بدیتنا چاڤدێرێن سیاسی، ئەگەرێ دەستنیشانکرنا موحەممەد تەوفیق عەلاوی وراسپاردنا وی بۆ پێکئینانا کابینەکا نوی یا حکۆمەتێ دماوێ دیار کریدا کۆ ھەیڤەکە، ژ ئەنجاما وی لھەڤھاتنێ بوو ئەوا لڤی داویێ دناڤبەرا چەند مەزنە سەرکردەیێن شیعە ودناڤداھەر ئێک ژ موقتەدا سەدر وھادی عامری ھاتبوو کرن، پشتی کۆ چەندین دان وستاندنێن درێژ دناڤبەرا لایەنێن شیعی ھاتبوو گرێدان بۆ دەست نیشانکرنا کەسەکێ گۆنجای کۆ بشێت عێراقا نۆکە ژ وان ئالۆزیێن کەفتیە تێدا قورتال کەت .
ھەرچەندە بەشەک ژجاددا عێراقێ و خۆپیشاندەران تا نۆکەژی بڤی بژاردێ رازی نینن، چۆنکە بدرویشمێن روون وئاشکرا داخازا کەسەکێ دکەن کۆ پێشتر چ پلە وپۆستێن بلند وەرنەگرتبن و دویر ژ تائیفەگەری وملکەچبوون ببریارێن لایەنێن شیعی ولێڤەگەریێ کاربکەت داکۆ بشێت روویبرووی وان پرسگرێکا ببیت ئەوێن لناڤەراست وبتایبەت لباشوورێ عێراقێ سەرھلداین .
ھەردەما سەرکردێن دەسھەلات بدەستێن عێراقێ خۆ بھێز دبینن ئێکسەر ب ئایدولۆجیا مەزھەبی ولپشت پەردا گفتوکۆیێ دکەن وبریارا ب باسکێ ھێزێ دسەپینن، گەر زانستیانە وبرێکا ھاوکێشەکێ بەرێخۆ بدەینەپەیوەندیا دناڤبەرا ھەر ئێک ژ نیشاندەرێ ھێزا شیعی بۆزالکرنا دەسھەلاتێ لپەی دیفاکتوێ، ونیشاندەرێ بەرگریکرن وروویبرویبوونا پێشھاتەیان ( خۆپیشاندانان وەکو نموونە ) وسەرکەفتنێن شیعەیێن عێراقێ، وەھا دبینم کۆ گرێدانەکا نیگیتیڤ ونەرینی ھەیە دناڤبەرا وان ھەردوو ئاراستادا، ئانکۆ تا ھێزا شیعەیێن عێراقێ بەرەڤ بلندبوونێڤە بچیت، ژبەر گرفتا ھەرە سەرکییا تێگەھشتنا عەقلیەتا شیعی وگەندەلیێ، رێژا بەرگری وروویبریبوونا وان بەرامبەر گرفت وئالۆزیێن کۆ بۆ پێش دھێن بەرەڤ ئاستێ نزمبوونێڤە دچن، چۆنکە لبن فەرمانرەواییا ئیرانێ تێکلاوی رەوشا نە سەقامگیراوی وەلاتی دبیت، ئەڤجا چ ژلایێ ئەولەھیێ بیت یان پۆلیتیکێ یانژی ئابووریڤە !! ئەڤە بتنێ گووتنەک نینە کۆ دبێژم بەلکۆ گەر ب راوەستیانەکێ تەماشای کابینەیێن حکۆمەتا عێراقێ بکەین نەخاسم یێن ڤی دۆماھیێ دێ ئەڤ راستیە ئاشکەرا بیت .
پێکۆلکرن ژ پێخەمەت بدەستخستنا بەرژەوەندیێن تائیفی لسەر حسابا لایەنێن دی وکارکرن لسەر بنەمایێ کەمینە وزوورینە دناڤا دامەزراویێن یاسایی ودستووریێ دەوەلەتێدا، ھەروەسا دویرکەتناژ پرەنسیپێن داد وویژدانێ نەخاسم ھەڤسەنگیێ ولھەڤھاتنێ، ئەڤە ھەمی ژمقەوماتێن وی عەقلیەتێنە ئەوێن ئەڤرۆ ھندەک ژدەسھەلات بدەستێن عێراقێ بۆ ڤی چەندێ کاردکەن .
ئەم دبینین تا دھێت حکۆمەتێن ئێک لدویف ئێکێن عێراقا نوی ژبەر ئالوودەبوونێ ب گەندلیێ بھەمی رامانێن خۆڤە جار لدویف جارێ شکەستنێن بەرچاڤتر تۆماردکەن، ڤێجا تیراسا سەرکەفتنێ وزالبوونا لسەر گرفتان بەرەڤ بلندبوونێ ناچیت مەگەر پێگیربوون بدەستوورێ وەلاتی و دەرکەفتن ژ بن فەرمانێن تائیفەگەریێ و دەستێ دەرەکی نەھێتە ئارا ..!!
دراستیێدا پشتراستیا ھەمی لایەنێن پشکدار دپرۆسێسا سیاسی وئیدارەدانا وەلاتیدا دوی چەندێدایە کۆ بابەتێ پێکئینانا کابینا نوی یا حکۆمەتا عێراقێ ژبۆ باوەرپێکرنێ پێتڤی چارچۆڤەکێ یاسایی یە وداکۆ ئێکەم پێنگاڤ شەرعیەتا یاسایی وەرگریت دھێتە دھۆلا پەرلەمانیدا، و ئەڤی چەندێ پێتڤی ب رازیبوونا ھەمی یان پتریا لایەنانە .. ئەڤجا ھەمبەر رازیکرنا کوردان بۆ باوەریدانا ب کابینا نوی یا حکۆمەتا عێراقێ پێتڤیە عەلاوی بھاڤێتنا چەندین پێنگاڤان لدەسپێکێ نیازپاکیا خوە دیار کەت ھەرچەندە ژلایێ عەلاویڤە ھاتیە دووپاتکرن کۆ دێ پێگیربیت ب وی لھەڤھاتنتا دناڤبەرا ھەرێمێ و بەغدا لسەر پاراستنا مافێن دەستووری یێن ھەرێمێ، لێ بخۆ تێگەھاندنا دەسھەلاتدارێن بەغدا بفەلسەفا تائیفیێ، رەنگە پشتراستی نەبیت، ئەڤجا تا کەنگی دێ کورد وسوننە چاڤەرێی راوەستیانا تیراسا ھەلکێشان وداکێشانا ھەر ئێک ژ ھێزا شیعی وراددا سەرکەفتنا وانا بن ؟ ئانکۆ چ گرەنتی ھەیە بۆ جێگیربوونا خالا گرانیێ دناڤەراستێ ھاوکێشەیدا ؟!. بەرسڤ دێ لدویف بەرژەوەندیێن دەولەتێن زلھێزێن ئەقلیمی وجیھانیبن .