ل ساڵا ۲۰۱٤ دڕندەترین گرۆپێ چەکدارێن تیرۆرست و هۆڤانە لسەر ئاستێ جیهانێ بناڤێ ( داعش ) بسەر وەڵاتێ مە کوردستانێ داگرت بمەرەما داگیرکرنێ و ژناڤبرنا دەسکەفت و قەوارێ سیاسیێ کوردستانێ .
ئەو گرۆپێ لەشکرێن وەڵاتێن خودان سەروەری و چەکێن پێشکەفتی وەکی ئیراق و سووریا خۆ لبەر نەگرتی و پشکەکا زۆرا عەردێ وەڵاتێ وان لدەمەکێ کورت دا داگیری .
لەوما وەڵاتێن هەرە مەزنێن جیهانێ هزرەکا مەزن لێ دکر و هەڤپەیمانیێن مەزن بۆ ژناڤ برنا وی گرۆپی پێک ئینای و خەرجیێن بێ هژمار بۆ تەرخارن کرین ،
لێ پێشمەرگەهێن پارێزەرێن کوردستانێ ب شیانێن سنووردار بەراکێ لێ گرت و پیلان و ئارمانجێن وان و پشتەڤانێن وان یێن دژی مرۆڤایەتی هەڵوەشاندن و سەرکەفتنێن مەزن بسەر تۆمارکرن کۆ جیهان ب سەرکەفتن و داستانێن پێشمەرگەهێن کوردستانێ حیبەتی بوون ، راستە پشتەڤانیا هێزێن هەڤپەیمان بۆ کوردستانێ فاکتەرەکێ سەرەکیێ سەرکەفتنێ بوو ، لێ یا ل وێ پشتەڤانیێ مەزنتر چەند ئەگەرێن دیتر بوون ، ژوانا باوەری بخۆ هەبوونا پێشمەرگەهی ب دۆزا ملەتێ خۆ و ووڕە بلندیێ و پشتەڤانیا خەلکێ کوردستانێ بۆ پێشمەرگەهێن کوردستانێ ،
ژلایەکێ دی بجهئینانا پلان و بەرنامە و بریار و ڕاسپاردە و ڕێنمایی یێن فەرماندێ لەشکرێ کوردستانێ کۆ سەرۆک مەسعود بارزانی بوو ، کۆ سەرۆکەکێ خودان سەربۆر و پلانێن رێکخستی یێن سەرکەفتی یە ، ئانکۆ خۆڕاگری و باوەری بخۆ بوون و گۆهداریکرنا رێنشاندەری فاکتەرێ سەرکەفتنێ و زاڵبوونێ یە بسەر هەر پیلان و نەخۆشی و کارەساتان . ئەگەر نە شیانێن تیرۆرستێن داعش لگەل شیانێن ێشمەرگەهێن کوردستانێ نەدهاتە بەراووردکرن . دڤێرەدا دیار دبیت خودایێ مەزن ژی پشتەڤانێ ئێکڕێزی و باوەربخۆبوونێ و خۆپاراستنێ و گۆهداریکرنا ڕێبەری یە .
ئەڤرۆژی مینا زۆر وەڵاتێن مەزن و پێشکەفتی ڤایرۆسێ کۆڕۆنایێ وەکی دوژمنەکێ مەزن بەرێ خۆدایە کوردسانێ و هەول ددەت بسەر مللەتێن کوردستانێ زاڵ ببیت و ژمارەکا زۆر ژناڤ ببەت .
لێ گرنگە خەلکێ کوردستانێ گەرماتیا شەرێ تیرۆرستێن داعش ژبیرا خۆ بینیت ، و ب هەمان هەستا پێشمەرگەهی و دیسپلینا لەشکری و بجهــ ئینانا بریار و ڕێنمایی و ڕاسپاردان بۆ خۆ پاراستنێ بجهــ بینیت ، لێ نە ل فەرماندێ لەشکری بەلکی وان بریار و ڕێنمایی و ڕاسپاردێن رۆژانە حکومەتا هەرێما کوردستانێ و وەزارەتا تەندرۆستی بۆ پاراستن و زاڵبوونا خەلکێ کوردستانێ بسەر ڤێ دوژمنێ نهۆ کۆ ڤایرۆسا کۆرۆنا یە دەردکەت بجهــ بینین و ب گرنگ وەربگرین .
بلا کۆرۆنایێ ل تیرۆرستێن داعش بهێزتر و مەزنتر ببینن و هەمی خەلکێ مە چەوا پشتەڤانیا پێشمەرگەهی دکر ب وی ئاوایی پشتەڤانێن حکومەت و وەزارەتا تەندرۆستی بین ، داکۆ زۆترین دەم ڤی دومنەی ژی گۆر ب گۆر بکەین مینا داعشتێ .
پاراستن و ساخلەمیا مە ل هەمی گەشت و خرڤەبوون و سەیران و ئاهەنگ و …..هتد فەرترن . ئەگەر خەلک پشتەڤانیا ڤێ حکومەتێ نەبیت ، ئەوا هەمی شیانێن خۆ بشەڤ و رۆژ تەرخان کری نەبیتن ، ئەڤ دۆژمنە دێ لسەر مە زاڵ بیت و مەزنترین کارەسات هێتە روودان کو ل کارەساتێن بدەستێ داعشێ مەزنتر بن .
مەبەستا من نە ئەوە خەلک بترسیت ، لێ پێتڤی یە بۆ هەر ئەگەرەکێ بەرهەڤی بنە کرن و حکومەتا مەژی بەرهەڤیێن باش کرن ، لێ باشترین خۆراگری و چەکێ ژناڤبرنا ڤێ دۆژمنی ، بجهـ ئینانا بریار و راسپاردایە و خۆ لڤی ڤایرۆسی بهێتر دابنێین ،
بلا بۆ پاراستن و ساخلەمیا مە مینا فەرماندێن لەشکری سەرەداریێ لگەل نۆژدار و دەزگەهێن ساخلەمی بکەین ، چونکێ ئەو شارەزا و تایبەتمەندێن ڤی بووارینە و باشتر ژ مە ڤی دۆژمنی دناسن وبەرژەوەندا مە و وەڵاتێ مە دزانن .
ئەگەر چەکێ ژنابرنا داعشێ ددەستێ پێشمەرگەهی دا بیت ، چەکێ ژناڤبرنا دوژمنێ کۆڕۆنا ددەستێ وەزارەتا ساخلەمی و نووژدار و سازیێن پەیوەندیدارە ، ئەگەر مە بڤێت سەر بکەڤین و کۆڕۆنا ژی بچیتە د گۆرێ داعشێ دا ، دێ وێ کەین یا ئەو دبێژنەمە .