رووداوی رادەست کردن و رادەست نەکردنی مستەفا سەلیمی زۆر پرسیاری بە دوای خۆیدا هێناون و دەستکەوتنی وەڵامەکانیش ئاسان نییە، سەرەتای رووداوەکە پرسیار ئەوەبوو ئایا محەمەد سەلیمی رادەست کراوەتەوە یان تۆمەتێکی هەڵبەستراوە؟ با وەڵامی ئەو پرسیارە بۆ مێژوو بەجێ بێڵین و درەنگ یا زوو مێژوو بڕیاری خۆی دەدات، یەکێک لە پرسیارە بێ وڵامەکان بێدەنگی کاک کۆسرەت و کاک مەلا بەختیار و زۆر کاکی تریشە کە خاوەنی مێژوویەکی دوور و درێژن لەناو ئەو حزبەدا، پرسیارێکی تر بێدەنگی کاک قوباد تاڵەبانیشە وەک کوڕی مام جەلالی دامەزرێنەر و خاوەنی حزبەکە.
پرسیارێکی تر بەیاننامەی چەند بەناو نووسەر و رۆشنبیرێکی گوماناوییە کە کورد گوتەنی: ببوونە میرووی دەنگێ و لەگەڵ روودانی هەر رووداوێک بە راست و چەپدا دەکەوتنە بەشینەوەی تۆمەتی بێبنەما، ئێستا ئەوانە داوا دەکەن ئەو ئیعلامە رابگیرێ کە بە هۆی رووداوی مستەفا سەلیمی هاتۆتە کایە، مەبەست لەو بەیاننامەیەش جگە لە پەردە پۆش کردن و دیزە بە دەرخۆنە کردنی رووداوەکە هیچ لێکدانەوەیەکی تر هەڵناگرێ.
حکومەتی هەرێم بۆ گەیشتن بە راستی رووداوەکە لیژنەیەکی پێکهێناوە و پارتی چاوەڕوانی ئەنجامی لیژنەکەیە و تا ئێستا لە هیچ کەناڵێکی فەرمی پارتی باس لەو رووداوە نەکراوە، پرسیارەکە ئەوەیە هەندێ پەیج و سایتی دیاریکراوی یەکێتی و هەندێ کادیری دیاریش، لەباتی ئەوەی بە بەڵگە بیسەلمێنن کە مستەفا سەلیمی رادەست نەکراوە پەلاماری پارتی دەدەن، دوا پرسیار ئەوەیە تۆ بڵێی ئەو پرسیارانە تا سەر هەر ئاوا بێ وەڵام بن؟