بەری مرۆڤ تێکەلیا جڤاکەکی یان کەسەکی بکەت پێتڤی یە پێشوەخت سایکۆلۆژیا وی جڤاکی یان وی کەسی خوونیت و بزانیت .
چ ئەو تێکەلی و پەیوەندی بۆ مەرامێن هەڤالینیێ و پێکڤە ژیانێ بن ، یان ژی بۆ دەسپێکرنا شەرەکی بن ، ژبووی بدەستڤەئینانا دەسکەفتێن ماددی و مەعنەوی بن پشتی سەرکەفتنێ .

ئەگەر مرۆڤ سایکۆلۆژیا وی جڤاکی نەزانیت ئەوی بۆ جارا ئێکێ تێکەلیێ لێ دکەت ، بۆ هەر مەرەمەکێ دبیت ، چ ئاشتی و پێشڤەچوونێن جڤاکی بن یان مەرەمێن دیتر ، ژبەر نەزانینا رەفتار و داب و نەریت و شیانێن وی ، سەرەدەریکرن لگەل دێ زۆرا بزەحمەت بیت ، دبیت لسەر مرۆڤی گران راوەستیت .
نابیت لدەسپێکا پەیوەندیێن لگەل جڤاک و کەسان مۆڤ شیان و چووکەرێن خۆ نیشا یێن بەرامبەر بدەت ، داکۆ خالێن بهێز و لاوازێن مرۆڤی دیار نەبن . هەردەم هەول بدە هەمی لایەنێن بەرامبەر بزانی ، ئەگەر مەبەست ل تێکەلیێ هەڤالینی و پێکڤە ژیان بیت . پەیوەندیێن موکۆم لسەر بنەمایەکێ ساخلەم و درێژ خایەن و بەرژەوەندێن دوو ئالی دێ هێنە ئاڤاکرن . ئەگەر بۆ مەبەستێن شەری و بدەستڤەئینانا هندەک ئارمانجا ژی بیت ، دیسان پێتڤی یە هەمان شێوە بیت ، ئەگەر نە دبیت شیانێن وی ل شیانێن تە بهێزتر بن و هێشتا دبەزر دبن ، دڤی دەمی دا شکەستن و ناڤچوونا تە نێزیکرتە ل سەرکەفتنێ و بەردەوامیێ .
هاتنا ڤایرۆسا کۆرۆنایێ بۆ هەرێما کوردستانێ ، هاتنەکا نەشخافلی بوو و ڤی دژمنی بێ کۆ جڤاک و دەسهەڵاتا هەرێما کوردستانێ و شیانێن تاکێ کورد بخوونیت و هەلسەنگینیت ، شەر لبەرامبەر ڕاگەهاند و پڕانیا کارت و چووکەرێن خۆ بکار ئینان ،

ئەڤ رەفتار و بێ مننەتیا وێ ڕەنگە ژ ئەنجامێ غرووریێ بیت ، ژبەر بەردەست نەبوونا چەکێن کاریگەر لسەر وێ ، یان ژی هەبوونا لەشکرەکێ زۆر و …..هتد
یان ژی زانیاریێن هەوالگیری لسەر هەرێما کوردستانێ و خەلکێ کوردستانێ بەرۆڤاژی گەهشتینێ و مرۆڤێ کوردستانی و دەسهەڵات و سیستەمێ وێ یێ ساخلەمی لاواز دبینیت …!
لێ هەتا نهۆ ئەنجام د بەرژەوەندا خەلکێ کوردستانێ و دەسهەڵات و حکومەت و سیستەمێ وێ یێ ساخلەمی دەردکەڤن و هەتا نهۆ بەرۆڤاژی پڕانیا وەڵات و جڤاک و سیستەمێن ساخلەمیێن جیهانێ ، ڤایرۆسا کۆرۆنایێ ( کۆڤید ۱۹ ) نەشیایە مەرەمێن خۆ ل کوردستانێ بجهــ بینیت و ئەگەر ڕەوش بڤی ئاوایی دەرباز ببیت ، سەرکەفتنا ئێکجاریا کوردستانێ بسەر ڤی دۆژمنێ بهێز و کاریگەر و چەکدار زۆرا نێزیکە ،
ئەڤە ژی سەرکەفتنەکا مەزن و دیرۆکی یە بۆ خەلکێ کوردستانێ و دەسهەڵات و حکومەتا وێ .
لێ نابیت خۆ پشتڕاست بکەین و سەرکەفتنا ئێکجاری بسەر کۆرۆنایێ ڕابگەهینین ،
دبیت هێشتا شەپۆڵ و کارتێن دیتر ددەستێ وێدا هەبن و پشتڕاستبوونا مە ببیتە ئەگەرا کارەساتەکا مەزنا مرۆڤی .
دبیت ژی ڤی دۆژمنی شیانێن بەرهنگاریا مرۆڤێ کوردستانێ و پلانێن دەسهەڵاتا کوردستانێ نەبن .
بڕەنگەکێ گشتی قەیرانا کۆرۆنایێ دیارکر کۆ کەسێ کوردستانێ یێ بهێز و خودان ئیرادە و خۆڕاگرە ، چ ژبەر روودان و کارەساتێن کەڤن ، یان ژی ژینگەهــ و خارنێن ساخلەم بن .
دەسهەڵات و حکومەتا هەرێما کوردستانێ ژی دڤ ڕەوشێ دا دیار کر کۆ خەمخۆرێن گەل و وەڵاتێ خۆنە و پێشبینیێن وان راست دەرچوون و د پلانێن خۆدا بسەرکەفتن .
لێ پێتڤی یە بۆ هەر ئەگەرەکا دیتر ژی د بەرهەڤ بین و رێکار و رێنما و بریارێن حکومەت و سازیێن ساخلەمیێ بجهــ بینین .
دبیت بۆ ڤۆناغێن داهاتێ ڤایرۆسا کۆرۆنا جڤاک و دەسهەڵاتا هەرێمێ باشتر بخوینیت و چەک و رەفتارێن جودا و کاریگەرتر بکار بینیت و بکەت .