دەمەکە ژبەر هندەک نڤیسین و گۆتارێن من ، هندەک کەس چ ڕاستەوخۆ یان نەڕاستەوخۆ وە هزر دکەن ، ئەز ژبەر خاترا کەسەکی ، یا ب رێنمایی یێن کەسەکی ، یان لایەنەکی گۆتارێ دنڤیسم .

وە هزر دکەن تنێ مەرەما من پەسنکرن و ب بەژن و باڵ گۆتنا کەسەکی یە ، یان سەرکردەیەکی ، یان چەند کەس و سەرکردێن دیارکری ، یان دەسهەڵاتداریا حکومەتا هەرێمێ ، ژبەرکۆ کۆپیتکا ڤێ دەسهەڵاتێ د دەستێ وێ پارتیێ دایە ، ئەوا من باوەری پێ هەی و چەندین ساڵە پێڤە هاتیمە گرێدان .

وە هزر دکەن ئەز بەرامبەر ڤێ چەندێ ، هاتیمە کرێگرتن ..! و ب رەنگەکێ رێکخستی و پلان دارشتی و ب ڕێنمایی یێن وان دنڤیسم .

بەری چ بەرسڤا بدەمە وان کەسان یێن ڤێ هزرێ لمن دکەن ، دبێژم : بیر و بۆچوون و پابەندیا سیاسی لڤی وەڵاتی یا ئازادە ،
ئەرکێ هەر کادر و ئەندامێ لایەنەکێ سیاسی یە ، بەڕەڤانیێ ل سیاسەت و ئایدیولۆژیا پارتیا خۆ بکەن ل کەناڵێن ڕاگەهاندنێ و سۆشیال میدیایێ ، ئەگەر ئەو سیاسەت و ئایدیولۆژیا د خزمەتا بەرژەوەندێن گشتی و نەتەوایەتی و نشتیمانیدابوونێ بیت .

هەر ڕەخنە و گازندەکا مرۆڤی ژی هەبیت ، درێکا سازیێن حزبا خۆرا دێ گەهینین و دەربڕیت .
ڕامان نە ئەوە من چ گلە و گازندە و رەخنە ل حزبا خۆ و دەسهەڵاتا هەرێمێ نەبن ، ڕەنگە کێم ژ وە هندی من رەخنە هەبن ، چونکی ئەو کەس و لایەنێ پتر دەسهەڵات د دەستی دا ، پتر کار دکەت و نۆرماڵە خەلەتی ژی هەبن ، لێ نە خەلەتیێن ستراتیژی و پیلان بۆ دارشتی .

بۆ من جهێ شانازیێ یە ، کادر و ئەندامەکێ پارتی دیموکراتی کوردستان بم ، ئەو پارتیا پیرەوکارا رێبازا پیرۆزا بارزانی نەمر ، ئەو رێبازا پێشەنگ ل خەبات و قوربانیدانێ و بدەستڤەئینانا ماف و ئارمانجێن نەتەوی و نشتیمانیێن کوردستانی ب درێژاهیا نێزیکی ئێک سەدە .

شانازیێ بڤێ ڕێبازێ و ڤێ پارتیێ دبەم کۆ دڤی ژیێ درێژ دا چ جارا نەکەفتیە ، هەڵەیێن ستراتیژی دا کۆ ب خیانەتا نشتیمانی بهێتە هژمارکرن ، بەرۆڤاژی ڤێ چەندێ ، هندەک لایەنێن ڕکابەر ، بۆ دژایەتیا پارتی پەنا بۆ خیانەتا نشتیمانی بریە و شانازیێ ژی ب وێ خیانەتێ دکەن ..!

ئەگەر هندەک هەڤالێن من ل تۆرێن جڤاکی وە هزر بکەن ، ئەز د نڤیسینێن خۆدا نەیێ ئازادم ، وان پشتڕاست دکەم هەر پەیڤەکە ئەز دنڤیسم ، د ناخ و دەروونێ مندا دەردکەڤیت ، بێ کۆ بهێمە ئاراستەکرن ، و ب ئەرکێ خۆژی دزانم و چ مننەتا ل پارتیا خۆ ناکەم ..

ئتگەر ئەز دیڤەلانک و کرێگرتی بام ، بۆ کەسەکێ دیارکری ، نە ڕەوشا من یا ئابووری ، نەژی یا کارکرنێ بڤی ئاوای دبوو ،
یا دیارە نڤیسەر و ڕاگەهاندکارێن کرێگرتی ، ل دەمەکێ کورت دا ، دگەهنە ج پۆست و چ ڕەوشا ئابووری دا .

ڕەخنا ئاڤاگەر ، پێتڤیەکا جڤاکی یە ، لسەر نڤیسەر و ڕەوشەنبیر و راگەهاندکارا ، ئەگەر ژبیرا هەڤالان بهێت ، یان ژ بیرا خۆ بینن ، دێ زانن من چەندین گۆتار و راپۆرتێن رەخنەیی ل بەرپەرێن گۆڤار و رۆڤنامە و ماڵپەرا ئاڤا کرنە ، لێ گۆتنێن نەهەژی و مەرامێن شکاندنا لایەنەکی ، یان کەسەکی ، ناچیتە چارچۆڤێ ڕەخنێ ، بەلکی تێکدانا جڤاکی یە .

لدەمێ بەڵاڤکرنا هەر بابەتەکی ل کەناڵێن ڕاگەهاندنێ ، یان سۆشیال میدیایێ ، پێتڤی یە نڤیسەر ، ئاسایشا نشتیمانی و جڤاکی و ڕەوشا سیاسی یا وەڵاتی لبەرچاڤ بگریت ، ل هندەک دەما پێتڤی یە نڤیسەر هندەک ڕەخنا بۆ دەمێن گۆنجایی هەلبگریت ، نەخاسمە بۆ هەرێما کوردستانێ ب گشتی و حکومەتا وێ ، کۆ د ڕەوشەکا تایبەت دایە ژلایێ سیاسی و ئابووری ، پێتڤی یە هەوڵ و نڤیسینێن مە بۆ بۆ ووڕە بلندکرنا خەلکی بن بەرامبەر دەسهەڵاتێ .

چونکی ئەڤ کابینا نوو یا تەحەددایێ بەرامبەر چەندین پیلانێن ناڤخۆیی و عیراقی و هەرێمی دکەت و لسەر ڤێ ڕەوشا دژوار یا ئابووری و ساخلەمی ، پلان و بەرنامێن دلخۆشکەر یێن ئیداری و یاسایی دارێتنە و گاڤێن مەزن بۆ خۆشکرنا ژین و ژیارا وەڵاتیان ژی بەرەڤ پێشڤەبرنە ، وەکی دەستپێکرنا بەرنامێ چاکسازیێ و ئاڤەدانیێ .

بلا ب دیتنەکا نەتەوایەتی و نشتیمانی رەوشا هەرێما کوردستانێ بخوینین و نەکەڤینە دیف پرۆپاکندێن نەیار و دوژمنا .
بلا تنێ ئەرۆ نەبینین ، بەلکی سوباهی و پاشەرۆژێ ژی لبەرچاڤێن خۆ دانێین .
ژبەر ڤێ چەندا پەسنا دەسهەڵاتا کوردستانێ دکەم ، گلە و گازندە و رەخنێن خۆ بۆ دەمەکێ گۆنجایی دێ هەلگرم .
نە من بۆ کەسی نڤیسی یە و نەژی بۆ کەسی دنڤیسم . ب سینگەکێ بەرفرەهــ ، هەمبێزا ڕەخنە و تیبینیێن هەر کەسەکی دکەم .