ئەگەر زێر بهاترین کانزا ژی نەبیت ، ئێکە ل کانزایێن پڕ بها و بکارهێنەرترینە ژلایێ مرۆڤان . لێ هەمی کەس بها و سەنگا وی نزانن ، ژبەرکۆ ژیانا زێرینگری لگەل زێری دەرباز دبیت و لسەر وی بڕێڤە دچیت و دزانیت بدەستڤەئینان و ئامادەکرنا وی چەندا ب زەحمەتە و دێ چەوا پارێزیت ، لەوما پیرۆزترین تشتە لای وی .

لەوما نابیت مرۆڤێن ئاسایی بێ رێنمایی یێن زێرینگری سەرەدەریێ لگەل زێری بکەت ، چونکی یان دێ زەرەرێ لخۆ دەت یان کەسێن بەرامبەر .
قەوارێ هەرێما کوردستانێ ژی کۆ دەسکەفتەکێ نەتەوی و نشتیمانی یە ، بەرهەمێ خەبات و قوربانیدانا خەلکێ شۆرەشگێر و خاباتکارێن کوردستانێ یە و بۆ بدەست ڤەهاتنێ ڤی قەوارەی خوینا سەدان هزاران لسەر هاتیە ڕێتن و بدرێژاهیا زێدەتر سەد ساڵایێ شۆرەش ژپێخەمەت هاتینە بەرپاکرن و پێشمەرگەهێن کوردستانێ ب سەدان داستان تۆمار کرینە .

ژلایێ سیاسی ژی سەرکردێن شۆرەشێن کوردستانی ژبلی شەرێن چەکداری ، شەرێن سیاسی یێن دژوار کرینە و ژیانا خۆ ئێخستیە د مەترسیێ دا ، هەتا کۆ ئەڤ دەسکەفتێ زۆر کێمتر ل بەرهەمێ خەبات و قوربانیدانا گەلێ کورد .

ب دیدەڤانیا دووست و دووژمنا دەستووریکرنا هەرێما کوردستانێ وەکی قەوارەیەک دناڤ دەستوورێ هەردەمیێ عیراقا فیدرال دا ، ژ ئەنجامێ هەوڵ و داکۆکیێن سەرۆک مەسعوود بارزانی بوو لدەمێ ئامادەکرن و دارشتنا دەستوور و سیستەمێ عیراقا فیدرال و دیموکرات ، بەری دەسپێکرنا شەرێ ئازادیا عیراقێ و پشتی بداوی هاتنا شەری و لناڤ چوونا رژێما بەعسا سەددامی .

ئەگەر هەوڵ و داکۆکیێن رژد و بەردەوامێن سەرۆک بارزانی نەبان چ قەوارە بناقێ هەرێما کوردستانێ نەدبوون و حالێ هەرێمێ ژی دا مینا پارێزگەهێن دیترێن عیراقێ بیت .

نهۆ ژی سەرۆک بارزانی و پەیرەۆکارێن رێبازا پیرۆزا بارزانی نەمر ، سەرسەخترین داکۆکیکارێن پاراستن و پێشڤەبرنا قەوارێ هەرێما کوردستانێ ، چونکی ئەو بەری هەر کەس و لایەنەکی بها و گرنگیا قەوارێ هەرێما کوردستانێ دزانن ،

مینا زێرینگری و زێری نە و هەتا هەنە دێ بەرەڤانیێ لێ کەن ، چونکی ئەو دزانن چەند خەبات بۆ هاتیە کرن و چەند قوربانی ژپێخەمەت هاتینەدان و رێکێ نادەن بکەڤیتە د دەستێ کەسێن کۆ بهایێ وێ نەزانن و زۆترین دەم دا دێ لگەل زێرێ عەیار کێمتر ، یان زەردەیێ بێ بها تێکەل کەن و لدەمەکێ نێزک دێ هەمیێ لدەست دەن و دەستا ل پیا درێژتر کەن .

ئەو کەس و لایەن ژی ئەون ، ئەوێن مینا سۆڕان عومەری و سپۆنسەرێن وی ئەڤرۆ داخازا نەهێلانا قەوارێ هەرێما کوردستانێ دکەن و دڤێت هەرێما کوردستانێ بۆ باوەشێ عیراقێ بزڤریت ، ئەو عیراقا د دژوارترین کاودانێن سیاسی و ئابووری دا و چەندین جارە برێکا لەشکری و پیلانێن هەرێمایەتی خەونا ب نەهێلانا قەوارێ هەرێما کوردستانێ دبەن و هەمی لسەر دەستێ پارتی و سەرۆک بارزانی و پێشمەرگەهێن کوردستانێ و خەلکێ نشتیمان پەروەر هاتینە ژناڤبرن ،

ئەڤرۆ دڤێت درێکا ڤان کەس و لایەنێن دیڤەلانک و بجهــ ئینەرێن پیلانێن وەڵاتێن داگیرکار و قەیرانا ئابووری ڤی قەوارەی ژناڤ ببەن ، ئەڤ کەس و لایەنە ژی ئەون ، ئەوێن قوربانی ژپێخەمەت بدەستڤەئینانا قەوارێ هەرێما کوردستانێ نەدای ، لەوما بها و گرنگیا وی نزانن و چ رێز ژی بۆ خەلکێ خەباتکار و قوربانیدەرا نیە . مینا وان کەسانە ئەوێن چ ل زێری نەزانن و بازرگانیێ پێ دکەن ..!