017 ێ ژی قەوارێ هەرێما کوردستانێ ژ ناڤبرنێ پاراستن و دۆژمن نەچار کر دەرگەهێن دانۆستاندنا لسەر بنەمایێ دەستووری ڤەکەت و ژلایێ نیڤ دەولەتی ژی ئەڤ سەرکەفتنێ پێشمەرگەهێن کوردستانێ هاریکار بوون کۆ پشتەڤانیا سیاسی و نیڤ دەولەتی ل هەرێما کوردستانێ بهێتەکرن و سەرۆک نێچیرڤان بارزانی ژی زۆر ب لێزانی شیا سەرەدەریەکا لۆژیکانە بکەت و ب کاریزمایا خۆ شیانا گەماروویێن سیاسی و ئابۆری بشکێنیت و جهێ کوردستانێ لسەر نەخشێ سیاسی یێ دەڤەرێ بەرچاڤ و دیار بکەت.
ئەڤا ل پردێ و سحێلا و مەحموودێ و تلسقۆف هاتیە کرن ، چەند داستانەک بوون قەوارێ هەرێما کوردستانێ و شەرەف و کەڕامەت و پیرۆزیێن خەلکێ کوردستانێ پاراستن کۆ هەمان مەبەستا چەندین ساڵی یا بزاڤا رزگاریخوازیا کوردستانی و پارتی دیموکراتی کوردستانی و رێبازا بارزانی نە .