ب ڕێژاهیا دیرۆکێ ، خۆفرۆش و مللەت فرۆش و نۆکەرێن دۆژمنا دناڤ مللەتێ کورد دا هەبوونە .
زۆر جارا ئەڤ نۆکەر و خۆفرۆشە بووینە ئەگەرێن ژناڤبرنا نیمچە دەستهەڵاتێن خۆ ڕێڤەبرنێن کوردی و ئینانا لەشکرێن داگیرکەرا ..!
راستە ئەڤە کارەکێ زێدە نەڕەوشت و نە ڕەوایە ، لێ دبیت دەمێن کەڤن ئاستێ رەوشەنبیری و هەستا نەتەوی و نشتیمانی یا خەلکی هندێ بلند نەبیت کۆ نۆکەر و خائین بێنە رووڕەش و شەرمزاکرن ، ژلایەکێ دیتر نەبوونا سازیێن حوکمڕانی و یاسایی و دادوەریێ و لەشکریێن بهێز و ڕاگەهاندنێ ژی فاکتەرێن نە سزادانا وان بیت ، لەوما زۆر گازندە لێ ناهێتە کرن .
لێ دڤی سەردەمێ رەوشەنبیریا خەلکی و بلندیا هەستا نەتەوی و نشتیمانی و هەبوونا دەسهەڵاتێن ، یاسادانانێ ، بجهــ ئینانێ و دادوەریێ و دەزگەهێن جودا جودا یێن ڕاگەهاندنێ کو دەم لدەست ، خیانەتا نشتیمانی یا خائین و خۆفرۆش و نۆکەرا دگەهیتە گۆهێن هەمی وەڵاتیا و لپێش چاڤێن هەمییان .
هێشتا مە نەدیتیە ، خائینێن نشتیمانی و خۆفرۆش و نۆکەر بهێنە سزادان ..!
مخابن هێشتا لڤی وەڵاتی خەلکەکێ زۆر ل کوردستانێ هەیە ، نەک پشتەڤانیا وەڵات فرۆش و مللەت فرۆشا بەرنادەن ، بەلکی شانازیێ ، ب کەسێن وەڵات فرۆش و نۆکەرێن دۆژمن و داگیرکارا دبەن و ب سەرکردێن سەرکەفتی و کاریزما ، دبینن ..!
هەردەمێ بریارەکا یاسایی ، ب بەڵگە و دانپێدانێن فەرمی ، بۆ سزادانا وان دەربکەڤن ، ب هزاران خەلک بێ کۆ باگڕاوەند و ئەگەرێن دەرکەفتنا بریارێ بزانن ، نە تنێ د بەرهەڤ دژایەتیا بریارێ بکەن ، بەلکی د بەرهەڤ خۆ بۆ بدەنە کوشتن و ب شەڤ و رۆژ لسەر جادێ بمینن ...!
چونکێ ژلایێ دارایی لێ مفادارن و هەلگرێن هەمان هزرا سیاسی نە ، لسەر بنەمایێ پاراستنا بەرژەوەندێن تایبەت و دەڤەرچیایێ و دووبەرەکیێ و تیرۆرا هزری هاتینە پەروەردەکرن ...! کۆ چ جارا بەرژەوەندێن تایبەت نەکەنە قوربانی بەەرژەوەندێن گەشتی ، ئەگەر ١٠٠٠٪ ێ ژی د نەڕەوا بن ...!
هاتینە پەروەردەکرن ، کۆ دبەرهەڤن ، بۆ پاراستن و بەڕەڤانیکرنێ ل پەیام و پیلانێن سەرۆک و سەرکردە و حزبا خۆ ، دەسکەفتێن نەتەوی و قەوارێ سیاسیێ مللەتێ خۆ بکەنە قوربانی ...! کۆ رۆژانە پشکەکا ئاخا پیرۆزا کوردستانێ رادەستی داگیرکرا دکەن ..!
هەتا ئەڤ خۆ پەرستە و کەس پەرستە و خائین پەرستە ، دناڤ وەڵاتی دا هەبن کۆ بەرەڤایێ ، ل خیانەتکارێن نشتیمانی بکەن ، زۆر زەحمەتە ل کوردستانێ یاسا سەروەر ببیت و ڤان خیانەتکارا ب کەلامچە کری ببینین ...!
بلا لۆمەی خۆ بکەین نەک حکومەتێ و سازیێن دادوەری .