دەمێ هاتی ( پ . ک . ک ) هەڵوەشاندنا خۆ رابگەهینیت
غیاس خالد زێباری
د کۆنگرێ دوویێ دا ل ۲۰ --- ۲٥/۸/۱۹۸۲ بریارا ڤەگەراندنێ بۆ باکوورێ کوردستانێ و ئامادەکاریێن دەسپێکرنا شەرێ چەکداری دژی دەولەتا تورکیا دا و ۱٥/۸/۱۹۸٤ شەرێ چەکداری دەستپێکر ، ل ۲۱ / ۳/ ۱۹۸٥ دامەزراندنا بەرەیێ نشتیمانیێ ئازادیخوازیا کوردستانێ بۆ رێکخستنا جەماوەری و چالاکیێن سیاسی و دبلۆماسی لسەر هەمی ئاستێن چین و تووێژێن جڤاکی راگەهاند .
ئەڤ حزبە د زۆر قۆناغان دا دەرباز بۆیە و شێوازێن جودا جودا یێن خەباتێ بکار ئیناینە و ل ۱٥/۲/۹۹۹ سەرۆکێ وێ ل نیرۆبیا پایتەختێ کینیا هاتە گرتن و هەتا نهۆ یێ گرتیە .
ل ۲ ێ تەباخا ۱۹۹۹ ب ئێک لایەنی بریارا شەر ڕاگرتنێ و ڤەکێشانا چەکدارێن خۆ بۆ دەرڤەی سنوورێ وەلاتێ تورکیا دا و ئینانە باشوورێ کوردستانێ .
پشتی بۆرینا ٤۰ سالا ( پ . ک . ک ) نە تنێ چ دەسکەفتێن نەتەوی و نشتیمانی بدەست نەئینانە ، بەلکی ئاستەنگێ مەزن لبەر کوردستانیا درۆست کرینە ، وەک راگەهاندنا شەرێ دژی حکۆمەتا هەرێما کوردستانێ و پارتی دیموکراتی کوردستان لسالا ۱۹۹۲ و پشتی وێ .
هەرچەندە پەکەکێ درۆشمێن مەزن وەک رزگارکرنا هەرچار پارچێن کوردستانێ ، لێ دئەنجامدا لداویێ باوەری ب نەتەوایەتیێ و نشتیمانیێ نەما و درۆشمێ وان بۆیە ئازادیا گەلا و پەیڤا کوردستان ژی لادا و باوەری ب مارشا نشتیمانیا ئەی رەقیب و ئاڵایێ پیرۆزێ کوردستانێ ژی نەما .
د خەباتا خۆ یا چەکداری دا نەشیا سەرکەفتنا بدەستڤە بینیت و ئێک بووستا ئاخا کوردستانێ ژی رزگار بکەت . ل بەشێن دی یێن کوردستان ژی لجهێ رەوشا وان یا سیاسی و نیڤ دەولەتی و جڤاکی لبەرچاڤ بگریت ، خۆ ب خودانێ وان زانی و چەندین دەڤەرێن وان بهێزا چەکی کونترۆک کرن و ب سەدا گوندێن باشوورێ کوردستانێ چولکرن و خەلکێ وێ دەربدەر کر و بەهانە ئێخستە ددەستێ دەولەتا تورکیا دا بۆ بومبە بارانکرنێ و چەندین خەلکێ سڤیل شەهید کرینە .
برەنگەکێ گشتی پەکەکێ ب هەمی ڕێکخستنێن بن پەردا وێڤە مینا پەیەدە و یەپەگە و هەدەپە و یەپەشە و...... هتد د هەمی وران دا شکەستن خواریە ،
ل باکوورێ کوردستانێ کۆ گۆڕەپانا ڕاستەقینەیا خەباتا وانە ، نەشیا ببنە حزبەکا کوردستانیا جەماوەری بۆ ڕاکێشانا ڕەئیا خەلکێ کوردستانێ ئەڤەژی ژ ئەنجامێ نەبوونا ڕێکخستنەکا سەردەمانەیە و هەتا نهۆ کادر و سەرکردێن پەکەکێ ب هەستا بەری سیهـــ چل سالا ئیرادا خۆ لسەر کوردا د سەپینن و ڕێگرن لهەمبەر هەر ئەلتەر ناتیڤەکێ و پەنابرن بۆ کوشتنا سەرکردە و کادرێن پارتیێن شۆرەشگێر ئەوێن کاریگەر دناڤ سیاسەتا کوردستانێ وەک کوشتنا ( فەرید ئۆزۆن ) ئەندامێ سەرکردایەتیا ڕێکخستنا شۆرەشگێرێن باکوورێ کوردستانێ ( DDKD) و سەرۆکێ ل سەرکێ پارتیا دەنگێ کاوە بوو و کادرێن پارتیا خۆ یێن خودان هزرا نەتەوی و سەرکردە و رێکخستنێن دیتر ژی وەک ( سەمیر) چەتین گۆنگۆر دامەزرینەرێ (PKK ) ل سالا ۱۹۸٥ ستۆکهۆڵم و ئەنوەر ئاتا (عەلی باتمان) و زۆلفی گۆک ، رەسوول ئالتۆن (داوود) ، موراد بایرقلی كو ل 1984 ل بەرلینێ تێ شەوتاندن ، لەمیعە باقسی ( سەحەر) ، جەمیلە قه‌یتان هەڤژینا علی حەیدەر قەیتان و چەندینێن دیتر ژبەرکۆ دگەل سیاسەت و ئایدیۆلۆژیا ( پ . ک . ک ) ێ نەبۆن . ئەڤەژی زیانەکا مەزن بۆ بوو بزاڤا نەتەوی و شۆرەشگێریا کوردی ل باکوور و ترسەکا مەزن دناڤ سیاسەتمەدارێن کورد دروست کربوو ، و خزمەتەکا زۆر گەهاندە دەولەتا ترکیا .
( پ . ک . ک) بێ پیڤەر خۆ ب سەرکێشێن داکۆکیکارێن پرسا کوردی دبینن و زاڵ دکەن .
لسەر ئاستێ سیاسی و دبلۆماسی ژی پەکەکێ نەشیایە بچیتە دناڤ هەڤرکیان دا ، نە لسەر ئاستێ تورکیا شیایە هەڤپەیمانیێن ستراتیژی لگەل پارتیێن کوردی و تورکی پێک بینیت و نەژی شیایە نەخشە رێکەکێ بۆ درۆست کرنا ڤێ چەندێ بکێشیت .
ئەڤە دیار دکەت کۆ ڤێ پارتیێ پلان و ستراتیژیێن دارشتی نەبوویە و ئەوێن هەی ژی یێن رۆژانە بوونە ، لەوما بەردەوام گۆرانکاری د سیاسەت و ئارمانجێن وان یێن ئاشکرادا چێبوونە .ل ئازادی و سەرخۆبوونا کوردستانا مەزن ، بۆ ئازادیا گەلان ، ئانکۆ ل خەباتا بدەستڤەئینانا مافێن نەتەوی و نشتیمانیێن گەلێ کورد بۆ مافێن ڕەوشەنبیری و جڤاکی و پەروەردەیی ..! لسەر ئاستێ پەیوەندیێن نیڤ دەولەتی ژی نەشیایە ، پەیوەندیێن ستراتیژی و درێژخایەن لگەل سازیێن نیڤ دەولەتی و وەلاتێن دیموکراتخواز و داکۆکیکارێن مافێن گەلان گرێبدەت ، ئەڤەژی ژ ئەنجامێ رەفتار و سەرەدەریێن وان یێن دژی بنەمایێن دیموکراسیێ بوویە ، چ دگەل جڤاکێ کوردستانێ ، یان لگەل حزبێن دیترێن کورد ، هەردەم باوەری ب خۆ سەپاندنێ یە ...! ئەڤەژی دگەل سەردەمی ناگونجیت .د وارێ ئیدارەدانێ ژی دا دیسان شکەستن ئینایە ، ل باشوورێ کوردستانێ ئەو دەڤەرێن وان داگیرکری جورە ئیدارەکا نە شەرعی بۆ خۆ راگەهاندی یە ، تنێ دەسهەڵاتێ لخۆ دکەنەڤە و پڕانیا خەلکێ وان دەڤەرا ئاوارە کریە و رێگریێ لخەلکێ خۆجهــ دکەن بۆ چوونا سەر گوند و رەز و باغ و کەسابەتێ و باجێ لێ دستینن . ئەرێ ئەڤە رێڤەبرنە یان خۆ سەپاندنا خەلکێ بیانی یە بسەر یێن خۆجهــ ..! چەندین سالە ل رۆژئاڤایێ کوردستانێ ژی بهێزا چەکی دەسهەلاتا خۆ سەپاندی یە و هەر جار ب شێوازەکێ رێڤەبرنێ ، جاک کانتۆن ، جار فیدرالیەت ، جار خۆسەری ... بێ کۆ بشێن چ دانپێدانا بدەستڤە بینن و نە لسەر ئاستێ هەڕێمی و نە نیڤ دەولەتی ، نەژی لسەر ئاستێ کوردستانی و نافخۆیی ، راستە د شەرێ دژی تیرۆرستێن داعش سەرکەفتنێ باش تۆمارکرن ، لێ دڤی واری ژی نەشیان ڤان سەرکەفتنێن بخۆ بکەنە پاڵدەرێن دابینکرنا پشتەڤانیا سیاسی وەڵاتێن دناڤ هەڤەپەیمانیا نیڤ دەولەتیا دژی داعش ، بهزاران گەنجێن کورد لسەر دەڤەرێن نەکوردستانی دانەکوشتن و بێ بەرامبەر ئەو دەڤەر رادەستی سووریا کرنەڤە ، ژبلی ڕێگریکرنێ ل پێشمەرگەهێن رۆژ بۆ بەرەڤانیکرنێ ل رۆژئاڤایێ کوردستانێ .
