پشتی چەساندنا پرۆژێ چاکسازیێ پارتی دیموکراتی کوردستان و حکومەتا هەرێما کوردستانێ ، ب دەنگێن هەمی فراکسیۆنێن پەرلەمانێ کوردستانێ ، رژدیا رێزدار مەسروور بارزانی سەرۆکێ حکومەتێ لسەر جێبجێکرنا ڤی پرۆژەی ، زۆربەی حزبێن کوردستانێ بتایبەت ئێکەتیا نشتیمانی ، ب ئاشکرا دژی حکومەتێ و ڤی پرۆژەی راوەستیانە .

دیارە لدەسپێکێ دوێ باوەرێ دا کۆ ئەڤ پرۆژە پروپاندەیە و ئێرادا بجهــ ئینانێ نیە ، و بڤان گەف و پیلانێن دژی پرۆژێ چاکسازی دێ حکومەتێ و سەرۆکێ وێ ئێخنە دناڤبەرا ناڵ و بزماران دا .
ژبەر گەف و پیلانێن وان نەشێت بجهــ بینیت و بەرامبەر خەلکی ژی دێ بێ سۆز بیت و خەلک دێ لێ دوور کەڤیت .

براستی ژی چاکسازی پێتڤیەکا فەرا بلەزە و چەندین ساڵە خەلک چاڤەرێ چاکسازیا ،
ئەگەر ڤێ ناڵێ بزمار نەکەت ، بارگیر نەشێت برێڤە بچیت و دڤێ رێکا تەنگ و چەلەمدا سمێن وی دێ بریندار بن و بار ژی ناگەهیتە قۆناغێ و دێ بیتە ئالڤێ بارگیرێن خەلکەکێ دیتر .

ئەنجامدانا چاکسازیا دووماهی و باشترین دەلیڤەیە بۆ بوکومکرنا باوەریا خەلکێ کوردستانێ ب هەرێما کوردستانێ ب گشتی و حکومەت وێ بتایبەت ، خەلکی باوەری ب مەسروور بارزانی هەیە کۆ کەسایەتیەکێ خودان بریار و ئیرادەیە و بەرژەوەندێن گشتی ناکەتە قەربانی بەرژەوەندێن حزبی و کەسی و ئەو کەسایەتیە ئەوێ بشێت ڤێ ناڵێ بسەروبەر و موکوم ناڵ بکەت و بار و بارگیری بسلامەتی بگەهینتە قۆناغێ .

پڕانیا کەس و لایەنێن دژبەریا حکومەتێ و پرۆژێ چاکسازی دکەن ، کەسێن گەندەلکار و مفاداران ل سەروەت و سامانێ حکومەتێ برێکێن نەیاسایی و ب دەهان هزار مۆچەخۆرێن بن دیواری و نەهەژی هەنە ، ژلایێ سیاسی ژی ئیفلاز بوونە و تاکە سەروەتێ وان یێ جەماوەری ، دەنگێن مۆچەخۆرێن نەیاسایی و کەسێن بۆ بەرژەوەندێن وان هاتینە دامەزراندن .

لەوما وەکی مریشکێن ڤەشارتی لێهاتینە ، هەر جار بۆ لایەکێ خۆ دهەڵاڤێن ، جار بەغدا بۆ بڕینا مۆچە و بۆدجێ هەرێمێ و دابڕاندنا سلێمانیێ و دەورووبەرێن وێ بناڤێ لامەرکەزیەتێ ، جار گەفێن خۆنیشاندانێن بەرفرەهــ دژ حکومەتێ ، جار ژی بەرەڤ رۆژ هەڵات دچن و پێشمەرگەهێن کوردستانێ رادەستی ئیرانێ دکەن و جار ژی دبنە رێنیشاندەێن وان بۆ بۆمبەبارانکرنا بارەگەهێن پارتیێن رۆژهەڵاتێ کوردستانێ ژبووی دابینکرنا پشتەڤانیا ماددی و سیاسی ژلایێ وێ رژێما داگیرکار .

ژبلێ وەلائا وان یا بێ سنوور بۆ عیراقا مووەحەد و داگیرکرنا کەرکووکێ و رادەستکرنا چکدارێن تیرۆرستێن داعش .

ئەڤە هەمی بەڵگەهێن ئیفلاسا وان یا سیاسی و جەماوەری یە و ژبوو مانەڤا خۆ دێ هەمی رێکا بکار ئینن . لێ پڕانیا خەلکێ کوردستانێ ب پیلان و خۆفرۆشی و درەوینیا وان ئاشنا بوونە و د بەرەیێ چاکسازیێ و هەرێمەکا بهێز دانە ب سەرۆکاتیا پارتی و حکومەتا بسەرۆکاتیا مەسروور بارزانی .
تەکەز دکەینەڤە کۆ بارگیرێ هەلگرێ بارێ هیڤی و ئارمانجێن خەلکێ کوردستانێ پێتڤی ب ناڵکرنێ یە ، داکۆ بسلامەتی و سەرفیرازی بگەهیتە قۆناغا داویێ ، ئەو ژی ئەنجامدانا چاکسازیا و سەروەریکرنا یاسایێ یە و خەلک کاک مەسروور بارزانێ ب ئەندازیارێ وێ چەندێ دبینیت و چاڤەرێ یە .
بار و بارگیرێن بەرەیێ دیتر ب ئەنجامدانا چاکسازیا ، دێ ریڤەمینن و تەیرێن کەلەشا دێ شەری لسەر کەن .