ئەز دگەل وێ چەندێ مە کۆ نابیت مرۆڤ ل چ دەم و گاڤا ، ژبەر چ ئەگەر و روودانا دەستا ل هیڤی و ئارمانجێن خۆ بەردەت و بێ ئۆمێد ببیت و خۆ ڕادەستی قەدەرێ بکەت . چ ئارمانجێن گشتی بن یان یێن تایبەت ،

چونکی د ژیانێ دا هەردەم ستری و ئاستەنگ بەرامبەر گاڤێن بەختەوەریێ و بدەست ئینانا ئارمانجا هەنە ، لێ پێتڤی یە یێ خۆڕاگر بیت و ب لێزانی سەرەدەریێ لگەل وان سترێ ئاستەنگا بکەت و بهەوڵێن لادانا وانڤە ماندی نەبیت ، ئەگەر نەشێی وان لابدەی رێکا خۆ بگۆڕە .

ئەگەر چ رێکێن دیتر ژی نەبن پەنایێ بۆ ئکگرتنێ ببە، چونکی ئەو هەمی ئاستەنگا دپلخینیت ...!
گەلێ کورد و بزاڤا رزگاریخوازیا کوردستانی هەردەم قوربانی دووبەرەکیێ و ناکۆکیێن لایەنا و دەڤەرکاتیێ و عەشیرکاتیێ ..... هتد بوویە .

هندەک کار لسەر دانانا بنیاتێ ئێکگرتنێ و ئێکرێزیێ دکەن بۆ گەهشتن ب ئارمانجا ، هندەک ژی هەردەم ستری ئاستەنگن بۆ هەفاندنا وی بنیاتی ...!
هندەک جاران ئێکگرتن هێشتا بناغە بوو دهاتە ، دهاتە هەرفاندن و ژناڤبرن ...!
هندەک جاران ژی دگەهشتە گەڕێن دووماهیێ .

هندەک بۆ دروستکرنا ئاڤاهیێ ئێکگرتنێ دچن هۆستایا ل هەمی دەڤەرا بینن ، هندەک دچن بۆسا ل پێش دادنێن و ل نیڤا ڕێکێ دکۆژن ....! هەتا نهۆ دیرۆکا مە ئەڤێ چەندێ ڤەگێریت .
ڕەنگە د کەڤندا هەمی مللەتان ئەڤ چەندە هەبیت ، ئەگەر نهۆ بەرێ خۆ بدەینە وەڵاتان دێ هەڤڕکیێن سیاسی و بیر و بۆچوونێن جودا بین ، لێ لدەمێ هەست کرن ب هەر مەترسیەکا سرۆشتی ،

لەشکری ، سیاسی ، ئێمناهی یان ئابووری لسەر جڤاکی و وەڵاتی ، هەمی هێز و ئالیێن سیاسی یێن ناکۆک و هەڤدژ ، دەسهەڵاتدار و ئۆپۆزسیۆن .
هەڤڕکی و دژبەریێن خۆ ڕادگرن و هەمی هەوڵ و شانێن خۆ تەخان دکەن بۆ دەربازبوون ل وێ کارەساتێ و مەترسیێ .

نەمێژەیە لدەمێ کۆرەتایا لەشکری دژی حکومەتا تورکیا ل ۱٥/۷/۲۰۱٦ زۆرینەیا حزب و ئالیێن سیاسی یێن تورکیا یێن بەرهەلستکار ژی کۆ ناکۆکیێن کویر لگەل ئێک هەبوون ،
بوونە پشتەڤانیەکا بهێز بۆ پارتیا دەسهەڵاتدا ژبۆی هەلوەشاندنا وێ پیلانێ و سەرنەگرتنا کۆدەتایێ ،

ژبەرکۆ هەست ب مەترسیێ کر لسەر وەڵاتی و شێوازێ حوکمڕانیێ و پشتی نوورمالبوونەڤا ڕەوشێ ، دەست کار و پلانێن خۆ کرەڤە و ئەوێن بەرهەلستکار زدەتر ل جاران بەرهەلستیا حزبا دەسهەڵات کرەڤە و حزبا دەسهەڵات ژ زێدەتر ل جاران هەوڵێن موکۆمکرنا خۆ ل دەسهەڵاتێ کر .

نهۆ ژی پەتایا کۆرۆنایێ کۆ مەترسی لسەر جڤاکی و دەسهەڵاتێ دروس کریە ل پڕانیا وەڵاتێن جیهانێ حزب ئالیێن ئۆپۆزسیۆن چالاکیێن خۆ ڕاگرتینە و ژپێخەمەت بەرژەوەندێن گشتی و پاراستنا ئاسایشا جڤاکی و زاڵبوون بسەر ڤێ مەترسیێ پشتەڤانێن دەسهەڵاتێ نە بۆ دەربازبوونێ لڤێ ڕەوشێ .

من وەکی تاکەکێ کوردستانی هزر دکر پەتایا کۆرۆنایێ دێ بیتە فاکتەرێ ئاڤاکرنا ئاڤاهیێ ئێکرێزیا هێز و ئالیێن سیاسی و خۆ بەرهەڤکرنەکا تەبایی بۆ بهێزکرن و پێشڤەبرنا دەسکەفتێن گەلێ کورد و ئاشتەوایەکا جڤاکی .

لێ مخابن دڤان کاودانێن پڕ مەترسی دا ناکۆکیێن سیاسی ل کوردستانێ یێ دژوارتر دبن و هندەک کەسایەتی و ئالیێن سیاسی یێن بازرگانیێ بڤێ مەترسیێ دکەن و دژبەریا حکومەتا هەرێما کوردستانێ دکەن بۆ زاڵبوون بسەر ڤێ ڤایرۆسا کۆژەک ، ئەو حکومەتا گاڤ و سەردەری و ڕێکارێن وێ یێن بەرهنگاریا تەشەنە نەبوونا کۆرۆنایێ جیهان حیبەتی کری و هەتا راددەیەکێ باش هاتیە کۆنترۆلکرن .

مخابن گەهشتیە وی ئاستی پشکەکا دەسهەڵاتدارێن حزبەکا دیارکری، ل دەڤەرەکا دیارکری ئیرادا خۆ سەپاندی یە و وەکی پێتڤی گۆهداریا رێنما و رێکارێن حکومەتێ ناکەن ، داکۆ لسەر دەستێ وێ ئەڤ سەرکەفتنا مەزن نەهێتە تۆمارکرن .
ئەرێ ما ئەڤەیە هەستکرن ب بەرپرسیاریا جڤاکی و ئەخلاقی ..!

پێتڤی یە خەلکێ کوردستانێ ب هەمی بیر و بۆچوونێن سیاسی ، ب هەستەکا نەتەوی و نشتیمانی و ئەخلاقی دڤان کاودانان دا باشترین پشتەڤان بن بۆ حکومەتا هەرێما کوردستانێ داکۆ خەلکێ کوردستانێ ب کێمترین زیان دڤێ قەیرانا مەزن دا دەرباز بکەت و چ کارەساتێن مرۆڤی روونەدەن مینا هژمارەکا وەڵاتان .

سەرکەفتنا حکومەتا کوردستانێ بسەر ڤێ قەریرانێ ، سەرکەفتنا تەڤایا حزب و ئالیێن ساسی یێن کوردستانێ یە نەک تنێ سەرۆکێ حکومەتێ ، یان چەند وەزیرەکا ، یان حزبەکا دیارکری .

مخابن ل سەردەمێ کۆرۆنایێ ژی ئەز ڤێ ئێکگرتنێ نابینم ، ئەگەر هۆسا بیت پێتڤی یە لاڤا بکەین کارەساتەکا مەزنتر سەرمەدا بهێت داکۆ هندەک حزب و سەرکردا ل خەوا دووبەرەکیێ و کەرب کینێ هشیار بکەت ، بێنە بەرەیێ ئێکرتنێ ... !