هەرچەندە ئەز لگەل بکارئینانا پەیڤا شێت نیمە بۆ وان مرۆڤێن هۆشێن خۆ ژدەست ددەن ، چونکی ئەوژی نەساخیەکە مینا هەمی نەساخیا ، لێ ژبەرکۆ پەیڤەکا بەڵاڤە دناڤ جڤاکێ مە بۆ ڤان ڕەنگە مرۆڤان .

ئیسف ئەو مرۆڤە ئەوێ د بوهارا لاوینیا خۆدا ، ژ ئەنجامێ کەفتنێ دناڤ ئۆقیانۆسێ دڵداریێ دا ، بۆ دەمێ نێزیکی چل ساڵا هۆشێن خۆ ژدەست دای .
گەهشتە وی ئاستی کۆ چەندین ساڵا بهێتە قەید و زنجیرکرن ، لێ دوێ گەرما بێ هۆشیێ دا ، نەگەهشتە وی ئاستی بێ ڕێزیێ بەرامبەر هێمایێن گەل و نەتەوێ خۆ و ئاخا کوردستانێ بکەت ، ئانکۆ د وان ساڵێن هۆشێن خۆ لدەست دای ، نەساخیا وی نەشیا کونترۆلێ لسهر هەستا وی یا نەتەوی و نشتیمانی بکەن .

ئێک جار ژی ئاخفتنەک دژی گەل و وەڵاتی و نەتەوا خۆ نەکر ، بەرۆڤای هەردەم درۆشمێن نەتەوی دگۆتن و پەسنا رێبەر و سەرکردە و پێشمەرگەهــ و شۆرەشگێرێن کورد دکرن ، گۆتنێن هەتک بەری دکر جاش و خۆفرۆش و دیڤەلانکێن دوژمنا .

سۆپاس بۆ خودێ کۆ ڤان ساڵا هەتا ڕادەیەکێ باش هۆشێن وی زڤرینەڤە و سەرەرای بێ دایک و بابیێ و بێ مۆچەیێ ژبلێ وی مۆچێ کێمێ( چاڤدێریا خێزانی ) ب رزقێ خۆ یێ ڕازی یە و لسەر هەمان هەڵویستێن خۆ یێن نەتەوی و نشتیمانی یێ بەردەوامە ، لبیرا منە ل ڕاپرسیا سەرخۆبوونا هەرێما کوردستانێ ب هەستەکا بلندا نەتەوی و نشتیمانی ، گۆت بەلێ بۆ سەرخۆبوونا کوردستانێ .

بەرامبەر ڤی مرۆڤی ، هندەک کەس ل کوردستانێ هەنە ، سەرکردە و سەرکێشێن حزبێن بناڤێ کوردستانی نە و خۆ ب ئاقلمەند و سیاسیێن مەزن و کاریزما و لێزان دانێن ، ژبەر دەوڵەمەندیێ و لێکۆمبوونا خەلکەکێ بەرژەوەندخاز مەغرۆر بوونە و هەستێن نەتەوی و نشتیمانی ژدەست دانە ، هەردەم ئەگەرێن دووبەرەکیا جڤاکی و تێکدانا رەوشا ئێمناهیا کوردستانێ و فرتنا ئاخا پیرۆزا کوردستانێ نە ..!

دژبەریا راپرسیا سەرخۆبوونا کوردستانێ بوون و دەلیلیا هێزێن وەڵاتێن داگیرکار دکەن ، بۆ داگیرکرنا کوردستانێ بهێزا چەکی و گەمارۆدانا کوردستانێ ژلایێ ئابووری و سیاسی ، دژبەریا پرۆژێ چاکسازیێ دکەن و دڤێت بەردەوامیێ ب گەندەڵیێ بدەن و برەنگەکێ نەیاسایی دەستا لسەر پشکەکا زۆرا داهاتێ دانێن ،
ئەو سیاسی و ئاقلمەندن ، ئەوێن بووینە ئەگەرێن برسیکرنا خەلکێ کوردستانێ ، درێکا بڕینا بۆدجە و مۆچێ هەرێمێ ، ئەڤ ئیسڤە و چەندین ئیسڤێن دیتر بێ مۆچە کرینە ..!

گەهشتە وی ئاستی ، داخازا ژناڤبرنا قەوارێ هەرێما کردستانێ بکەن ، ئەو قەوارێ بخوینا هزارا شەهیدان هاتیە ئاڤاکرن و خەونا هزاران دلسۆزێن وەکی ئیسڤی .
ئەرێ ئیسڤ ئاقلترە ، یان ئەڤ ڕەنگەر مرۆڤێن خۆ ب ئاقلدار و سەرکردە و سیاس و ڕێبەر دبینن و رەفتار و کریارێن وان دژی گەل و وەڵاتی و بەرژەوەندێن گشتی نە ..!

ئەز باوەر ب سەدان هزار ئیسڤ دێ دژی پیلانێن ڤان پیلانگێرا راوەستن و خەونێن وان ژناڤ بەن ، و ب زکێ برسی ژی دەستا ل ئازادی و رزگاریا کورد و کوردستانێ بەرنادەن .