ل دەڤەرا مە کەسەکێ ئاڵووز ژلایێ دەروونی بناڤێ ( زاهێر ) هەبوو ، بەردەوام داخازا هاریکاریا پارەی ل خەلکی دکر ، چ جۆرە پارە..؟ ، تنێ دینارێن ئاسن د ڤیان ، ئەگەر ( ۲٥ ) دینار و ( ۱ ) دینارێ ئاسن لبەر دانا بان ، دا دینارێ ئاسن هەلبژێریت .

دوعایا هەردەم و بەردەواما زاهێری بۆ کەسێن دینارەکێ ئاسن ددایێ ئەو بوو ، ( ( ٳن شاء اللە ) خودێ تە ببەتە بەر دەرگەهێ بەهەشتێ ) ، ئەم نزانین مەبەستا وی ل بەردەرگەهێ بەهەشتێ چ بوو ..! بووچی نە دگۆت بچیە دناڤ بەهەشتێ دا ...!
بۆچی تنێ دینارێن ئاسن دڤیان ...!
دبیت ب هزرا وی دەرگەهێ بەهەشتێ جهەکێ بلند بیت و هەمی بەهەشتێ بینیت ..! یان ب باوەریا وی ئەوێ چۆبەردەرگەهێ بەهەشتێ ، خودێ مەزن نازڤرینیت و ب دلۆڤانیا خۆ دێ بەتە د بەهەشتێ دا .

بۆچی ل دەڤ زاهێری ئێک دینارێ ئاسن ل بیست و پێنج دینارێ کاغەز بهادارتر بوو ...! ئەم هەمی دزانین ل وی سەردەمی بیست و پێنج دیناری پێتڤیێن چەند رۆژا یێن ماڵەکێ دابین دکرن .
دبیت جامێر د وێ باوەریێ دابیت کۆ دینارێ ئاسن خۆراگرترە و د شیانا زۆر خەلکی دا هەیە زێدەتر ل جارەکێ خێرێ پێ بکەت ..
دبیت ژی رازبوون بیت ب خێرەکا کێم ..

ئەڤە هەمی بۆچوونن و تنێ خودێ مەزن یا راست دزانیت ، لێ زاهێرێ رەحمەتی شیا ڤێ رێکێ بارێ خێرخازا گران نەکەت و ژیانا خۆ پێ دابین بکەت و دبیت ببیتە ئەگەرێ دۆرکەتنا خەلکەکێ ل دۆزەخێ و نێزکی بەهەشتێ بکەت .

زینیا وەرتێ کۆ بوویە بابەتێ گەرمێ رۆژێ و یاریێن سیاسی لسەر دهێنە کرن ، ئەو زینیا پشکەکا عەردێ باشوورێ کوردستانێ و لبن دەسهەڵاتا حکومەتا هەرێما کوردستانێ ، ئەو حکومەتا دڤێت ب ئاکنجیکرنا بەروەختا هێزەکا پێشمەرگەهێن کوردستانێ یێن سەر ب وەزارەتا پێشمەرگەی ڕێگریێ ل بەڵاڤبوونا مەترسیەکا دژوار بکەت کۆ پەتایا کۆرۆنایێ یە و ئارامیێ بۆ دەڤەرێ دابین بکەت و هەر وەکی خەلکێ کوردستانێ لناڤ دۆزەخێ ببەتە بەر دەرگەهێ بەهەشتێ ،

ئەگەر پشتەڤانی لێ بهێتە کرن کۆ هێزێن بڤی ڕەنگی ل پڕانیا دەڤەرێن مەترسی لێ هەی چ مەترسیێن کۆرۆنایێ ، یان یێن بازرگارنی و قاچاغچیاتیێ و ئێمناهیێ بن بهێنە بەڵاڤکرن و بجهــ کرن ، دبیت خەلکێ کوردستانێ ل بەردەرگەهێ بەهەشتێ ببەتە دناڤ بەهەشتێ دا .

لێ جهێ پسیارێ یە ئەرێ ئەو کەس و لایەنێن سیاسی یێن یاریا ب پرسا زینیا وەرتێ دکەن ، دڤێت خەلکێ کوردستانێ ل مەترسیا قورتال بکەت و ببەتە بەر دەرگەهێ بەهەشتێ ..؟
بێ گۆمان نەخێر ، چونکی کۆمکرنا میلیشیا و چەکدارێن حزبی بەرامبەر هێزەکا پێشمەرگەهێن سەر ب وەزارەتا پێشمەرگە بۆ تێکدانا ئارامیا دەڤەرێ و کوردستانێ و گەف و داخۆیانیێن وان یێن مەترسیدار ، رەوشا هەرێما کوردستانێ بەرەڤ ئاراستەیەکا دژوار و تەشەنەکرنا ڕەوشێ دبەن .

سەرەرای کۆ لایەنەکێ ئاریشێ نە دوور نە نێزیک پەیوەندی ب دەڤەرێ نینە و هێزەکا بیانی نە . لێ مخابن سەرەرای ڤێ چەندێ ئەو هێز و میلیشیایێن حزبی هەبوونا خۆ ڕەوا دبینن و هێزێن فەرمی یێن پێشمەرگەهێن کوردستانێ ب هێزەکا حزبی هژمار دکەن و داخازا دوورکەفتنا وان دکەن ....!

دیارە مەبەستان وان لڤان رەفتار و سەرەداریان تێکدانا رەوشا ئاراما کوردستانێ بەرەڤ دوو ئیدارەیی یێ ببەن و ەردەوامیێ ب قاچاغچیاتیێ بازرگانیێ بدەن و دانانا بەربەستا یە بەرامبەر ڤێ کابینا حکومەتا هەرێما کوردستانێ بۆ سەروەریکرنا یاسایێ و دابینکرنا دادوەریێ و سەرکەفتنێن وێ یە لسەر ئاریشە و قەیرانێن سیاسی و ئابووری و جڤاکی و بهێزکرنا هەرێمێ .

ئەرێ بۆچی سەرانێن وان باندان مینا زاهێرێ رەحمەتی هزر ناکەن و ب دینارەکێ ئاسن رازی نابن و دڤێت بەرووکێن خەلکی بدڕینن ...! و چ ل بەرووکێن خۆ نەئیننە دەر ..!
ب تایبەت ئەوێن پشکەکا کاریگەر ل حکومەتێ ، و ئەڤرۆ رەفتارێن وان ل ئۆپۆزیۆنەکا دۆژمنکارانە دچن ..!

دبێژینە وان ئەگەر هۆن ڕێکا بەرەڤ دەرگەهێن بەهەشتێ بۆ خەلکی خۆش نەکەن ، بەرێ خەلکی نەدەنە دۆزەخێ ژی ..!
خەلکەکێ هەی دشێت رێکا بەهەشتێ خۆش بکەت و دەرگەهێن وێ ژی بۆ بەختەوەریا خەلکێ کوردستانێ ڤەکەت .
هەبوونا وە ل زینیا وەرتی دێ دووزەخ هێتە دیتن ، نەک بەهەشت .