پیلانەک ، ل شازدێ ئکتۆبەرێ بچیکتر
غیاس خالد زێباری
لێ راستە هندەک جاران شیانە ئارمانجێن خۆ یێن خیانەتکاری بجهــ بینینن ، لێ پشتی دەمەکێ کورت کەفتینەڤ خەپکێن نەیاران دا و شەرمزاری دیرۆکێ و گەلێ خۆ بووینە .
هەر ل ئازادیا باشوورێ کوردستانێ ژ ئەنجامێ سەرهەلدانا پیرۆزا سالا ۱۹۹۱ و حکومەتا هەرێما کوردستانێ و سازیێن هەرێمێ بوویە ئارمانجا دوژمن و نەیاران و چەندێن پیلان بۆ ژناڤرنا وێ هاتینە دارشتن ، هەر ل گەماروویێن ژلایێ رژێما بەعسا ئیراقێ و چەندین گەرێن شەرێ نافخۆیی یێن چەند ئالی ،
لێ نەشیان ئارمانجێن خۆ بجهـ بینن و پشتی هەر پیلانەکێ هەرێما کوردستانێ و حکومەتا وێ لێ دەرباز بوویە و گاڤێن پێشڤەچوونێ هاڤێتینە و ب شێوازەکێ باشتر و سەردەمانە دەسکەفتێن نەتەوی و نشتیمانی پاراستینە و نووژەن کرینە .
دەسهەڵاتدارێن ئیراقا نوو یا پشتی ۲۰۰۳ ێ یێ ، ئەو ئیراقا بناڤ فیدڕال و دیموکرات و هەرێما کوردستانێ کۆ هەرێمەکا یاسایی و دەستووری و دانپێدان کریە دناڤ ئیراقێ دا ، ل پیلانێن وان خلاس نەبوویە .
بتایبەت پشتی پشتەڤانیا هەرێما کوردستانێ سازیێن دەولەتا ئیراقێ هاتینەڤ دامەزراندن و بهێزکرن ، پێکهاتا پڕانی یا جڤاکێ ئیراقێ کۆ شیعەنە هەمی سازی و دەسهەڵاتێن ئیراقێ کۆنترۆل کری ، بێ گوهداریکرن ل یاسا و دەستوور و رێکەفتنا پیلانێن دوژمنکارانە یێن سیاسی و ئابووری و لەشکری دژی هەرێما کوردستانێ دارشتن و مەرەما وان ژناڤبرنا قەورێ هەرێما کوردستانێ یە .
مەزنترین پیلانا وان شازدێ ئکتۆبەرا سالا ۲۰۱۷ ێ بۆ کۆ پیلانەکا ڤڕە ڕەهندی بوو ، ژلایەکی بڕینا بودجە و مۆچێ هەرێمێ ، ژلایەکێ دیتر هێرشێن لەشکری ، ژلایەکێ دیتر گەماروویێن ئابووری و سیاسی و .... هتد .
بێ گۆمان دەستێن هەرێمی و نافخۆیی ل رۆلێ حکومەتا ئیراقێ د وێ پیلانێدا کێمتر نەبوو . چونکێ حزبەکا سیاسی و چەکداری یا کوردستاێ ب ئاشکرا پشکەکا کارا و ئەکتیڤا هێزێن داگیرکەرێن کوردستانێ بوو ، ژبوی ناڤبرنا قەوارێ هەرێما کوردستانێ .
لێ سەرەرای وێ پیلانا مەزن ، هەرێما کوردستانێ ژلایێ لەشکری و سیاسی و ئابووری سەرکەفت و خۆ ڕاگرت ، ژلایێ لەشکری پێشمەرگەهێن کوردستانێ داستانێن مەزن سەر لەشکرێن وان تۆمارکرن ، ژلایێ ئابووری خەلکێ کوردستانێ هەستا خۆ یا نەتەوی و نشتیمانی دیارکر و پشتەڤانیا حکومەتا هەرێمێ کر ،
ژلایێ سیاسی سەرۆکێ هەرێمێ نێچیرڤان بارزانی پشکەکا دبلۆماسیەتا خۆ بکار ئینا و پشتەڤانیا نیڤ دەولەتی بۆ کوردستانێ دابین کر و حکومەتا ئیراقێ ب نەچاری زڤریەڤ دیالۆگ و دانۆستاندنان لسەر بنەمایێ دەستوورێ .
خیانەتکار و خۆ فڕۆش ژی وەکی هەرجار رووڕەش و شەرمزار بوون .
ئەڤ هەوڵێن نهۆ ژی یێن دژی هەرێما کوردستانێ بۆ بڕینا مۆچێ خەلکێ کوردستانێ و دابڕاندنا سلێمانیێ ل حکومەتا هەرێما کوردستانێ بناڤێ خۆسەریێ ( لا مركزي ) پیلانەکا دارشتیە و هەمان مەرەما شازدێ ئکتۆبەرێ هەیە ، لێ ب شێوازکێ دیتر .
لێ ئەز باوەرناکەم مینا شازدێ ئکتۆبەرێ کاریگەری هەبیت ، ئەگەر سەرۆکێ هەرێمێ و سەرۆکێ حکومەتا هەرێما کوردستانێ لسەر ئاستێ جەماوەری و ناڤخۆیی و هەرێمێ و نیڤ دەولەتی، سیاسەت و دبلۆماسیەتا خۆ بکار بینن و ڕاستیا پیلانێ بهێتە ئاشکراکرن ، ئەڤ پیلانە سەرناگرێت چۆنکی جەنابێ وان و هەرێما کوردستانێ سەنگ و پێگەهەکێ تایەت و کاریگەر هەیە لسەر ئاستێ نێڤ دەولەتی و بەرژەوەندێن زۆر وەڵاتان ژی یێن تێکەلی هەرێمەکا کوردستانیا بهێز بووی .
ئەوێن شیای پیلانا شازدێ ئکتۆبەرێ بهەڵوەشینن دێ شێن ڤێ پیلانێ ژی بهەلوەشینن . نەخاسمە کۆ ئراقا ئەڤرۆ زۆر ل ئیراقا وی دەمی لاوازترە ، لێ پێتڤی یە خەلکێ سلێمانیێ و دەوربەر ، لامەرکەزیەتا هندەک سیاسیێن بەرژەوەندخاز و هزر بەرتەسک و بکەرب و کین داخاز دکەن ،
نە د بەرژەوەندا دەڤەرێ و دۆزا سیاسی یا کوردستانێ دایە ، نەژی دبیتە ئەگەرێ ڤەژاندنا دەڤەرێ ژلایێ ئابووری و جڤاکی ،
بەرۆڤاژی ئەگەر و گاڤەکن ژبووی ناڤبرنا قەوارێ سیاسیێ هەرێما کوردستانێ و هەوڵەکە بۆ سەپاندنا دەسهەڵاتا سیاسی و لەشکری یا ئیراقێ .
لێ پێتڤی یە حکومەتا هەرێما کوردستانێ ژی ڕەوشا ئابووری یا خەلکێ کوردستانێ لبەرچاڤ بکریت و هەولێن جدی بهاڤێت بۆ دابینکرنا مۆچێ مۆچەخۆرا و ئەنجامدانا چاکسازیێن بنەڕەتی و سەروەریا یاسایێ و دەسهەڵاتێن زێدەتر بدەتە یەکەیێن کارکێری و پیلان و گاڤێن خیانەتکاران ژی بۆ خەلکی بهێنە ئاشکرا کرن .
