ئەگەر ئەم بزڤرینەڤە بۆ دیروکا پڕ سەروەریا رزگاریخوازیا کوردستانێ دێ بینین کو ل بەرخودان و قوربانیدان و خوراگریێ دا ھیچ درێغی نەکری یە و سەرھلدان و شورش لدویڤ شوڕشێ یا چەکداری بەرپا کری یە ، لێ ل ھەڤگرتنا تەبایی و کۆ ھەمی دئێک سەنگەردا بن تا دویماھیا سالێن ھەشتیاندا ل کوردستانا مەزن ب گشتی ونەمازە ل کوردستانا باشور ل چەرخێ بیستێ نەشیاینە ئەڤێ ئارمانجێ بگەھینن و د ھەڤگرتی بن ڤێجا چ لبەر ئەگەر و سەدەمێن نافخویی بن یان دەرەکی .
ئەم دپشت راستین ژی کو ھەردەمێ ھەڤگرتن ھەبیت سەرکەفتن یا مسوگەرە و بەلگەە لسەر گوتنا مە سەرھلدانا بھارا پیرۆزا کوردستانا باشور ل ٥/٣/١٩٩١ ێ کو ھنگی بەرەیی کوردستانی ھەبوو وب سەرپەرشتیا سەرۆک مەسعود بارزانی وسەرەرای بیروبوچوونێن سیاسی یێن جودا جودا و ھەمی لایەنێن سیاسی یێن شورشگێرێن کوردستانێ ل بن چادرگەھا بەرەیی کوردستانی کوم ببوون وخودان ئێک ھەلویستیا نەتەوی بوون و بھەڤکاری دگەل جەماورێ خوراگرێ کوردستانێ شیان مەزنترین سەرکەفتنا نەتەوی ونیشتیمانی ددیرۆکا بزاڤا ئازادیخوازا کوردستانێ ل کۆردستانا باشور تومار بکەن وئەڤێ پارچا کۆردستانێ ل ژێر زولم و ستەما رژێما بەعسا دکتاتور و ئەنفالچی رزگار بکەن و سیستەمێ دیموکراسی ل برێڤەبرنا دەستھەلاتا حکومەتێ پەیرەو بکەن و ببینە خۆدان سەروکایەتیا ھەرێمێ و پەرلەمان وحکومەت و رۆژ ب رۆژ د پێشڤەچوونێ دا بیت ب رزگاربوونا ئەڤێ پارچەیا کوردستانێ کو بوویە پەناگەھەک بۆ پارچێن دی یێن کوردستانا مەزن .
ئەڤرۆ ژی کۆ مللەتێ کورد دھەر چوار پارچێن کوردستانێ ب گشتی ونەمازە ھەرێما کوردستانێ ل باشورێ کوردستانا مەزن د مەترسیترین قویناغ دا دەرباز دبیت کۆ دوژمن و نەحەزێن کوردستانی َ دبوسە و پیلاناندانە دژی ھەرێما کوردستانێ ونەمازە رێکخراوا تیروریستا داعش کو ل روویدانێن ڤێ دویماھیێ ب ئاشکرا ھێرش ئینا سەر چەند دەڤەرێن کوردستانی یێن دەرڤەی ھەرێما کوردستانێ ، لێ ب ھیمەت و خوراگرییا پێشمەرگەھێن قەھرەمانێن کوردستانێ شیان بەرسینگێ وان بگرن و ب سیاسەتا حەکیمانە یا سەرۆک بارزانی وسەرکردایەتیا کورد ل باشورێ کوردستانێ کارین مەزنترین دەولەتا زلھێز کو ئەو ژی ئەمریکا وھەڤپەیمانێن وێ بیننە سەر خەتێ و ببنە پالپشت وھاریکار بۆ لێدانا بنگەھێن تیروریستی و ھنارتنا چەک و تەقەمەنی بۆ دژایەتی کرنا ئەڤێ دەولەتا تیروریستی ئەوا بناڤێ داعش یان دەولەتا بناڤێ خەلافەتا ئیسلامی و ئەوا لژێر پەردەیا ئایینێ پیرۆزێ ئیسلامێ مەزنترین تاوانێن دویر ژ پرەنسیپێن ئایینی و ئەخلاقی و مرۆڤایەتی ددەرحەقی کورد وکوردستانیا ئەنجام ددەت .
ب ھەرحال فەرە ئەڤرۆ بەرەیەکێ کوردستانی یێ نیشتیمانی و نەتەوەیی و ب ھەمی لایەنێن سیاسی یێن کورد و کوردستانی ل ھەر چوار پارچەیێن بھێتە دامەزراندن و دویر ژ حزبایەتیا بەرتەسک وئارمانجا نەتەوەیی ل پێشیا ھەمی ئارمانجەکا دی بیت تاکو بھەڤکاری دگەل دەولەتێن ھەڤپەیمان بکارین و مفایی لڤان گورانکاریێن کۆ دێ ھێنە کرن ل رۆژھەلاتا ناڤین وەربگرین و لسەر ئەڤی دوژمنێ سەرسەخت زاڵ ببین و بگەھیننە ئارمانجێن دویماھیێ کۆ ئەو ژی دەولەتبوونا کوردستانێ یە و .بۆ ڤێ مەبەستێ سەرکردایەتیا سیاسی یێن لایەنێن سیاسی یێن کوردستانی د داخواز کرینە کو ب زووترین دەم کونگرەیا نەتەوەیی سازبکەن کوژ بەر چەند ئەگەرەکا ھەتا نوکە نەھاتیە گرێدان سەرەرای ھندی کو بەری ھێرشێن داعشێ بۆ سەر عێراق و کوردستانێ ھندەک ئامادەکاری ل ھەولێرا پایتەخت بۆ ھاتبوونە کرن و ھەروەھا د داخازکرینە کو بەرەیەکێ ھەڤگرتی یێ کوردستانی دابمەزرینن و رابگەھینن وھزر دڤێ چەندێ دا بھێتە کرن کۆ ئەڤرۆ سەردەمێ پەیرەوکرنا سیستەمێ دیموکراسیەتێ یە ونەک یێ دەرئێخستنا بریارێن تاکرەوی و ھەردەمێ ھەر پارچەیەکادی یا کوردستانا مەزن رزگار بوو دکارن مفایی ژ سەربورا ھەرێما کوردستانا باشور وەربگرن و ب ھەلبژارتنان دەستھەلاتا خوە برێڤە ببەن ، دیسان ئەڤ بەرەیە بریار بھێتەدان کو ھەردەما پارچەیەکا کوردستانێ تووشی داگیرکاری و زولم و ھیرشان بیت لایەنێن سیاسی یێن پارچەیێن دی ب ھەموو شێوەیەکێ ھاریکاریا وێ پارچەیێ بکەن دا بشێت بەرەنگاری ڤان ھێرش زولمکارییا ببیتەڤە ، چونکە ب ھەڤگرتن و تەبایی دێ کارین لسەر ھەمی دوژمن ونەحەزا زاڵ بین و خەون و پیلانێن وان بن گۆر بکەن.ڤێجا بلا بەس بیت ئەو گوتنا کو دبێژیت ب تنێ ئەز بم و کەسێ دی قەبیل نەکەم چونکە ئەو سەردەم نەمایە وئەڤرۆ سەردەم سەردەمێ دیموکراسیەتێ و دەستھەلاتا گەلی یە. فەرە ئەڤەژی ل بیرا مە نەچیت کۆ ئەڤرۆ پتر ھەمی وەختەکێ کورد پێتڤی ب رێککخستنا ناڤمالا کوردی یە کو ھەمی ببنە خودان ئێک ھەلویستا نەتەوی و نیشتیمانی چونکە ئەڤ قویناغا ئەم تێدا دەرباز دبین قویناغەکا ھەستیارە و نەمازە چاڤەرێ گورانکاریێن مەزن دھێنە کرن ل رۆژھەلاتا ناڤین ، لەوما فەرە مللەتێ کورد مفایێ لڤان گورانکاریان وەربگریت تاکو تویشی ھەلەیێن دیروکی یێن بەرێ نەبینەڤە وشەرمەزاری نەڤیێن نوکە و ئاییندە نەبین ژبەرکو دیروک رەحمێ بکەس دا نابەت ،