پارتیا دیموکراتا کوردستانێ د ژیەکێ زێدەتر ل ٧٤ سالان دا، خودان دیروکەکا پر سەروەی، پێگەهەکا جەماوەری یا بهێز.
خودان سەرکردایەتیەک مەزن و پیروز کو د شەخسێ بارزانێی نەمر بەرجەستە دبیت، ئەو رێبازا ژ پێگەها ئاینی و جڤاکی و کورد پەروەری یا شێخێت بارزان هاتیە وەرگرتن و بارزانی نەمر ژی رول هەبووی د دەولەمەندکرنا وێ دا، کو ئەڤرو رێبازا بارزانی ب قوتانخانا کوردایەتی و نەتەوایەتیێ دهێتە ناس کرن.
پارتی ب خودانا پەیاما نەتەوایەتی و هەلگرا مورکا نەتەوەیی هاتیە ناسین.
بارەگایێن پارتی هەردەم هەیبەت و مەزیا خوە ژ ناڤێ بارزانی نەمر وەرگرتیە، بەرپرسێن پارتی د ئاستێ بەرپرسێارەتیێ و ناڤێ وێ رێبازی دا بوینە، کادرێ پارتی نمونێ پێشمەرگێ جان فیدا و خودان خەسلەتێن باش بوینە، دلسوزی و خزمەت و رەوشت و راست گویی، ‌پێناسا کادرێن پارتی بووویە، لەوما دناف جەماوەری دا، هەردەم جهێ رێز و تەقدیرێ بوینە.
هەتا پشتی سەرهڵدانا پیڕوزا بوهارا سالا ١٩٩١ بارەگایێن پارتی هەمان پێگە هەبوویە، بەرپرس و کادرێن پارتی نمونە کەسانێن دلسوز و خزمەتکار بووینە، پێگیر بوون ب بنەما پرنسیبێن پارتایەتی و کوردایەتیێ، دناف جەماوەری ستێرا وان یا بلند و دیار بوو.
مخابن پشتی هنگی رەوش هاتە گوهرین، دکارین بێژین ب تایبەت پاس سالا ٢٠٠٠، دگەل باش بوونا رەوشا هەرێما کوردستانێ یا ئابوری و هەروەسا پارتی ژی داهات و بودجە زێدە بوین و بودجەیەکا زێدە بو بارەگایێن پارتی هاتیە مەزاختن.
ژ هنگی وەرە هندەک ژ بەرپرسان ژ قالبێ بەرپرسیارەتیێ و خزمەتێ و پرەنسیبێن کارێ پارتایەتی دەرکەفتن.
ژبو موکم کرنا پێگەها خو یا حزبی کەفتنە بەر کوتلە و کوتلە کاریێ.
ژبو موکم کرنا پێگەها خوە یێ جڤاکی، ژ قالبێ خزمەتا جەماوەرێ پارتی دەرکەفتن و چوونە د قالبێ بنەمال و عەشیرەتگەریێ دا.
ژبو دەولەمەند کرنا خوە، ئەو پارێ دهاتە مەزاختن، ژ جیاتی د خزمەتێ دا بێتە خەرج کرن، بازڕگانی بو خوە پێ کرن.
ئەف دیاردێن نوی، دستپێکا پەیدا بوونا لاوازیا هزری و باوەریا پارتایەتی بو دناف بارگایێن پارتی دا.
دەسپێکا لادان و دویر کەفتێ بو ژ رێبازا پیروزا بارزانیێ نەمر و پەیاما نەتەوەیی.
هێدی هێدی بوونە مایێ بێزاریێ ژلایێ جەماوەری ڤە،
بونە ئەگەرا دویر کەفتنا جەماوەری ل بارەگایێت پارتی.
بونە ئەگەرا نەمانا قەدر و قیمەتا بو کادرێ راستەقینە یێ پارتی.
هەروەسابونە ئەگەرا نەمانا هەیبەتی و پیروزیێ بو بارەگایێن پارتی.
د ئەنجامدا، رێک ل کادرێ دلسوز و خەمخور و خودان شیان و مستەحەق هاتنە گرتن، غەدر ونەحەقی بو ب دیاردەکا زەق و بەرجاف دناف بارەگایێت پارتی دا، دادپەروەری وەکو پەیڤەکا بێ بها یاری پێ دهاتنە کرن.
دویر ژ بیڤەرێن کادر بوونێ، هندەک کەسانێن بناف کادر، بێ ئاست، بەرژەوەند خاز، ب رێکا کوتلەکاری و عەشیرەتگەری و بەرژەوەدیێن جودا، ئینانە پێش، رێک ب هاتنە خوش کرن و گەهشتن مەرەمێن خو!.
بڤێ چەندێ، پارتی ژ هەموولایەکی ڤە لاواز و کز بوو.
روژ ب روژ گەندەلێی ب هەموو رەنگێن خوڤە، رەگو ریشالێت خوە گێشانە دناف بناغێ پارتایەتیێ دا و چ دەرفەت نەهێلان بۆ خزمەت کرنا راست و دروست، هەتا گەهشتیە وی ئاستێ ئەڤرو ئەم هەموو دبینین.
ئەوا جهێ حیبەتیێ بیت، هندی بزاڤ دهاتنە کرن بو راست کرنەڤێ، دبێ مفا بوون.
هندێ کادرێن دلسوز بزاڤ دکرن دەنگێ خوە بگەهینن، لێ بێ ئەنجام بوو و تا نها ژی بێ ئەنجامە !.
نها ب قەناعەت ڤە دبێژین، پارتی پێدڤی ب نوی بونەڤێ یە، چاکسازی و پاکسازی ژ فەرا فەرترن.
ئەڤە دەنگی زەلالێ دلسوز و مرید و دەروێشێن رێبازا پیروزا بارزانی نەمر و کوردایەتیێ یە.
هەتا کەنگی کادرێ دلسوز هەر هەست ب غەدر و نەحەقیێ بکەت.
هەتا کەنگی دێ رێکێن خزمەتێ لێ هێنە گرن.
هەتا کەنگی تحمل بکەت و چاڤەرێ دادپەروەریێ و مافێت خو بێت.
تاسا سەبرێ ئەیوبی ژی بسەرداچوو.
کەنگی دێ ئەو باوەری دناڤبەرا پارتی و کادری، پارتی و جەماوەری پەیدا بیتەڤە؟.
کەنگی دێ بێژینە باشی باش و خرابی خراب؟.
کەنگی دێ گەندەلی بدویماهی هێت؟.
دەما ئەم دبێژین پارتی پێدڤی ب خوداچونەڤە و چاکسازیێ هەیە، داخازا مە بهێز بوونا پارتی یە، دادپەروەی و مافن، خزمەت و دلسوزی یە.
هەستانەڤە وهێزا پارتی، ل سەر ملێت کادرا یە، کادر بناغێ موکمێ ئێکی یە.
نە مەرجە بەس د رێگا کونگرێ را بێتە کرن، و دڤێت چاڤەرێ وێ دەرفەتێ بین، چاکسازیێ بتنێ پێدڤی ب پلان و ئیرادێ و بریارەکێ هەیە دا بکەڤیتە بوارێ جێ بە جێ کرنێ دا.
ئەڤرو، رێژەیەکا هەرە زورا کادر و جەماوەرێ دلسوزێ پارتی، هیڤیێن خوە بو چاکسازی و دادپەروەریێ، د بریارەکا سەرکردایەتیا پارتی و شەخسێ جەنابێ رابەر و سەروک بارزانی را دبینن.
هەموو لایەک یێ گەهشتیە وێ قەناعەتێ، کو رەوشا نافخویا پارتی ژ ئالیەکی و قوناغا سیاسی یا هەرێما کوردستانێ ژ ئالیەتێ دیتر، وێ چەندێ دسەلمینن کو پارتی پێدڤی ب راوەستانەکێ و راست کرنەڤا ئاراستەیان هەیە.