بۆ سەرکەفتنێ ل هەمی جەنگ و هەڤڕکیان پێتڤی ب تابۆرێ پێنجێ هەیە ، ئانکۆ هندەک کەس هەبن دناڤ لەشکرێن بەرامبەر و جڤاکێن هەڤڕک پشتەڤایا لەشکر و هێزێن تە بکەن .

بۆ ڕێکخستنا تابۆرێ پێنجێ ژی پێتڤی ب هندەک رێکخستنێن نهێنی یێن چالاک هەیە . داکۆ دبەرهەڤ بن بۆ هەر شەرەکێ ڕاستەوخۆ یان دروست کرنا خۆنیشاندان و سەرهەلدانا و بەڵاڤکرنا پڕۆپاکندا .

شۆڕەشێن کوردی و پارتیێن کوردستانی لدەمێن بۆری مفایەکێ زۆر ل رێکخستنێن نهێنی ددیت کۆ ببوونە تابۆرێ پێنجێ و هێزەکا کاریگەرا پشتەڤانیێ . بۆ نمۆنە رۆلێ وان یێ کاریگەر بۆ ڕێکخستن و بەرپابوون و سەرگرتنا سەرهەلدانا جەماوەریا ئادارا سالا ۱۹۹۱ .

ڤایرۆسا کۆڕۆنایێ کۆ بوویە پەتایەکا سەرتاسەریا جیهانی و رۆژانە ژیانا خەلکەکێ زۆر ژناڤ دبەت . مینا شۆڕەش و شەڕێن چەکداری یە .
لێ جوداهی ئەوە ئەڤ دوژمنێ مرۆڤاتیێ خودان لەشکرەکێ بەزر و نەدیارە ، تاکە چەکێ شکان و سەرکەفتنێ بسەر ڤی دۆژمنێ دڕندە ، خۆپاراستن و بجهـ ئینانا ڕێنمایی یێن سازیێن ساخلەمیێ نە .

پاشترین چەکێ ددەستێ ڤی دوژمنی دا بۆ زاڵبوون بسەر مرۆڤاتیێ ، تابۆرێ پێنجێ و ڕێکخستنێن وان یێن نهێنی نە ..!
ڕێکخستنێن وان یێن نهێنی ئەو کەسن یێن گۆمانا هەلگرا ڤێ ڤایرۆسێ هەی چ ل وان وەڵاتا زڤری بن ئەوێن ڤایرۆس تێدا بەڵاڤ بووی یان ئەوێن ڤایرۆس ل وان وەرگرتی و هەست پێ نەکەن ، تابۆرێ پێنجێ ژی ئەو کەسن یێن بریار و ڕاسپاردێن حکومەتێ و سازیێن ساخلەمیێ بجهــ نەئینن و پەیگیریێ ب مانەڤە لمال و تێکەلی نەکرنێ نەکەن .

چ ژبەر هەست نەکرنێ ب مەترسیێن ڤێ دۆژمنی بیت ، یان هەر ئەگەرەکا دیتر ،
ئەڤەژی خەلەتیەکا زۆرا مەزنە ، پێتڤی یە هەمی تاکێن جڤاکی ڤێ ڤایرۆسێ و ڤی دۆژمنێ ب هێزەکا لەشکریا خودان پێشکەفتیترین چەکێ سەردەم و کوژەک و بێ دلۆڤان ببینین و هژمار بکەین ، داکۆ دڤی شەری دا ب سلامەتی و کێمترین زیان سەربکەڤین .

باشترین چەکێ ئەڤ دوژمنە پێ ژناڤ دچیت ، ئاشکراکرن و دەستەسەرکرنا رێکخستنێن وان یێن نهێنی و تابۆرێ وان پێنجێ یە ، پێتڤی یە هەمی تاکێن جڤاکێ کوردستانێ پشتەڤانیا حکومەتێ و سازیێن ساخلەمی بکەت بۆ دەست نیشانکرنا کەسێن گۆمان لێکری و ل بریار و رێنمایی یێن حکومەتێ دەرنەکەڤین بۆ پاراستنا ساخلەمیا جڤاکێ کوردستانێ ڤان چەند رۆژا لمال بمینین ،

داکۆ ئەو بەرنامێ حکومەتا هەرێما کوردستانێ بۆ بەرهنگاریا ڤایرۆسا کۆڕۆنایێ دانای بەردەوامیێ بسەرکەفتنێن خۆ بدەت ، ئەو سەرکەفتنێن سازیێن ساخلەمیا جیهانی بلند دنرخینن و شانازیێ پێ دبەن . مینا وان وەڵاتان لێ نەهێین ئەوێن شانازی ب سیستەمێ خۆ یێ ساخلەمی دکر و ئەڤرۆ ڕەوشا وان گەهشتیە ئاستەکێ مەترسیدار و نەشێن کۆنترۆلا ڕەوشێ بکەن و ڕۆژا بسەدان لێ دمرن .
چونکی بڤان رێکارێن توند و رێنمایی یێن حکومەتا هەرێمێ ، ڕەوشا کوردستانێ یا بەرنگاری و بەرفرەهبوون و کاریگەریا ڤی ڤایرۆسێ کوژەک ل پڕانیا وان وەڵاتان باشترە ئەوێن تووشی ڤێ پەتایێ بووی .
ئەڤە ژی نیشانێ خەمخوریا دەسهەڵاتداریا هەرێما کوردستانێ بەرامبەر خەلکی و پشتەڤانیا خەلکی ژی جهێ شانازیێ یە ، لێ پێتڤی یە لسەر ڤێ پشتەڤانیێ د بێن فرەهــ بین و بەردەوام بین ، تاکۆ سەرکەفتنا ئێکجاری بسەر ڤی دوژمنی ڕادگەهینین .