ل هەلکەفتا ١٦ تەباخێ ، بەلێ بۆ چەسپاندنا رێبازا بارزانی نەمر
غیاس خالد زێباری
چ جاران نه ل گه‌ل چ جۆرین توندیێ بوویمه و نه ژی لگه‌ل د بم، چونكی توندی، توندوتیژیێ ل دووڤ خۆ دئینیت، لێ بۆ ره‌وشا نها یا كوردستان و پارتی تیدا، پارتی پێتڤی ب کۆمەکا کادرێن چالاك و وێرەک و توند هه‌یه، ژبۆی ڕێگریکرنێ ل سه‌رپێچی و لادانا هنده‌ك پله‌دارێن پارتی و هنده‌ك كه‌سایه‌تیێن ل سه‌ر پارتی دهێنه هژمارتن ل رێیا راست و درستا كوردایه‌تی و پارتایه‌تیا راسته‌قینه، كو رێبازا پیرۆزا بارزانیێ نه‌مره، هه‌ر كورده‌كێ وه‌لاتپاریز و پارتیه‌كێ راست و درست و ب بیر و باوه‌ر، دزانیت كو رێبازا پیرۆزا بارزانیێ نه‌مر، دادوه‌ری و راستگۆیی و وه‌ك هه‌ڤی و وه‌لاتپاریزی و خزمه‌تكرنا جڤاكی و وه‌لاتی یه و …هتد،
ب تایبه‌ت به‌رامبه‌ر چینا هه‌ژار و به‌له‌نگاز و پیشكه‌فتنخواز، هه‌رده‌م بارزانی نه‌مر په‌ناگه‌ها ڤان چینا بوویه، رێبازا پیرۆزا بارزانیێ نه‌مر، زه‌والا زۆردار و زۆرداریێ و گه‌نده‌ل و گه‌نده‌لكاران و خۆسه‌پاندنێ بوویه. جهێ پسیارێ یه، ئه‌رێ چه‌ند به‌رپرس و پله‌دارێن پارتی یێن نهو، یان ئه‌و كه‌سایه‌تیێن ل سه‌ر پارتی دهێنه هژمارتن، خودان ئه‌ڤ سالوخه‌ته‌نه و د ناڤ خه‌لكی و ل سه‌ر كه‌نالێن راگه‌هاندنێ بناڤێ ڤێ رێبازا پیرۆز خۆ دیار دکەن.؟! بێگومان هژمارەکا کێمە ل هەمبەر بەرفرەهی و مەزناهیا پارتی ،
ره‌فتار و سه‌ره‌ده‌ریێن ڤان كه‌سان فاكته‌رێن سه‌ره‌كی بوونه بۆ دروستكرنا ڤالاهیه‌کێ د ناڤبه‌را جه‌ماوه‌ری و پارتی دا و ڤێ ره‌وشا نها یا ئابووری و جڤاكی و كارگیری ل كوردستانی و لاوازكرنا پیگه‌هی جه‌ماوه‌ریی پارتى.
نه رامانا ڤی لاوازكرنی ئه‌وه پارتی ل حزب و قه‌وارێن دی لاوازتره، سه‌ره‌رای ڤێ چه‌ندێ سه‌نگ و پیگه‌هێ پارتی به‌رامبه‌ر وان ناهێته به‌راووردكرن و پارتی د كۆپیتكا بهێزبوونێ دایه.
لێ ئه‌ڤ ئاستێ نهو یێ هیزا جه‌ماوه‌ری یا پارتی، به‌راووردكرن لگه‌ل خه‌بات و قوربانیدانا پارتی و ڤێ رێبازێ، دڵوپه‌كه ژ ده‌ریایی. ئه‌گه‌ر پارتی ل ڤان سالێن دووماهی 80% رێبازا پیرۆزا بارزانی نه‌مر په‌یره‌و كربا، ل چ هه‌لبژارتنان رێژا ده‌نگێن پارتی ب كێمی ڤه 70% كێمتر نه دبوو.
كادرێن سازیێن خواری یێن پارتی ژی ل بانگه‌شین هه‌لبژارتنان دا شه‌پرزه و ماندی نه‌دبوون و ل رۆژین ئاسایی ژی به‌رده‌وام تووشی ره‌خنه‌یێن ئاڤاكه‌ر و پسیارێن بێ به‌رسڤێن جه‌ماوه‌ری خوه نه دبوون.
ده‌مێ هاتی كادر و دلسۆزێن پارتی ئه‌ڤرۆ به‌ری سوباهی، بهەلکەفتا ( ١٦ ) ێ تەباخێ ٧٤ ساڵیا دامەزراندنا خۆدا برێكه‌كێ بكێشیت و سەرۆک و سه‌ركردایه‌تیا پارتی، بریارەکا ئێکلاکەر بدەت بۆ چەسپاندنا بنەمایێن رێبازا بارزانی نەمر ، ل تەڤایا ئۆرگانێن خودا و د وارێ سیاسەتێ و کارگێریێ دا، هەر وەسا سەرەدەریا لگەل جەماوەری،
چونکی زۆرینەیا ئەندام و لایەنگرێن پارتی ژبەر پیرۆزی و دادپەروەری و خەبات و خۆڕاگریا رێبازا پیرۆزا بارزانیێ نه‌مر ، پارتی هەلبژارتی یە و پراكتیكیا ڤێ رێبازا پیرۆزا بارانی دڤێت ، ده‌می هاتی دز و گه‌نده‌لكارێن بن سیبه‌را پارتی و ڤێ رێبازا پیرۆز به‌رده‌وامیێ ب ڤی ره‌وشتێ به‌روڤاژی ڕه‌وشتی كوردایه‌تیێ و پارتایه‌تیێ و ڤێ رێبازێ دده‌ن و رۆژانه خه‌لكی ژ پارتی دوور دكه‌ن، ب ره‌نگه‌كی دادوه‌رانه بهێنه سزادان و پرۆژی چاكسازیێ رێبازا بارزانی ل ده‌مه‌كێ زوی بهێته بجهئینان. به‌ری ل چارچووڤێ چاكسازیێن سه‌رۆكێ حوكمه‌تا هه‌رێمێ بهێنه سزادان و دادگه‌هكرن و پاشى كاریگه‌ریه‌كا نیگه‌تیڤ ل سه‌ر جه‌ماوه‌ر و ئه‌ندامێن پارتی بكه‌ت.
ده‌مێ هاتی كادر و ئه‌ندامێن وه‌فادارین رێبازا پیرۆزا بارزانی نه‌مر، ب وێره‌كانه و ب ده‌نگه‌كێ بلند بێژن ئه‌م رازی نابین، ڤایرۆسین كوشنده، د ناڤ پاكی و بژوینی و كوردایه‌تیا ساخله‌ما پارتی و رێبازا پیرۆزا بارزانی نه‌مر، جهێ خوه وه‌سا فره‌هــ بكه‌ت كو ل داهاتی چاره‌سه‌ری نه‌بیت و ببیته شیرپه‌نجه ...!
ژبۆی به‌رده‌وام سه‌قاكرنه‌ڤا رێبازا پیرۆزا بارزانیێ نه‌مر، پێدڤی یه كادر و ره‌وشه‌نبیرێن دلسۆزێن پارتی و بارزانی چاڤدێر و زێره‌ڤانین به‌رده‌وامێن پاراستنا ڤێ رێبازا پیرۆز بن، چونكی ئه‌ڤ رێبازه ڤاكته‌ر و هێڤینێ کوردستانەکا بهێزە و مانه‌ڤا پارتی دیمۆكراتی كوردستانه وه‌ك پارتیه‌كێ ب هێز و بێ ركابه‌ر ژ لایێ سامانێ مرۆڤی. هێزبوونا پارتی ژی، فاكته‌ر و هێڤینێ، ئازادی و رزگریا کوردستانێ و ئێکرێزیا گەلێ کوردە و بدەست ڤەئینانا ماف و ئارمانجێن نه‌ته‌وی و نشتیمانی ،
كو چه‌ندین ساله خه‌باتێ بۆ دكه‌ن و قوربانیان ژپیخه‌مه‌ت دده‌ن. به‌رۆڤاژی ژی خودی نه‌كه‌ت، دژوارتین مه‌ترسیه ل سه‌ر ئاسایشا نه‌ته‌وی و نشتیمانی و جڤاكیا كوردستانێ. نه تنێ ل سه‌ر ئاستێ هه‌رێما كوردستانێ، به‌لكی ل سه‌ر ئاستێ كوردستانا مەزن ، له‌وما پێدڤی یه خوه ل رێبازا پیرۆزا بارزانی نه‌مر بكه‌ینه خودان و ده‌سكه‌فتێن خوه نه‌كه‌ینه قوربانی به‌رژه‌وه‌ندێن هنده‌ك كه‌سان .
ل هەلکەفتا ١٦ تەباخێ بەلێ بۆ ئێکرێزیێ و چەسپاندنا رێبازا پیرۆزا بارزای نەمر و چاکسازیێن زێدەتر و پراستنا قەوارێ هەرێما کوردستانێ ، بەلێ بۆ داکۆکیکرنا کادر و ئەندام و جەماوەرێ پارتی بۆ چەسپاندنا رێبازا بارزانی و بەهنگاریا بنپێکەرێن وێ ب تۆندی .
