وەک کارڤەدانەک بەرامبەر شۆرەش و بزاڤا رزگاریخوازا کوردستانی ، ل باشوورێ عیراقێ .
هەردەم رژێمێن ئێک لدووف ئێکێن عیراقێ ، پەنا بۆ قڕکرنا مللەتێ کورد و هەڵوەشاندنا خێزان و جڤاکێ کوردستانی بریە .
ئەڤەژی نیشانێ وێ چەندێ یە کۆ ئەڤ رژێمە ژلایێ سیاسی و چەکداری بەرامبەر شۆرەشگێرێن کوردستانی و پێشمەرگەهێن کوردستانێ نەشیانە سەرکەفتنێ بدەست بینن و بگەهنە مەرامێن خۆ .
لەومە پەنا بڕە بەر بعەرەب کرنا دەڤەرێن کوردستانی و گۆڕینێن دیمۆگرافی و پاشان هەوێن بناڤێ ئەنفالا ب مەرەما قڕکرنا جڤاکێ کوردستانی و وێرانکرنا ب هزاران گوندێن کوردستانێ ، پاشا جینۆساید کرنا هەشت هزار بارزانیا ل ٣١/٧/١٩٨٣ ،
بەری سیهــ و حەفت ساڵا ل کۆمەڵگەهێن جودا جودا یێن باشوورێ کوردستانێ رژێما بەعس هەشت هزار بارزانی جینۆساید و بێ سەرۆ شوون کرن کۆ ئێکە ل مەزنترین کارەساتێن مەزنێن سیاسی و جڤاکی یێن ڤی سەردەمی لسەر ئاستێ جیهانێ .
لێ جهێ پسیارێ یە ، بۆچی بارزانی ...؟ ،
چونکی بارزانی کاکلک و هێڤێنێ شۆرەشا کوردستانی و بزاڤا رزگاریخوازیا کوردستانی نە ، و رێبەر و سەرکردێن کوردی و قوتابخانا کوردایەتیێ و نشتیمان پەروەریێ و نەتەوایەتیێ ل بارزان ئاڤا بوویە و بەردەوام خەلک لێ دهێتە فێرکرن و پەروەردەکرن ، لەوما رژێم د وێ باوەریێ دا ، ب ناڤبرنا بارزانیا شۆرەشا کوردی ئەگەر ژناڤ نەچیت ژی دێ لەنگەر بیت ، هەڵوەشاندنا جڤاکێ بارزان ، هەتا سەد ساڵێن دیتر ناهێتەڤ سەرخۆ و دێ بیتە فاکتەرەکێ سەرەکی و کاریگەر بۆ لاوازکرنا هەستا نەتەوی و پێگەهاندنا سەرکردە و شۆرەشگێرا …!
رژێم د وێ باوەریێ دابوو ب جینۆساید کرنا بارزانیان ، پشتی دەمەکێ کورت سەرکردایەتیا بزاڤا رزگاریخوازیا دێ لدەستێ بارزانیان دەرکەڤیت و کەڤیتە د دەستێ خەلکەکێ دیتر دا ، کۆ نەشێن خۆ لبەر هێرش و پیلانێن دوژمن و داگیرکارا بگرن و ئێکرێزیا سەرکردایەتیا سیاسی و لەشکری ب پارێزن .
لێ دیتن و بۆچوونێن وان بەۆڤاژی دەرچوون ، نە بزاڤا رزگاریخوازیا کوردستانی بسەرۆکاتیا پارتی و بارزانی لاواز و لەنگەر بوو ، نەژی جڤاک و خێزانا بارزان ، هاتە هەڵوەشاندن ،
هەرچەندە کارەساتەکا هەرە مەزن بوو ، نە تنێ بۆ جڤاکێ بارزان ، لێ بۆ جڤاکێ کورستانی ب گشتی ، چونکی نە کارەکێ ب ساناهی یە ، سەرپەرشتیکرنا هزاران ماڵباتا و پەروەردەکرن و مەزنکرنا زارۆکێن وان بکەڤیتە د دەستێ ئافرەتێن بێ دەسهەڵات و دەرامەت دا ، ژبلی هەلگرتنا خەمێن باب و برایێن جینۆسایدکریا و کاریگەریێن دەروونی لسەر ، خەما چاوانیا خۆرێڤەبرنێ ژی د وان کاودانێن دژوار دا هاتە سەر .
لێ خۆڕاگریا دایک و خێزان و خۆشکێن بارزانیێن جینۆسایدکری ، ئیرادەیا بهێزا بارزانیەتێ و نەتەوایەتیێ و ڤیانا وەڵاتی بکار ئینا ، بەرامبەر ڤان هەمی کارەسات و دژواریا ژیانێ خۆ ڕاگرت ، نە تنێ خۆ ڕاگرت ، بەلکی ب باشترین شێوە ژلایێ پەروەردەیا خێزانی و نەتەوایەتیێ ، زارۆکیێن خۆ ب سەربلندی ب باشترین شێوە پەروەردە و مەزن کرن ، بێ کۆ خۆ هەوجەی نەمەردەکی بکەن ،
دایک و خێزان و خۆشکێن شەهیدێن بارزانیێن جینۆساید کری ، ب هزاران کچ و کۆر نە تنێ پەروەردە و مەزن کرن ، بەلکی کرنە کەسایەتیێن مەزن یێن شۆرەشگێر و سیاسی و رەوشەنبیر و ئەکادیمی و جڤاکی و ژینگەهــ پارێز و سەرکردە …. هتد
ئەڤرۆ چەندین سەرکردە و زانا و پلەدارێن هەرێما کوردستانێ ، بابێن خۆ نەدیتی نە ، یان بیرا وان لێ ناهێت ، لسەر دەستێ وان شێرە ژنێن خۆڕاگر مەزن و پەروەردە بونە .
ئەڤە باشترین نمۆنەیێ خۆراگریا مللەتێ کوردە بەرامبەر هەول و پیلانێن دوژمن و داگیرکارا بۆ قڕکرنا مللەتێ کورد و بەردەوامیا بن دەست کرنا گەلێ کورد .
ژلایەکێ دیتر پەیامەکە بۆ جیهانێ و وەڵاتێن داگیرکارێن کوردستانێ ، کۆ هەستا نەتەویا خەلکێ کوردستانێ و گاڤێن ئازادی و رزگاریێ ، ب ئەنفال و جینۆسایدکرنێ و کیمیارانکرنێ و وێرانکرنی ، نە ژناڤ دچن ، نەژی پاشڤە دزڤریت .