مەها نیسانا ساڵا ۲۰۰۳ یێ ب دیارکری ل ۹ ڤێ مەها هەمان ساڵ مەزنترین گۆڕانکاری ل ئیراقێ و رۆژهەڵاتا ناڤین هاتە روودان ، ئەو ژی پشتی سەرکەفتنا هێزێن هەڤپەیمانا بسەرۆکاتیا ئەمریکا ل شەرێ بیست رۆژیێ ئازادیا ئیراقێ و ئێخستنا پەیکەرێ ئێک ژ مەزنترین دکتاتۆرێن سەردەم ( سەدام حسێن ) و هەڵوەشاندنا رژێما بەعسا خوونمێژ و دکتاتۆریا عیراقێ ،

ئەوا ( ۳٥ ) ساڵان درێکا کۆدەتایا لەشکری دەسهەڵاتا خۆ بسەر گەلێن ئیراقێ سەپاندی و هەمی ڕەنگێن تۆند و تیژیێ بکار ئینای ، ل بکارئینانا چەکێن کیمیاوی و ئەنفال و وێرانکرنا گوندا و گۆڕینێن دیموکرافی و ...هتد ، ب تایبەت دژی خەلکێ کوردستانێ و شیعەیێن ئیراقێ .
لێ ل داویێ د چەند رۆژەکان خۆ ڕانەگرت و کون مشک لێ بوونە قەیسەری و ب فەرمان و دەستێن مللەتێ خۆ هاتە سێدارەدان .
نە پارتیا وی و نەژی سەروەت و سامانێ وی و کەسێن دۆرماندۆرێن وی چ مەفا نەگەهاندێ و وەک لاپەڕەکێ ڕەش چوونە د زبڵدانا دیرۆکێ دا .
ل وی دەمێ ئانکۆ پشتی نەهێ نیسانێ ئۆمێدا ڤەژاندێن سیاسی و جڤاکی و ئابووری دناڤ خەلکێ ئیراقێ بەرپا بوو ،
هەرچەندە پشکەکا زۆرا هەرێما کوردستانێ لساڵا ۱۹۹۱ ژبن زۆرداریا وێ رژێمێ رزگار ببو لێ هەبوونا وێ رژێمێ هێشتا لسەر مابوو .

پڕانیا خەلکێ ئیراقێ ب گەشبینی و ووڕە بلندیێ پێشوزێ لڤێ بوویەرا مەزن کر ، داکۆ تاما ئازادیێ بکەت و سەر ژنوو ئیراق لسەر بنەمایێ دیموکراسیەتێ و سەروەریا یاسایێ و بن سیبەرا دەستوورەکێ هەژی نمۆنە گاڤێن پێشڤەچوونێن جڤاکی و ئابووری و ئاڤەدانی و ئازادیا تاکەکەسی بهاڤێژیت .

لێ مخابن هیڤیێن خەلکێ ئیراقێ بدەسهەڵات وەرگرتنا خەلکەکێ خۆ پەرست و گەندەڵ و بێ ئەزمۆن و تائیفە گەر ب ئاڤێ داچوون و پشتی هەڤدە ساڵا هێشتا ئیراق پێشەنگا وەڵاتێن پڕ مەترسی و پاشکەفتی یە ژلایێ ئێمناهی و ئابووری و ئاڤەدانی یە ل سەرتاسەرێ جیهانێ .

ئەڤە نە ڕامانا هندێ یە ئیراقێ سەرکردە و سیاسێن شارەزا و دلسۆز نینە ، لێ ئەڤە واقعێ ڕەوشا پێکهاتا جڤاکێ ئیراقێ و جوگرافیا وێ یە ، دناڤبەرا هەرسێ پێکهاتێن سەرەکی ( کورد ، شیعە و سوننە ) کۆ سێ ئێکهاتێن جودانە ژلایێ نەتەوی و ئەتنی و پێکڤە ژیانا وان مەحالە ..! .

چونکی لدەمێ ئاڤاکرنا دەولەتا ئیراقێ بەری سەد ساڵا ماف و ئارمانج و تایبەتمەندیێن وان لبەرچاڤ نەهاتینە گرتن . لەوما نە سیستەمێ پاشایەتی نەژی کۆماری و فیدالی د سەرکەفتی نەبوون و ل داهاتی ژی دا چ سیستەم نەشێن ڤان هەرسێ پێکهاتا دبن ئیراقەکا ئێکگرتی دا پێکڤە بژینن .

ب مانەڤا ئیراقێ بڤی دەست و داری رۆژ بۆ رۆژێ ڕەوشا خەلکێ ئیراقێ دێ وێرانتر و خراپتر بیت ، بتایبەت کۆ نه ئیراقێ سەروەریا خۆ ژدەست دایە و ناکۆکیێن دناڤبەرا ئێک تائیفەژی گەهشتیە ئاستەکێ مەترسیدار کۆ نەشێن حکومەتەکێ پێک بینن ..! و ئیراق ب تمامی کەفتیە بن ئەجندایێن دەرەکی و لدیڤ بەرژەوەندێن خۆ بریارێ لسەر پاشەرۆژا ئیراقێ ددەن ..!

ڕەش و روودانێن ئیراقێ دیار دکەن باشترین رێک و چارە بۆ بجهــ ئینانا هیڤیێن خەلکێ ئیراقێ یێن نیسانا ( ۲۰۰۳ ) دابەشبوونا ئیراقێ یە لسەر سێ دەولەتێن ( کورد ، شیعە و سوننە ) و دابەشبوونەکا بڤی ڕەنگی دێ خەلکێ ئیراقێ ل کارەساتێن مەزنێن مرۆڤایەتی و ئابووری رزگار کەت ، ب تایبەت ئیراقا عەرەبی .

چونکی هەرێما کوردستانێ لسەر ئاستێ جیهانێ پێگەهــ و تایبەتمەندیێن خۆ هەنە و ل هەر کارەساتەکا چاڤەرێکری و نەچاڤەرێکری دا ڕەوشا کوردستانێ دێ زۆر ل ڕەوشا وان باشتر بیت .