هەر دەسکەفتەکێ بدەستڤە دهێت ، پێتڤی ب قوربانیدانێ ، چ دەسکەفتێن ژیانا تایبەت بن یان ژیانا گشتی .
مەبەست ل ژیانا گشتی دەسکەفتێن نەتەوی و نشتیمانی و ئازادی و رزگاری یە .
ئەگەر دەسکەفتێن ژیانا تایبەت ب خوهــ و مادیبوونێ بدەست بهێن ، دەسکەفتێن گشتی پێتڤی ب خەبات و خۆڕاگری و قوربانیەکا بەردەوامن ، بتایبەت بۆ گەلێ کورد کۆ وەڵاتێ وان لسەر چەند وەڵاتێن داگیرکار و برسیێن بن دەستیکرنا مللەتا و ڤەخوارنا خوینا وان ..!

هەرچەندە قەوارێ هەرێما کوردستانێ ، لدیف خەبات و قورباایدانا خەلکێ کوردستانێ نیە ، کۆ ب سەدان هزاران لێ هاتینە شەهیداکرن و تۆشی مەزنترین زۆرداری بوونە ، وەک ئەنفال و کیمیا باران و وێرانکرنێ ، لێ مەزنترین دەسکەفتێ مەزنێ نەتەوی و نشتیمانیێ خەلکێ کوردستانی یە .

بەڕەڤانیکرن لڤی قەوارەی ژی ئەرکێ هەر تاکەکێ جڤاکی یە ، چونکێ دەسکەفتێ مللەتی ب گشتی یە نە حزبەکێ و کەسەکی ، لدەمێ قەیرانێن دەستکرد بسەر هەرێمێ دهێن ، کەسێن سیاسی یێن مەزن و پەرلەمانتار ، خەبات و قوربانیدانا گەلێ کورد لبەرچاڤ ناگرن ، مخابن لجهێ ئێکگرتنێ درۆست بکەن بۆ تێپەڕاندنا ڤان قەیدانا و پاراستنا ڤی قەوارە ، بۆقێن رژێمێن داگیرکار بۆ جڤاکێ کوردستانێ لێددەن و پیلانا دادرێژن بۆ ژناڤبرنا ڤی دەسکەفتێ مەزن و زڤراندنا هەرێما کوردستانێ بۆ باوەشێ رژێما داگیرکار و ئاڵایێ عیراقیبوونێ بلند دکەن ..! و دژایەتیا حکومەتا هەرێما کردستانێ دکەن ، ب بەهانەیێن نەبوونا مۆچەی .

کەس و لایەنێن ڤێ بۆقێ لێددەن و هەولێن سەردابرنا خەلکی ددەن ، هەر ئەون فاکتەرەکێن سەرەکی بۆ درۆستکرنا ڤان قەیرانا ژ پێخەمەت دەسکەفتێن ماددی و بەردەوامیا وان لسەر رەفتار و سەرەدەری و بازرگانیا نەیاسایی و بجهــ ئینانا پلان و بەرنامێن داگیرکارا ..!

ئەگەر ڤان کەس و لایەنان هەستا نەتەوی و نشتیمانی هەبیت ، یان قوربانی ژپێخەمەت ڤان دەسکەفت و ڤێ ئازادیێ دابن ، دا بەرەڤانکار بن ، نەک پیلانگێر و وێرانکەر .
ئەرێ نەمانا قەوارێ هەرێما کوردستانێ و زڤراندن بۆ باوەشێ عیراقا حەبیب ، دێ ئاریشێن خەلکێ کوردستانێ چارە بن ..؟ ،

یان ڕەوشا سەرتاسەر کوردستانێ دێ گەهیتەڤ کەرکووک و دەڤەرێن کوردستانی پێن پشتی خیانەتا شازدێ ئکتۆبەرێ ڕادەستی داگیرکارا کری ..!
ئەرێ ڕەوشا ئێمناهی و ئاڤەدانی و ئازادیا کوردستانێ دگەل یا عیراقێ دهێتە بەڕاوورد کرن ..؟ ژبلی ڕەوشا دابەشکرنا مۆچەی نەبیت .

ئەگەر ئەڤ کەس و لایەنە د خەما وەڵاتی و وەڵاتیان دابن ، دێ پشتەڤانیا حکومەتا هەرێمێ کەن بۆ چاکسازیا و سەروەریکرنا یاسایێ و دابینکرنا دادوەریا جڤاکی ، بۆ تێپەڕاندنا ڤێ ڕەوشا دژوارا ئابووری لسەر خەلکێ کوردستانێ ، نەک خۆ مەزنترکرن ل یاسایێ ..!

بلا هەلگرێن ڤان خەون و خەیالێن گەنی و پاشکەفتی بزانن ، ئەوێن قوربانی ژپێخەمەت بدەست ڤەهاتنا ڤان دەسکەفتا و ڤێ ئازادیێ داین ، د بەرهەڤن قوربانیێن زێدەتر ژپێخەمەت پاراستنا وان بدەن و ڕێکێ نادەن هەوڵێن وان سەربگرن .

ئەو سەرکردە و سیاسیێن قەیرانێن مەزنتر لسەر کورد و کوردستانیا لادای ، ڕێکێن دەربازکرنا ڤێ قەیرانێ ژی ڤەدیتینە و رێکێ نادەن بەرهەمێ رەنج و خەبات و قوربانیدانا خەلکێ کوردستانێ بکەڤیتە ددەستێ چەند خائین و وەڵات فرۆش و نۆکەرێن داگیرکارا دا ، کۆ بۆ بەرژەوەندێن خۆ یێن حزبی و مادی یاریا ب هەست و سۆزێن خەلکی بکەن .