——————————————————————————————————
ئەو جڤاک و گەل یێ زیندی تە ئەوێ ھەلکەفتێن خوش و نەخوش ل بیرا خو بینن و ھەلسەنگاندنەکا زانستی بۆ بکەن ، داکو سەرئەنجام خالێن بھێزو لاواز دەستنیشان بکەت.
ئەز وەکو دلسۆزەکێ رێبازا بارزانی و پێشمەرگەکێ پارێزڤانێ کوردستانێ و خو ب کادرەکێ پێشکەفتیێ پارتی دزانم لەورا دێ ڤان تێبینی و پێشنیاران ئێخمە بەر دەستێن جھێ بریارێ د ناڤ پارتی دا .
١- پارتی دڤێت بریارێ بدەت:
• کادرو
• کاتب و
• تاجران
ژێکجودا بکەت ، قەت چێ نابیت ناڤێن ھەرسێکان کادر بن .
٢- پارتی دڤێت بریارێ بدەت ، پارتی گەھاندینە ڤێ قوناغێ مەدالیا بارزانی بھێنە خەلاتکرن و ئەگەر پێدڤی پێ ھەبون وەکو کەسایەتیێن گەلەک رێزدار راوێژ پێ بھێتەکرن، ئەگەرنا دڤێت دەلیڤێ بدەنە ھێزا نوی ئەوێن لسەر بیروباوەرێن رێبازا بارزانی ھاتینە ئاڤاکرن. وان ژی وەکو ھێما سەرەدەری د گەل دا بھێتەکرن و ئێدی بەسە .
٣- پارتی دڤێت بریارێ بدەت، گرنگیەکا ئێکجار مەزن ب گەنجێن خودان شیان و شارەزا و لێزان بدەت و رێکێ بۆ خوش بکەت و لێ وان نەترسیت.
٤- پارتی دڤێت بریارێ بدەت ، رەگەزێ مێ زێدەتر گرنگیێ ۆێ بدەت و د ناڤ ئورگانێن پارتی دا بھێنە زێدەکرن و د گەل داکو بشێت د گەل رەگەزێ نێر ل جھێن بریارێ دابن.
٥- پارتی دڤێت بریارێ بدەت، شێوازێ رێکخستنا خو بگوریت و زێدەتر گرنگیێ ب رێکخستنێن پیشەیی و جەماوەری بدەت.
٦- پارتی دڤێت بریارێ بدەت، کو راگەھاندنا وێ ب دیتن و بیھستن و خواندن و ئەلکترونی بھێتە گوھرین کو د گەل قوناغا ھەنوکەیی و خواستێن خەلکی بگونجیت.
٧- پارتی دڤێت بریارێ بدەت، بوردێن راوێژکاری یێن خوبەخش ل ھەمو سەکتەرێن ژیانێ دروست بکەت، داکو گەلەک ژ نێزیک گوھداریا خەلکی بکەت ، بۆ ھندێ پارتی و خەلک ببنە دوو بازنێن پێکڤە گرێدایی بۆ ھەردەمی.
٨- پارتی دڤێت بریارێ بدەت ، ھەر کاودانەکێ بھێتە پێش دڤێت چوار «٤» سالان جارەکێ کونگرێ خو بکەت ، و ئەندمێن کونگرەی ل سەر ھندەک پیڤەرێن لێزانی و شارەزایی بھێنە دەستنیشانکرن و باراپتری ب مەرکەزیەت بن.
٩- پارتی دڤێت بریارێ بدەت، ب ھەر رێکەکا ھەبیت کادرێن دلمایی و جەماوەرێ عاجز ل خو ئاش بکەتەڤەو زێدەتر گرنگیێ ب بازنێن ھەلبژارتنان بدەت.
١٠- پارتی دڤێت بریارێ بدەت، دلسۆزێن رێبازا بارزانی گرنگیێ پێ بدەت و د ناڤ سازیێن حزبی و حکومی دا جھێ وان پەیدا بکەت و ئەو ل جھێ بریاردانێ دا بن .
١١- پارتی دڤێت بریارێ بدەت ، میکانیزمەکێ بۆ ئەندامێن پەرلەمانێ عیراقێ و کوردستانێ و جڤاتێن پارێزگەھان دابنێت ل دەمێ کاری دا و پشتی کارێ وان ، دڤێت ئەو کار ببیتە کارەکێ بەرپرسیارەتی نەک بتنێ ئیمتیاز وەرگرتن و ھەر ئێک ب کەیفا خو بیت.
١٢- پارتی دڤێت بریارێ بدەت، گەلەک ب جدی ل میکانیزم پیڤەرێن:
• دوڤچون
• ھەلسەنگاندن
• سزادان
• خەلاتکرن
کار بکەت و چونکە ئەڤە ب پاشەرۆژا پارتی ڤە گرێدایی یە.
١٣- پارتی دڤێت بریارێ بدەت، گەلەک ب جدی ل سەر ژێدەرێن مرۆڤی کار بکەت و ل کەسێن خودان شیان بگەریێت و ھزرو پرۆژێن وان بێخیتە د خزمەتا خەلکی دا.
١٤- پارتی دڤێت بریارێ بدەت، کو ھەر ئاریشەو کێماسیەکا ھەبیت ، د رێکا تێگەھاندن و پێگەھاندنێ چارەسەر دبیت. لەورا دڤێت ب بەردەوامی ل سەر ھەرسێک ئاستێن :
• ناوچە
• لق
• سەرکردایەتی
ب بەردەوامی خولێن جوراو جور ڤەکەتن و قوتابخانا حزبی یا بەردەوام بیت.
١٥- پارتی دڤێت بریارێ بدەت، جارەکا ل ھەمو سازی و ئورگانێن خودا بزڤریتەڤە بنەمایێن رێبازا بارزانی ئەوژی :
• مروڤایەتی
• نیشتیمانپەروەری
• کوردایەتیا راستەقینە
• دادپەروەریا جڤاکی
• لێبورین و پێکڤەژیان
• دلسۆزی و لێزانی
• ژینگەھپارێزی
• رێزگرتن ل فرەیی و دیموکراسیێ
٠ راستگویی و شەفافیەت
• خو نەچەماندن
ل گوور باوەریا من ئەڤ (15) خالە ئەگەر پارتی ب جدی لسەر کار بکەت ، ژیێ وێ ل (74) سالان دێ بیتە (740) حەفت سەدو چل سال و ھێشتا زێدەتر ژی.
چونکە وەکو کورە شەھیدەک دوھی و ئەڤرو سوبەھیا گەلێ کوردستانێ بتنێ ب پارتی و رێبازا بارزانی ڤە گرێدایی یە ، لەورا د چوارچوڤێ ھەستکرن ب بەرۆرسیارەتیێ بۆ جھێ بریارێ د ناڤ پارتی دا بەرچاڤ دکەم و ھیڤیدارم جھێ مفا وەرگرتنێ بن.
نوکە ب پێدڤی دزانم ژ دل پیرۆزباھیێ ل دامەزرێنەرو سەرۆک و جێگرو سەرکردایەتی و کادرو ئەندام و لایەنگرو جەماوەرو دوست و دۆژمنێن پارتی و ب تایبەت ژی خێزانێن سەربلندێن شەھیدان و ۆێشمەرگێن قارەمان بکەم.
د گەل رێزگرتنێ
خزمەتکارتان
عبدالعزیز محسن بارزانی
15-8-2020
تورکیا-ئەنقەرە