گەر چ لناڤەندێن ئەکادیمیدا مە بکێمی گۆە لچارەنڤیسێ وان تیرۆریستێن داعشێ دبیت، ئەوێن ھاتینە راگرتن دزینداناندا، لێ لناڤەندێن دی مینا یێن دیبلۆماسیدا، زێدەتر ئەڤ بابەتە دکەڤیتە بەر باس وگفتووگۆیێ ومەرەم ژوان تیرۆریستان ئەون یێن ب راگرتی ماینە دزینداناندا ل رۆژئاڤایێ کوردستانێ و لژێر دەسھەلاتا ھێزێن سووریا دیمۆکراتدا ( ھسد )ێ .
براستیژی ئەڤ بابەتە ماوەیەکێیە بجۆرە ھەلاویستیەک مایە وتا دھێت ژبەر ھۆکارێن سیاسی وئالۆزبوونا ناڤچەی، مەترسیا دەرکەفتن ودووبارە سەرھلدانا تیرۆرێ زێدەتر دبیت، نەمازە پشتی کۆ ویلایەتێن ئێکگرتیێن ئەمریکا ھێزێن خۆ لدەسپێکێ ژسووریێ ڤەکێشاین وتورکیایێ ب لەشکەرکێشیێ ئەو ناڤچە داگیرکرین...
ھەرچەندە ژبەر کریارێن درندانەیێن تیرۆریستێن داعشێ کۆ بھەمی رەنگێن بەربەری ( وەحشیانە جۆرەھا تاوان ئەنجامداینە )، ددیتنا خوە دا ئەم وانا بگشتی ھەژی ژناڤچوونێ دبینین، لێ ئەڤ چەند نابیتە رێگر د دادیا یاسایێدا بۆ لێپرسین ودادگەھکرن وسەپاندنا سزایێ لسەر وان لدویف جۆرێ تاوانێ و ئاستێ رێژا ئەنجامدانا تاوانێ ... وھتد، ئانکۆ دادگەھکرنا دادپەروەرانە لسەر بنەمایێ مافێن مرۆڤان وەکۆ مافەکێ گەرەنتی کری ھاتیە چەسپاندن لسەر ئاستێ یاسایێن ناڤخۆیی یێن وەلاتیدا، ھەروەسا لسەر ئاستێ نێڤدەولەتیژی ودچەندین ێکوکین دەولیدا ھاتیە چەسپاندن، وەک چارنامێ مافێ مرۆڤی سالا ١٩٤٨ ێ، لھەڤھاتنا جنیفێ یا سالا ١٩٤٩ ێ، دسیستەمێ رۆما یا بنەرەتی یا دادگەھا تاوانێن نێڤدەولەتی سالا ١٩٩٨ ێ، دیسان ئاماژە پێ ھاتیەدان ژلایێ لیژنا ئەمریکی بۆ مافێن مرۆڤان، ھەروەسا د دادگەھێن یۆغوسلاڤیا بەرێ و رواندا وسیرالیۆنێ ...وھتد .
لێ پسیار لڤێرێ ئەوە نۆکە بەھانەیێن لۆژیکی نەماینە بۆ پاشگۆھخستنێ پا بۆچی لڤاندنا ڤی کەیسێ دئاستێ پێتڤیدا نینە وچارەنڤیسێ وان تیرۆریستا دێ بەرەڤ کیڤە بیت ؟؟! وئەرێ ددەسھەلاتا کێ دایە راببیت ب دادگەھکرنا ڤان تاوانباران ؟؟..
گەر بکێمی نەبینن دخوازم بۆ بەرسڤدانێ ژپسیارا دووێ دەست پێبکەم وبێژم ژبەر نەسەقامگیری وئامادەنەبوونا دستوورێ ئاییندەییێ سووریێ، رەوش ل وی وەلاتی یێ گۆنجای نینە بۆ دادگەھکرنا تاوانباران وسووریا لایەن نینەد دادگەھا تاوانێن نێڤدەولەتیدا، بەلێ لگۆری بەشێ حەفتێ ژمیساقا نەتەوێن ئێکگرتی وپشتبەستن ب ماددێ سێزدێ - باء (١٣/ب) ژ سیستەمێ بنەرەتی یێ دادگەھا تاوانێن نێڤدەولەتی، ئەنجوومەنا ئاسایشا نەتەوێن ئێکگرتی مافێ رەوانە کرنا تاوانبارێن عێراقی وسووری ھەیە بۆ دادگەھا تاوانێن نێڤدەولەتی بمەرەما دادگەھکرنا وان، ئەوژی ژبەر ئەداکرنا مەزنترین ئەرکێ سەر ملێ ڤی رێکخراوا کۆ بمەرەما پاراستنا ئاشتیێ وئێمناھیێ لسالا ١٩٤٥ ێ ھاتبوو دانان .. وژبەر جۆداھیا رەگەزێ ھەر ئێک ژوان تیرۆریستا ئێکەمینا دادگەھکرنێ دزڤریت بۆ دەسھەلاتا رەھایا ھەر وەلاتەکێ کۆ سەروەریا تەماما خۆ ھەیە، ئەگەر نە، لدویف بنەمایێ تەمامکرنێ ( مبدڕ التکامل ) دیسان ددەسھەلاتا دادگەھا تاوانێن نێڤدەولەتیدایە راببیت بدادگەھکرنا وان تاوانبارێن کۆ رابووین بئەنجامدانا تاوانێن مەزن یێن کۆ ددیتنا کۆمەلگەھا نێڤدەولەتیدا جھێ سەرەنج وگرنگی پێدانێ نە
و بۆ بەرسڤدانا پسیارا ئێکێژی براستی گرفت د وی چەندێدایە کۆ ھەمی ھەڤرکیێن لسووریێ ھەین محکۆمی ئێکدۆ کێشانا دەولەتی وھەرێمی نە لسەر ڤی پرسێ وگرێدای تێگەھشتنا رۆسی – ئەمریکینە کۆ وەکۆ دوو جەمسەر و وەلاتێن زلھێز وخاوەن بەرژەوەندیێن مەزن لرۆژھەلاتا ناڤین، لگۆری بەرژەوەندیان بەرێ ھەڤرکیان د گھۆرین داکۆ بەرێ تیراسا ئەنجامێژی بھێتە گھۆرین ..
یا مندڤێت ئاماژێ پێ بدەم ئەوە کۆ چارەسەریا ژھەمیێ گۆنجایتر بۆ بدۆماھیک ئینانا ڤی دەنگۆیێ ئەوە کۆ، دادگەھەکا نێڤدەولەتیا تایبەت بھێتە پێک ئینان بۆ گەھاندنا تیرۆریستان ب سزایێن وان مینا دادگەھا نێڤدەولەتیا تایبەت یا لوبنانێ ئەوا لڤی دووماھیێ ب بریارا ئەنجوومەنا ئاسایشا نەتەوێن ئێکگرتیڤە لسالا ٢٠٠٩ ھاتبوو دانان بمەرەما سەپاندنا سزایەکێ دادپەروەرانە لسەر ئەنجامدەرێن کۆشتنا ٢٢ کەسان کۆ دناڤدا سەرۆکێ ئەنجوومەنێ وەزیران یێ بەرێ رفیق حەریری بوو .