پرسا کوردی ، ب ئیراقەکا دەستووری و سەروەریا یاسایێ چارە دبیت ..!
غیاس خالد زێباری
هەر وەسا دەست نیشانکرنا ڤی کەسی بۆ ڤێ وەزارەتێ ، یان فلان وەزارەت بۆ فلان پێکهاتێ .... مژارەکا دیترە .
پرسا کوردستانی ، پرسەکا نەتەوی و نشتیمانی یە ، ب کەسەکی یان لایەنەکی چارەنابیت ، ئەگەر ئیراق وەکی دەولەت لسەر بنەمایێن دەستووری و یاسایێ و بسازیکرنێ رێڤەنەچیت .
ئەگەر تەڤایا پلە و پۆستێن ئیراقەکا بڤی ڕەنگی د دەستێ کوردا ژی دا بن ، نەشێن ماف و شایستێن گەلێ کورد دابین بکەن .
ئەرێ د ئیراقا نوو دا کوردا چەند پلە و پۆستێن سیادی و مەزن د دەستی دا بوونە ، وەک سەرۆک کۆمار ، وەزارەتا دەرڤە ، وەزارەتا دارایی ، سەرۆک ئەرکان ، چەندین وەزیر و رێڤەبەرێن گشتی و کۆمەکا پەرلەمانتارا و پلەدارێن لەشکری ، ئەرێ شیانە ب رۆلێ خۆ یێ درۆست راببن و پرسا کورد و کوردستانی چارە بکەن ....!
ڕامان نە ئەوە ئەڤ پلەدار و نوونەرێن کوردستانێ خودان شیان نەبوونە ، بەلکی ئیراق نەبوویە دەولەتاکا خودان سازی کۆ باوەری ب سیستەمێ فیدرالی و دیموکراسیێ هەبیت ، بەلکی باوەریا پڕانیا سیاسەتمەدارێن عەرەبێن ئیراقێ ئەوە کۆ فیدرالیەت و جێ بجێکرنا دەستوورێ هەردەمی و دابینکرنا مافێ پێکهاتا ب تایبەت گەلێ کورد ، خیانەتەکا نشتیمانی و دابەشبوونا ئیراقێ یە ..!
ئەڤە نە تنێ دیتن و بۆچوونێن هندەک سیاسیا یان چەند حزبەکێن ئیراقی یە ، بەلکی پشکەکا زۆرا جادا ئیراقی ژی لسەر ڤێ بۆچوونا شۆفینی یە ..!
لەوما هەر لایەنەکێ سیاسی یێ ئیراقێ دژبەریا ماف و ئارمانجێن گەلێ کورد بکەت ، خۆشتەڤیتر دبیت ژلایێ جاددا عەرەبیا ئیراقێ .
هەرچەندە کارەکێ بزەحمەتە و نێزیکی مەحالێ یە ، چونکی ڕێڤەبرن و بریارا دەولەتا ئیراقێ ددەستێ وەڵاتێن هەرێمی و کەسایەتیێن ئایینی یێن پێکهاتەکا دیارکری دایە ، بێ گوهدان ل یاسا و دەستوور و رێکەفتنا .
لەوما پێتڤی یە سەرکردایەتیا سیاسی یا کوردستانی و پارتێن کوردستانێ ، داکۆکیێ لسەر ب سازیکرن و دیموکراسیکرن و بجهـ ئینانا دەستووری بکەت ، نەک لسەر ڤی بۆستی و پۆستێ پۆستێ هەنێ .
چونکێ ماف و شایستێن هەرێما کوردستانێ ب پلە و پۆستا چارە نابن ، بەلکێ پێتڤی سەرەدەریێ لگەل حکومەتێن ئیراقێ بکەت لسەر کارناما حکومەتێ کۆ د بەرژەوەندا خەلکێ کوردستانێ دا بن ل چارچۆڤێ دەستوورێ وەڵاتێ .
بۆ ڤێ چەندێ ژی بەری هەر تشتەکی پێتڤی یە ، هێز و ئالیێن سیاسی یێن کوردستانێ بەرامبەر ئیرقێ د ئێکگرتی و ئێک رێز بن و پەیوەندیێن خۆ لگەل وەڵاتێن زلهێز و هەرێمی و سازیێن نیڤ دەولەتی بهێزتر بکەت ، داکۆ ل هەر بریار و رەفتارەکا حکومەتا ئیراقێ دژی کوردستانێ ، پشتەڤانیا هەرێمێ بکەن .
ئەگەر حکومەتا ئیراقێ یا بسەرۆکاتیا مستەفا کازمی درێژەپێدەرا سیاسەتا حکومەتێن بەرێ بیت ، ئیراق دێ بەرەڤ پاشەرۆژەکا تاری نەدیار چیت ، چونکی پشکەکا زۆرا لایەنێن سیاسی و جادا ئیراقی دژی ڤێ حکومەتێ نە و روور نیە لدەمەکێ نێزیک دا خۆنیشاندانێن بەرفرەهــ ل باژارێن ئیراقێ دەسپێبکەنەڤە و ڤێ کابینێ بێخنە دناڤبەرێ ناڵ و بزمارا دا ،
بجهــ ئینانا داخازیێن جەماوەری و ئەنجامدانا چاکسازیا ، یان ژی ئەجندایێن وەڵاتێ سپونسەر و داینەمۆیا رێڤەبرنا ئیراقێ ، کۆ دوو مژارێن هەڤ دژن .
بڕانیا لایەنێن کوردستانێ دەنگ دایە ڤێ کابینێ و پێتڤی یە پشتەڤانیا مستەفا کازمی بکەت و بەرامبەر ڤێ پشتەڤانیێ ب رژدی لسەر دابینکرنا ماف و شایستێن سیاسی و دارایی بکەن لدیف دەستوو و یاسا و رێکەفتنا و هەبوون و کاریگەریەکا کوردستانی د ژێدەرێ بریارێ و رێڤەبرنێ دا .
ئەز باوەرم کازمی ژی پێتڤی ب کوردا هەیە ، ئەگەر بڤێت یێ بەردەوام و سەرکەفتی بیت د سەرۆکاتیا حکومەتا ئیراقێ بۆ نهۆ و قۆناغا داهاتی .
